កម្លាំងអាវុធហត្ថចុះបង្ក្រាបទីតាំងសន្និធិឈើអារមួយកន្លែង នៅស្រុកឱរ៉ាល់ ខេត្តកំពង់ស្ពឺ
21-01-2026 08:23
(កំពង់ស្ពឺ)៖ ដោយអនុវត្តតាមគោលការដឹកនាំយ៉ាងម៉ឺងម៉ាត់របស់នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថខេត្តលើផ្ទៃប្រទេស ព្រមទាំងមានការណែនាំដោយផ្ទាល់ ពីសំណាក់លោកបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ ក្រោមការដឹកនាំបញ្ជាដោយផ្ទាល់របស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ កម្លាំងមូលដ្ឋានកងរាជអាវុធហត្ថស្រុកឱរ៉ាល់ សហការជាមួយមន្ត្រីឧទ្យានុរក្សប្រចាំស្នាក់ការរងស្រែកិន បានចុះបង្ក្រាបសន្និធិឈើអារចំនួន១ទីតាំង នៅចំណុចវាលត្រាង ភូមិស្រែកិន ឃុំត្រពាំងជោ ស្រុកឱរ៉ាល់។
ប្រតិបត្តិការកាលពីថ្ងៃទី១៧ ខែមករា ឆ្នាំ២០២៦កន្លងមកនេះ កម្លាំងជំនាញកងរាជអាវុធហត្ថស្រុកឱរ៉ាល់បានចាប់យក វត្ថុតាងល្មើសឈើអារចំនួន ១,៥៦៨ម៉ែត្រត្រីគុណ រួមមាន៖
* ឈើអារប្រភេទលេខ១ (សុក្រម) ចំនួន២០កំណាត់ ស្មើនឹង ០,៧៥០ម៉ែត្រត្រីគុណ
* ឈើអារក្តា ប្រភេទក្រៅលំដាប់ថ្នាក់ (ស្ពង់) ចំនួន១៨សន្លឹកស្មើនឹង០,២០២ម៉ែត្រត្រីគុណ
* ឈើអារសសរ ប្រភេទក្រៅលំដាប់ថ្នាក់ (កំពីងដុក) ចំនួន៦ដើម ស្មើនឹង ០,៤៧២ម៉ែត្រត្រីគុណ
* ឈើអារឃ្នៀប ប្រភេទក្រៅលំដាប់ថ្នាក់ (ស្ពង់) ចំនួន៤សន្លឹកស្មើនឹង ០,១៤៤ម៉ែត្រត្រីគុណ។
បច្ចុប្បន្នចំពោះវត្ថុតាងល្មើសទាំងអស់ខាងលើ ត្រូវកម្លាំងកងរាជអាវុធហត្ថស្រុកឱរ៉ាល់ បានដឹកជញ្ជូនយកមកថែរក្សាទុកនៅស្នាក់ការរងស្រែកិន ស្ថិតក្នុងភូមិស្រែកិន ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ និងរៀបចំអនុវត្តក្រមបរិស្ថាននិងធនធានធម្មជាតិផងដែរ៕
