(ភ្នំពេញ)៖ ការហោះហើរត្រង់ពីទីក្រុងកំពង់សោម-ទីក្រុងឆឹងទូ (Chengdu) ដោយក្រុមហ៊ុនអាកាសចរណ៍ Cambodia Airways បានបើកជើងហោះហើរត្រង់ជាផ្លូវការ ចាប់ពីថ្ងៃទី២១ ខែមករា ឆ្នាំ២០២៦ តទៅ ដែលមាន ៣ជើងក្នុងមួយសប្តាហ៍ គឺថ្ងៃពុធ សុក្រ និងអាទិត្យ។ នេះបើតាមសេចក្ដីជូនដំណឹង ពីក្រសួងទេសចរណ៍។

កាលពីថ្ងៃទី២៦ ខែកញ្ញា ឆ្នាំ២០២៥កន្លងទៅនេះ ក្រុមហ៊ុនអាកាសចរណ៍ជាតិកម្ពុជា ក៏បានបើកដំណើរការជើងហោះហើរត្រង់ពីក្រុងព្រះសីហនុ ទៅកាន់ក្រុងសិនជិន ប្រទេសចិន ដោយជោគជ័យ ដែលក្លាយជាគោលដៅដ៏សំខាន់មួយក្នុងទៀត ក្នុងការទាក់ទាញភ្ញៀវទេសចរ និងវិនិយោគិនពីទីក្រុងសិនជិនផងដែរ។

ការភ្ជាប់ជើងហោះហើររបស់ក្រុមហ៊ុនអាកាសចរណ៍ជាតិកម្ពុជា គឺឆ្លើយតបពេញទំហឹងចំពោះយុទ្ធនាការ «ឆ្នាំទេសចរណ៍កម្ពុជា-ចិន» ដែលបានរៀបចំឡើងដោយ​រដ្ឋាភិបាលទាំងពីរ និងការពង្រីកគោលដៅថ្មីៗ ដើម្បីបំពេញតម្រូវការកំពុងកើនឡើងទាំងផ្នែកពាណិជ្ជកម្ម និងទេសចរណ៍របស់ប្រជាជនទាំងពីរប្រទេស។

សូមជម្រាបថា គិតចាប់ពីខែមករា ដល់ខែធ្នូ ឆ្នាំ២០២៥ អាកាសយានដ្ឋានអន្តរជាតិព្រះសីហនុ (KOS) មានជើងហោះហើរចេញ-ចូល (ទ្វេទិស) ចំនួន២,៦៣៥ជើង, អ្នកដំណើរ ចេញ-ចូល (ទ្វេទិស) ចំនួន ១៧២,៤៦១នាក់ និងទំនិញតាមផ្លូវអាកាស ចេញ-ចូល (ទ្វេទិស) ចំនួន៥តោន៕