(ភ្នំពេញ)៖ លោកបណ្ឌិត ជ្រុន ថេរ៉ាវ៉ាត ប្រធានគណៈប្រចាំការ នៃគណៈអចិន្រ្តៃយ៍យុវជនគណបក្សថ្នាក់កណ្តាល តំណាងសម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជាប្រធានយុវជនគណបក្សថ្នាក់កណ្តាល និងលោកជំទាវបណ្ឌិត នៅរសៀលថ្ងៃទី២១ ខែមករា ឆ្នាំ២០២៦ បានដឹកនាំគណៈប្រតិភូ អញ្ជើញប្រគល់អំណោយសម្ដេចធិបតីហ៊ុនម៉ាណែត និងលោកជំទាវបណ្ឌិត ជូនដល់មជ្ឈមណ្ឌលសកម្មភាពកំចាត់មីនកម្ពុជា (CMAC)។

អំណោយជាគ្រឿងឧបភោគបរិភោគ,ភេសជ្ជ និងសម្ភារប្រើប្រាស់ ដែលបានប្រគល់ជូនមជ្ឈមណ្ឌលសកម្មភាពកំចាត់មីនកម្ពុជា (CMAC) មានចំនួន៣២មុខ។

ថ្លែងនាឱកាសនោះ លោកបណ្ឌិតបានពាំនាំប្រសាសន៍សួរសុខទុក្ខពី សម្តេចអគ្គមហាសេនាបតីតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន រួមទាំងសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ជូនដល់មជ្ឈមណ្ឌលសកម្មភាពកំចាត់មីនកម្ពុជា (CMAC)។

ក្នុងនាមសម្តេចមហាបវរធិបតី និងក្នុងនាមគណៈប្រចាំការ នៃគណៈអចិន្រ្តៃយ៍យុវជនគណបក្សថ្នាក់កណ្តាល, លោកបណ្ឌិត ជ្រុន ថេរ៉ាវ៉ាត បានសំដែងនូវការអរគុណ និងកោតសរសើរចំពោះមជ្ឈមណ្ឌលសកម្មភាពកំចាត់មីនកម្ពុជា (CMAC) ដែលបានបំពេញតួនាទីយ៉ាងសកម្មក្នុងការបោសសម្អាតមីន និងសំណល់យុទ្ធភណ្ឌមិនទាន់ផ្ទុះ ដែលបន្សល់ទុកដោយយោធាថៃ នៅតាមបណ្ដោយព្រំដែនកម្ពុជា-ថៃ និងបានធ្វើឱ្យបងប្អូនប្រជាពលរដ្ឋភៀសសឹកមួយចំនួន បានវិលត្រឡប់ទៅកាន់លំនៅដ្ឋានវិញ ប្រកបដោយសុវត្ថិភាព។

ក្នុងឱកាសនោះផងដែរ អគ្គនាយករង តំណាងអគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (CMAC) បានគោរពថ្លែងអំណរគុណយ៉ាងជ្រាលជ្រៅ ចំពោះសម្តេចមហាបវរធិបតី និងលោកជំទាវបណ្ឌិត ដែលបានផ្តល់នូវអំណោយជាច្រើន ជូនដល់មជ្ឈមណ្ឌលសកម្មភាពកំចាត់មីនកម្ពុជា (CMAC) និងបានគោរពជូនពរសម្តេចតេជោ, សម្តេចកិត្តិព្រឹទ្ធបណ្ឌិត, សម្តេចមហាបវរធិបតី និងលោកជំទាវបណ្ឌិត ព្រមទាំងក្រុមគ្រួសារ សូមមានសុខភាពល្អបរិបូរណ៍ កាយពលមាំមួន បញ្ញាណាញវាងវៃ និងជន្មាយុយឺនយូរ ដើម្បីដឹកនាំប្រទេសជាតិ ការពារអធិបតេយ្យភាព បូរណភាពទឹកដី និងការពារសុខសន្តិភាពជូនជាតិ និងប្រជាជនកម្ពុជា ឲ្យបានគង់វង់ជានិច្ចនីរន្តន៍តរៀងទៅ៕