(កូរ៉េខាងត្បូង)៖ លោក ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ ព្រមទាំងមន្រ្តីអមស្ថានទូត បានអញ្ជើញចូលរួមស្តាប់បាឋកថាស្តីពី «Cybersecurity and Artificial Intelligence» ឧទ្ទេសនាមដោយលោក Tanel Sapp ឯកអគ្គរដ្ឋទូតសាធារណរដ្ឋអេស្តូនី នៅថ្ងៃទី២០ ខែមករា ឆ្នាំ២០២៦។

បាឋកថានេះបានរៀបចំឡើង ដោយស្ថានទូតហ្វីលីពីន ប្រចាំសាធារណរដ្ឋកូរ៉េ ក្នុងនាមហ្វីលីពីន ជាប្រធានអាស៊ាន ឆ្នាំ២០២៦ ដោយមានការអញ្ជើញចូលរួមពីសំណាក់ ឯកអគ្គរាជទូត-ឯកអគ្គរដ្ឋទូត ប្រទេសសមាជិកអាស៊ាន ភារធារីស្តីទី និងមន្ត្រីការទូតប្រទេសអាស៊ាន ផងដែរ។

បាឋកថានេះរៀបចំឡើង ក្នុងគោលបំណងដើម្បីលើកកម្ពស់ការយល់ដឹងអំពីសារៈប្រយោជន៍នៃការប្រើប្រាស់បញ្ញាសិប្បនិម្មិតដោយសុវត្ថិភាព និងការប្រើប្រាស់អ៊ីនធឺណិតប្រកបដោយក្រមសីលធម៌ វិជ្ជាជីវៈ និងអនាគតនៃការកសាងរដ្ឋាភិបាលឌីជីថល.

ជាពិសេស ក្នុងន័យជំរុញ លើកកម្ពស់ការងារប្រកបដោយប្រសិទ្ធភាព និងលើកកម្ពស់ផលិតភាព ក៏ដូចជាទំនុកចិត្តប្រជាពលរដ្ឋ តាមរយៈការបម្រើសេវាសាធារណៈឱ្យកាន់តែល្អប្រសើរឡើង៕