(តាកែវ)៖ នៅក្នុងឱកាសអញ្ជើញទទួលស្វាគមន៍ ក្រុមអ្នកវិនិយោគម៉ាឡេស៊ី នាព្រឹកថ្ងៃទី២២ ខែមករា ឆ្នាំ២០២៦ លោក វ៉ី សំណាង អភិបាលខេត្តតាកែវ បានថ្លែងថា ក្រុមហ៊ុនវិនិយោគម៉ាឡេស៊ី គ្រោងនឹងបោះទុនវិនិយោគលើវិស័យកសិកម្ម ក្នុងទឹកដីខេត្តតាកែវ ក្នុងពេលឆាប់ៗខាងមុខនេះ។

លោកអភិបាលខេត្តតាកែវ បានថ្លែងបន្តថា គម្រោងវិនិយោគលើវិស័យកសិកម្មរបស់ក្រុមអ្នកវិនិយោគម៉ាឡេស៊ី រួមមាន៖ដំណាំស្វាយ និងខ្នុរ ដើម្បីផ្គត់ផ្គង់ក្នុងស្រុក និងនាំចេញទៅកាន់ទីផ្សារអឺរ៉ុប និងដៃគូរសហការអន្តរជាតិផ្សេងៗទៀត។

លោក វ៉ី សំណាង ក៏បានថ្លែងប្រាប់ក្រុមអ្នកវិនិយោគម៉ាឡេស៊ីដែរថា ខេត្តតាកែវជាខេត្តមួយ ដែលមានសក្ដានុពលលើវិស័យកសិកម្ម ក្នុងនោះ ប្រជាពលរដ្ឋជាង៧០ភាគរយ បានប្រកបរបរកសិកម្ម ចិញ្ជឹមសត្វ ដាំដំណាំស្រូវ និងដំណាំផ្សេងៗទៀត ដែលមានផ្ទៃដីសិកម្មសរុបចំនួន ២៦៤,០០០ហិកតា ក្នុងនោះខេត្តតាកែវ ក៏មានផលិតផលកសិកម្មល្បីឈ្មោះ ចំនួន០២ គឺ បង្កងទឹកសាប និងពងទាកូន ត្រូវបានចុះបញ្ជីម៉ាកសម្គាល់ភូមិសាស្ត្រទំនិញដោយក្រសួងពាណិជ្ជកម្ម។

លោកអភិបាលខេត្តតាកែវ ក៏បានសន្យាថា ក្នុងគម្រោងវិនិយោគនេះ អាជ្ញាធខេត្តនឹងខិតខំសម្របសម្រួលបង្កលក្ខណៈងាយស្រួល គ្រប់បែបយ៉ាងដល់ក្រុមវិនិយោគ ដើម្បីឲ្យគម្រោងទទួលបានជោគជ័យ។

ក្នុងឱកាសនោះ តំណាងក្រុមវិនិយោគម៉ាឡេស៊ី បានថ្លែងប្រាប់ថ្នាក់ដឹកនាំខេត្តថា ដោយមើលឃើញពីខេត្តតាកែវជាខេត្ត ដែលមានសក្ដានុពលលើវិស័យកសិកម្ម ទីតាំងភូមិសាស្រ្ត មានលក្ខណៈអំណោយផល ពិសេសភាពខុសប្លែកនៃដំណាំស្វាយ និងខ្នុរមានរសជាតិឈ្ងុយឆ្ងាញ់ ទើបក្រុមហ៊ុនចាប់អារម្មណ៍ និងគ្រោងវិនិយោគនាពេលឆាប់ៗនេះ៕