រយៈពេល១ឆ្នាំ រដ្ឋបាលខេត្តក្រចេះ បានបំពេញតួនាទី ភារកិច្ច បម្រើពលរដ្ឋ ស្របតាមយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល
22-01-2026 21:13
(ក្រចេះ)៖ នៅក្នុងរយៈពេល១ឆ្នាំ នៃឆ្នាំ២០២៥ រដ្ឋបាលខេត្តក្រចេះ បានបំពេញតួនាទី ភារកិច្ច បម្រើប្រជាពលរដ្ឋ ស្របទៅតាមយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ដឹកនាំដោយសម្តេចបវរធិបតី ហ៊ុន ម៉ាណែត បន្តវេនពីសម្តេចតេជោ ហ៊ុន សែន អតីតនាយករដ្ឋមន្ត្រី។
ជាក់ស្តែងនៅថ្ងៃទី២២ ខែមករា ឆ្នាំ២០២៦នេះ រដ្ឋបបាលខេត្តក្រចេះ បានរៀបចំពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ ក្រោមអធិបតីភាពលោក នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ។
តាមលោក វ៉ា ថន អភិបាលខេត្តក្រចេះ បានឱ្យដឹងថា លទ្ធផលការងារដែលរដ្ឋបាលខេត្តខិតខំប្រឹងប្រែងសម្រេចបានជាច្រើននៅក្នុងឆ្នាំ២០២៥ ដោយកំណត់នូវទិសដៅការងារបន្តឆ្នាំ២០២៦ និងការចូលរួមអនុវត្តតាមយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល ដែលមានដូចខាងក្រោម៖
ទី១៖ វឌ្ឍនភាពនៃការអនុវត្តគោលនយោបាយ «ភូមិ ឃុំ-សង្កាត់ មានសុវត្ថិភាព» សភាពការណ៍សន្តិសុខសណ្ដាប់ធ្នាប់សង្គម និងសន្តិសុខនយោបាយនៅក្នុងខេត្ត មានស្ថានភាពល្អប្រសើរ ទោះបីជារងនូវផលប៉ះពាល់ពីសង្រ្គាមឈ្លានពានរបស់កងទ័ពថៃយ៉ាងណាក៏ដោយ ក៏សន្តិសុខផ្ទៃក្នុងរបស់ខេត្ត ធានាបានយ៉ាងរឹងមាំក្រោមការដឹកនាំរបស់គណៈបញ្ជាការឯកភាពរដ្ឋបាលខេត្ត។ កិច្ចសហប្រតិបត្តិការជាមួយខេត្តជាប់ព្រំដែនប្រទេសវៀតណាម (ខេត្តដុងណាយ) រក្សាបាននូវចំណងមិត្តភាព សាមគ្គីភាព និងការជំរុញកិច្ចសហប្រតិបត្តិការលើគ្រប់វិស័យ ព្រមទាំងសហការយ៉ាងជិតស្និទ្ធក្នុងការបង្ការ ទប់ស្កាត់ និងបង្រ្កាបរាល់បទល្មើសនានានៅតាមបន្ទាត់ព្រំដែនដោយត្រួតពិនិត្យយ៉ាងម៉ត់ចត់ទប់ស្កាត់នូវជំងឺឆ្លងគ្រប់ប្រភេទ ចូលក្នុងខេត្ត។
ការអនុគោលនយោបាយ «ភូមិ-ឃុំ-សង្កាត់មានសុវត្ថិភាព» ក្នុងឆ្នាំ២០២៥ បានផ្សព្វផ្សាយខ្លឹមសារផែនការណែនាំ និងលក្ខណៈសម្បតិ្តទាំង ៧យ៉ាង នៃគោលនយោបាយ «ភូមិ-ឃុំ-សង្កាត់មានសុវត្ថិភាព» ចំនួន ៩.៤៤៣លើក អ្នកចូលរួមសរុប ១៧១.៦៧៥នាក់ ស្រី ៨៥.៨៣៩នាក់។ ការបង្រ្កាបបទល្មើសមានការថយចុះ ក្នុងនោះបទល្មើសព្រហ្មទណ្ឌបង្រ្កាបបានចំនួន ៤៤លើក និងបទល្មើសគ្រឿងញៀនចំនួន ១៤៣លើក ល្បែងស៊ីសងខុសច្បាប់ចំនួន ៤៦លើក ការបង្រ្កាបក្មេងទំនើងបានចំនួន ៣៨លើក។ គ្រោះថ្នាក់ចរាចរណ៍កើតឡើងចំនួន ៩៥លើក។ បទល្មើសឆបោកតាមប្រព័ន្ធអនឡាញ (ONLINE SCAMS) បង្រ្កាបបានចំនួន ១លើក ឃាត់ខ្លួនជនបរទេសសរុបចំនួន ៣១១នាក់ ស្រី ៦១នាក់ ស្មើនឹង ៧សញ្ជាតិ។
ការផ្ដល់សេវាសាធារណៈ និងសេវារដ្ឋបាលជូនប្រជាពលរដ្ឋកាន់តែមានភាពឆាប់រហ័ស និងមានប្រសិទ្ធភាព រីឯការដោះស្រាយសំណើ សំណូមពរ និងបញ្ហាប្រឈមនានានៅតាមមូលដ្ឋាន ត្រូវបានយកចិត្តទុកដាក់ ដោះស្រាយតាមរយៈការចុះធ្វើវេទិកាសាធារណៈនៅតាមមូលដ្ឋានដែលរៀបចំឡើងដោយរដ្ឋបាលថ្នាក់ក្រោមជាតិ និងក្រុមការងាររាជរដ្ឋាភិបាលចុះមូលដ្ឋាន។
ជាមួយនឹងលទ្ធផលដែលសម្រេចបានក្ដី ក៏នៅមានបញ្ហាប្រឈមសេសសល់មួយចំនួន ដែលស្នើឱ្យអាជ្ញាធរ សមត្ថកិច្ចពាក់ព័ន្ធ និងផ្នែកជំនាញខិតខំរួមគ្នាដោះស្រាយរួមមាន៖ បញ្ហាគ្រឿងញៀន គ្រោះថ្នាក់ចរាចរណ៍ លួច ក្មេងទំនើង គ្រោះថ្នាក់អគ្គីភ័យ ល្បែងស៊ីសងខុសច្បាប់ បទល្មើសឆបោកតាមប្រព័ន្ធអនឡាញ (ONLINE SCAMS) ការជួញដួរមនុស្សជាដើម។ ទន្ទឹមនេះសម្ភារបច្ចេកទេសសម្រាប់បម្រើឱ្យប្រតិបត្តិការនៅមិនទាន់មានគ្រប់គ្រាន់ និងកង្វះខ្វះខាតមន្រ្តីមានជំនាញបច្ចេកទេស។ អាជ្ញាធរខិតខំជម្រុញពង្រឹងការអនុវត្តគោលនយោបាយ «ភូមិ ឃុំ-សង្កាត់មានសុវត្ថិភាព» ឱ្យកាន់តែមានប្រសិទ្ធភាព និងសំណូមពរដល់ក្រសួង-ស្ថាប័នពាក់ព័ន្ធជួយគាំទ្របណ្ដុះបណ្ដាលបំពាក់បំប៉នសមត្ថភាព ចំណេះដឹង បច្ចេកទេសបន្ថែមដល់កម្លាំងសមត្ថកិច្ចជំនាញ និងការផ្ដល់នូវមធ្យោបាយ ឧករណ៍សម្ភារចាំបាច់នានាសំដៅកាត់បន្ថយ និងឈានទៅលុបបំបាត់ទាំងស្រុងនូវបទល្មើសនៅទូទាំងខេត្ត។ បានប្ដេជ្ញាយ៉ាងមុតមាំ ក្នុងការទប់ស្កាត់ និងបង្រ្កាបល្បែងស៊ីសងខុសច្បាប់ ល្បែងអនឡាញ និងបទល្មើសឆបោកតាមប្រព័ន្ធអនឡាញ (ONLINE SCAMS) គ្រប់ទម្រង់ដើម្បីលុបបំបាត់មិនឱ្យមាននៅក្នុងខេត្ត។
ទី២៖ ការពង្រឹងគុណភាពសេវាសុខាភិបាល ក្រោមការដាក់ចេញនូវកម្មវិធីកំណែទម្រង់របស់រាជរដ្ឋាភិបាល និងការយកចិត្តទុកដាក់របស់រដ្ឋបាលខេត្ត បានបង្កើននូវទំនុកចិត្ត និងដោះស្រាយនូវរាល់ការលំបាករបស់ប្រជាពលរដ្ឋដែលមកទទួលសេវា ត្រូវបានកាត់បន្ថយដូចជា ពេលវេលា ការចំណាយថវិកា ការយកចិត្តទុកដាក់ពិនិត្យ ថែទាំអ្នកជំងឺ និងការចេញថ្លៃសេវាព្យាបាលជំនួសពីរាជរដ្ឋាភិបាល តាមរយៈប័ណ្ណមូលនិធិសមធម៌ រួមជាមួយនឹងការឧបត្ថម្ភសាច់ប្រាក់ជូនស្រ្តីក្រីក្រមានផ្ទៃពោះ និងកុមារអាយុក្រោម២ឆ្នាំ។ ជាលទ្ធផលក្នុងឆ្នាំ២០២៥នេះ អ្នកជំងឺចូលសម្រាកមន្ទីរពេទ្យមានចំនួន ៤១.៧១៩នាក់ និងអ្នកជំងឺមកពិគ្រោះចំនួន ២១៨.០៦៩នាក់ ព្រមទាំងការផ្ដល់សេវាសុខាភិបាលផ្សេងៗទៀតកាន់តែល្អប្រសើរឡើង ដោយទទួលបានការសាទរ និងគាំទ្រពីប្រជាពលរដ្ឋ។
ទី៣៖ ការពង្រឹងការអនុវត្តមុខងារអប់រំ នៃរដ្ឋបាលក្រុង ស្រុក រាជរដ្ឋាភិបាលបានធ្វើការកែទម្រង់ស៊ីជម្រៅ និងជាប្រវត្តិសាស្ត្រតាមរយៈការផ្ទេរមុខងារ និងធនធានដល់រដ្ឋបាលថ្នាក់ក្រោមជាតិជាពិសេសរដ្ឋបាលក្រុង ស្រុក ដែលជារដ្ឋបាលមូលដ្ឋានក្នុងការបង្ខិតការធ្វើសេចក្តីសម្រេចចិត្តក្នុងការដឹកនាំគ្រប់គ្រងការចាត់ចែង និងការផ្តល់សេវាសាធារណៈ និងសេវារដ្ឋបាលឱ្យទៅកៀកជិតនឹងប្រជាពលរដ្ឋ ដើម្បីឱ្យរដ្ឋបាលក្រុង ស្រុក ក្លាយជារដ្ឋបាលមូលដ្ឋានស្របតាមគោលការណ៍នៃរដ្ឋបាលឯកភាព និងមានសមត្ថភាពសមស្របក្នុងការផ្តល់សេវាសាធារណៈ និងការអភិវឌ្ឍមូលដ្ឋានតាមតម្រូវការរបស់ប្រជាពលរដ្ឋ។
ទី៤៖ ការងារគ្រប់គ្រងតំបន់ការពារ អភិរក្សធនធានធម្មជាតិ និងបរិស្ថាន ខេត្តមានតំបន់ការពារធម្មជាតិចំនួន ៦កន្លែងរួមមាន៖ ដែនជម្រកសត្វព្រៃ ព្រៃឡង់ ដែនជម្រកសត្វព្រៃកែវសីមា ដែនជម្រកសត្វព្រៃ ព្រែកប្រសព្វ ដែនជម្រក សត្វព្រៃសំបូរ តំបន់ប្រើប្រាស់ច្រើនយ៉ាងសរសរស្តម្ភសត្វតោ និងដែនជម្រកសត្វព្រៃលំផាត់ ដែលមានផ្ទៃដីចំនួន២៨៣.១៨០ហិកតា។
វិស័យទេសចរណ៍ បានចូលរួមអភិវឌ្ឍន៍សេដ្ឋកិច្ចខេត្ត និងចូលរួមដោយផ្ទាល់ ដល់ប្រជាពលរដ្ឋដែលរស់នៅតាមសហគមន៍ទេសចរណ៍ តំបន់រមណីយដ្ឋានទេសចរណ៍ តាមរយៈការផ្តល់ឱកាសការងារ និងមុខរបរ។ អាស្រ័យដោយសក្ដានុពល និងធនធានធម្មជាតិ វប្បធម៌ ប្រវត្តិសាស្រ្ត និងសត្វផ្សោតទឹកសាបទន្លេមេគង្គដែលជាថនិកសត្វដ៏កម្រ ដែលត្រូវបានអភិរក្សយ៉ាងម៉ឺងម៉ាត់ ហើយកែច្នៃទៅជាតំបន់រមណីយដ្ឋាន មានភាពទាក់ទាញភ្ញៀវទេសចរណ៍ជាតិ និងអន្តរជាតិ។ ជាក់ស្តែង នៅក្នុងឆ្នាំ២០២៥ ភ្ញៀវមកលេងកម្សាន្តក្នុងខេត្តក្រចេះ សរុបរួមទាំងភ្ញៀវជាតិ និងអន្តរជាតិមានចំនួន ៥១២.៨២៣នាក់។
ទី៥៖ ប្រសិទ្ធភាពនៃការអនុវត្តគម្រោងមូលនិធិក្រុង-ស្រុក និងឃុំ-សង្កាត់ គោលនយោបាយវិមជ្ឈការ និងវិសហមជ្ឈការ គឺជាយុទ្ធសាស្ត្រកំណែទម្រង់រដ្ឋបាលថ្នាក់ ក្រោមជាតិដែលរាជរដ្ឋាភិបាលកម្ពុជា បានផ្ទេរអំណាចមុខងារ និងធនធានពីថ្នាក់ជាតិទៅថ្នាក់ក្រោមជាតិ (ខេត្ត-ក្រុង-ស្រុក ឃុំ-សង្កាត់) ដើម្បីពង្រឹងការចូលរួមការទទួលខុសត្រូវ និងប្រសិទ្ធភាពក្នុងការផ្តល់សេវាសាធារណៈ តាមរយៈការលើកកម្ពស់ស្វ័យភាព តម្លាភាព និងការអភិវឌ្ឍន៍នៅមូលដ្ឋាន។ការអនុវត្តគម្រោងប្រចាំឆ្នាំ ទាំងគម្រោងហេដ្ឋារចនាសម្ព័ន្ធរូបវ័ន្ត និងគម្រោងសេវាសង្គម ត្រូវបានអនុវត្តត្រឹមត្រូវតាមគោលការណ៍ណែនាំ និងបែបបទ នីតិវិធី ដែលបានកំណត់ជាធរមាន ជាពិសេសការធ្វើលទ្ធកម្មសាធារណៈ និងការអនុវត្តគម្រោង ធានានូវគុណភាព ប្រសិទ្ធភាព និងឆ្លើយតបនឹងតម្រូវការ ពិតប្រាកដរបស់ប្រជាពលរដ្ឋនៅមូលដ្ឋាន។
ទី៦៖ ការរៀបចំប្លង់គោលប្រើប្រាស់ដីថ្នាក់ក្រុង-ស្រុក និងការគ្រប់គ្រងសណ្តាប់ធ្នាប់សំណង់ និងដីចំណីផ្លូវ ការងាររៀបចំដែនដី និងគ្រប់គ្រងការអភិវឌ្ឍក្រុង សម្រចបានការរៀបចំប្លង់គោលប្រើប្រាស់ដីក្រុងក្រចេះ ដោយបានអនុវត្តចប់ និងរង់ចាំការសម្រចពីថ្នាក់ជាតិ ព្រមទាំងផែនការរៀបចំដែនដីខេត្តរង់ចាំការអនុម័ត និងឃុំ សង្កាត់ចំនួន១១ កំពុងបន្តអនុវត្ត។ ត្រួតពិនិត្យ និងទប់ស្កាត់ការដ្ឋានសាងសង់គ្មានលិខិតអនុញ្ញាតចំនួន ២៥ការដ្ឋាន និងអនុញ្ញាតឱ្យសាងសង់ចំនួន ១៦គម្រោងឡើងវិញ៕
