(ភ្នំពេញ)៖ លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក CMAC បានបញ្ជាក់ឱ្យដឹងថា ក្នុងគោលដៅបង្កើនសុវត្ថិភាព ក្នុងកិច្ចប្រតិបតិ្តការបោសសម្អាតគ្រាប់បែកចង្កោម ជាសំណល់យុទ្ធភណ្ឌសង្គ្រាមសៀមឈ្លានពាន​ អង្គភាព CMAC បានស្រាវជ្រាវអភិវឌ្ឍន៍ និងប្រើប្រាស់បច្ចេកទេសបោសសម្អាតដោយបូកបន្ថែម ក្នុងការប្រើប្រាស់ប្រពន្ធ័មេដែកស្រូប​បំពាក់ជាមួយគ្រឿងចក្រ​ និងប្រពន្ធ័ការពារសុវត្ថិភាពអ្នកបើកបរផងដែរ។

សូមជម្រាបថា កម្លាំងជំនាញរបស់អង្គភាព CMAC កំពុងមមាញឹកសម្រុកបោសសម្អាតសំណល់យុទ្ធភណ្ឌ ពិសេសគ្រាប់បែកចង្កោមនៃសង្គ្រាមឈ្លានពានរបស់ថៃ នៅតាមបណ្តាខេត្តដែលរងផលប៉ះពាល់។

អង្គភាព CMAC ជារឿងៗ តែងតែអំពាវនាវដល់បងប្អូនប្រជាពលរដ្ឋ ជាជនភៀសសឹក ដែលវិលត្រឡប់ទៅកាន់លំនៅឋានវិញ សូមប្រុងប្រយ័ត្នខ្ពស់ ចំពោះគ្រាប់សំណល់សង្គ្រាមរបស់កងទ័ពថៃ ពិសេសគ្រាប់បែកចង្កោម ដែលត្រូវបានអន្តរជាតិហាមឃាត់។

សូមបញ្ជាក់ថា​ ច្បាប់អន្តរជាតិហាមប្រើប្រាស់គ្រាប់បែកចង្កោម បានចូលជាធរមាន​នៅឆ្នាំ២០១០ និងមានប្រទេសចំនួន១២៣ ចូលរួម​ក្នុងអនុសញ្ញាអន្តរជាតិមួយនេះ៕