(តាកែវ)៖ លោក វ៉ី សំណាង អភិបាលខេត្តតាកែវ បានថ្លែងដាស់តឿនមន្រ្តីរាជការក្នុងខេត្តតាកែវទាំងអស់ថា ធ្វើជាមន្ត្រីរាជការ គោលបំណងសំខាន់គឺបម្រើប្រទេសជាតិ និងប្រជាជន មិនមែនយកតំណែងមន្ត្រីរាជការ មកធ្វើជាអ្នកមានបាននោះទេ។

ថ្លែងនៅចំពោះមុខមន្រ្តីរាជការនៅក្នុងកិច្ចប្រជុំបូកសរុបការងារសកម្មភាពប្រចាំឆ្នាំ២០២៥ និងលើកទិសដៅបន្តឆ្នាំ២០២៦រ បស់សាខាកាកបាទក្រហមខេត្តតាកែវ នៅថ្ងៃទី២២ ខែមករា ឆ្នាំ២០២៦ លោក វ៉ី សំណាង បានថ្លែងដូចនេះថា «ក្នុងនាមជាមន្រ្តីរាជការគោលបំណងសំខាន់បំផុត គឺបម្រើប្រទេសជាតិ និងបងប្អូនប្រជាពលរដ្ឋ ពោលមិនត្រូវយកកន្លែងរាជការធ្វើជារបរកស៊ីក្លាយអ្នកមានបាននោះទេ»។

លោក វ៉ី សំណាង បានលើកសុភាសិតចិនមួយដែលនិយាយថា «បើចង់ធ្វើជាអ្នកមាន កុំមកធ្វើជាមន្រ្តី ព្រោះបើដាក់ខ្លួនជាមន្រ្តី គឺអ្នកក្រហើយ»។

បើតាមលោកអភិបាលខេត្តតាកែវ ការធ្វើជាមន្រ្តីរាជការ វាមិនក្រដល់ថ្នាក់ដើរសុំទាននោះទេ វាគ្រាន់តែបានមួយរស់អាចទ្រទ្រង់ជីវភាពប្រចាំថ្ងៃបានតែប៉ុណ្ណោះ ក៏ប៉ុន្តែវាមិនអាចក្លាយជាឧកញ៉ានោះទេ៕