(ព្រៃវែង)៖ ថ្លែងក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់រដ្ឋបាលខេត្តព្រៃវែង នៅព្រឹកថ្ងៃទី២៣ ខែមករា ឆ្នាំ២០២៦ លោក សួន សុម៉ាលីន អភិបាលខេត្តព្រៃវែង បានបញ្ជាក់ថា ក្នុងឆ្នាំ២០២៥ ខេត្តព្រៃវែង បានទទួលគម្រោងវិនិយោគចំនួន៤គម្រោង ដែលមានទុនវិនិយោគប្រមាណ៣៩លានដុល្លារ។

លោក សួន សុម៉ាលីន បានបញ្ជាក់ទៀតថា ការងារវិនិយោគ និងការអភិវឌ្ឍន៍ខេត្ត ដោយសារមានការចង្អុលណែនាំ និងការយកចិត្តទុកដាក់ខ្ពស់របស់លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្ត ព្រមទាំងក្រុមការងាររាជរដ្ឋាភិបាលចុះមូលដ្ឋានក្រុង ស្រុក ឃុំ សង្កាត់ និងព្រមទាំងថ្នាក់ដឹកនាំខេត្ត បានខិតខំកៀរគរអ្នកវិនិយោគជាច្រើន មកបណ្តាក់ទុនរកស៊ីនៅខេត្តព្រៃវែង។

លោកអភិបាលខេត្ត បានបន្តថា គម្រោងវិនិយោគចំនួន៤គម្រោងនោះរួមមាន៖

*គម្រោងផែស្ងួត ក្នុងស្រុកកំចាយមារ ដែលមានទុនវិនិយោគប្រមាណ ២០លានដុល្លារ អាចផ្តល់កម្លាំងពលកម្ម២៥០នាក់
*គម្រោងរោងចក្រតម្បាញ ក្នុងស្រុកពារាំង ដែលមានទុនវិនិយោគប្រមាណ ៦លានដុល្លារ អាចផ្តល់កម្លាំងពលកម្មពី ១.០០០នាក់ ទៅ ៣.០០០នាក់
*រោងចក្រផលិតដើមគ្រិស្តម៉ាស ចំនួន ២គម្រោង ក្នុងស្រុកកំពង់ត្របែក ដែលមានទុនវិនិយោគប្រមាណ ១២លានដុល្លារ អាចផ្តល់កម្លាំងពលកម្ម ៦០០នាក់។

លោកបានបន្ថែមថា ដើម្បីកែលម្អសោភណ្ឌភាព ភាពស្រស់ស្អាត ទាក់ទាញភ្ញៀវទេសចរមកលេងកំសាន្ត និងសម្រាកលំហែរក្នុងខេត្តព្រៃវែង ក៏ដូចជាសម្រួលដល់ជីវភាពរស់នៅរបស់ប្រជាពលរដ្ឋ ថ្នាក់ដឹកនាំខេត្ត និងអង្គភាព ពាក់ព័ន្ធ បានខិតខំអភិវឌ្ឍន៍ខេត្ត ដោយបានកសាងនូវហេដ្ឋារចនាសម្ព័ន្ធនានាជាច្រើន ក្នុងនោះរដ្ឋបាលខេត្តបានស្ថាបនាសួនច្បារតេជោសន្តិភាព, ស្ថាបនាផ្លូវភ្លោះមុខសាលាខេត្ត, ជួសជុលស្ថាបនាផ្លូវបេតុងក្នុងក្រុងព្រៃវែង, ស្ថាបនាផ្លូវបេតុងក្នុងស្រុកពោធិ៍រៀង, ស្ថាបនាផ្លូវខេត្តលេខ៣១២, រៀបចំប្រព័ន្ធអគ្គិសនីបំភ្លឺផ្លូវសាធារណៈតាមទីប្រជុំជន និងផ្លូវសំខាន់ៗ, ការរៀបចំតំបន់កំសាន្តបាញ់ទឹកតាមចង្វាក់ភ្លេង ក្រុងព្រៃវែង និងការស្តារបឹងបារាយណ៍ ព្រមទាំងសាងសង់ហេដ្ឋារចនាសម្ព័ន្ធនានា សំដៅលើកកម្ពស់សោភណ្ឌភាពក្រុង ពង្រីកទីប្រជុំជន សាងសង់សួនសាធារណ:ដ៏ធំមួយក្នុងក្រុង ដើម្បីផ្តល់នូវកន្លែងលំហែកម្សាន្តដល់សាធារណជន និងជាការគិតគូរដល់សុខភាព បង្កើននូវ គុណតម្លៃជីវិត និងការផ្គត់ផ្គង់ទឹកសម្រាប់ប្រើប្រាស់ជាប្រយោជន៍បច្ចុប្បន្ន និងអនាគតផងដែរ៕