(ព្រះសីហនុ)៖ ទីលានចាក់សំរាមបង្កើតឡើងជាផ្លូវការនៅឆ្នាំ២០២១ លើផ្ទៃដីជាង៦៥ហិចតា ស្ថិតក្នុងសង្កាត់អូរឧញ្ញ៉ាហេង ក្រុងកំពង់សោម ខេត្តព្រះសីហនុ បច្ចុប្បន្នសំរាមដែលយកមកចាក់នៅទីលាន រួមមាន មកពីក្រុងព្រះសីហនុ ក្រុងកំពង់សោម ស្រុកព្រៃបន់ និងបណ្ដាក្រុមហ៊ុនមួយចំនួនទៀត។

នេះបើតាមការលើកឡើងពីលោក ហ៊ិប សុខាន់ណារ៉ូ នាយកទីលានទុកដាក់សំរាមខេត្តព្រះសីហនុ ក្នុងកិច្ចសម្ភាសជាមួយភ្នាក់ងារ Fresh News ប្រចាំខេត្តកាលពីពេលថ្មីៗនៅទីលានចាក់សំរាម។

លោក ហ៊ិប សុខាន់ណារ៉ូ បានបន្ថែមថា បញ្ហាប្រឈមដោយសារការកកស្ទះសំរាមនៅឆ្នាំ២០២៥ កន្លងមកដោយសារទីតាំងចាក់សម្រាមជួបបញ្ហាផ្លូវរអិលរថយន្តឡើងចាក់មិនរួច ដោយសារបញ្ហាអាកាសធាតុភ្លៀងធ្លាក់ខ្លាំង ជាពិសេសនៅរដូវវស្សា។

ចំពោះការសិក្សាវាយតម្លៃ ការរៀបចំទីលានកន្លងទៅ អាចទុកសំរាមបានក្នុងបរិមាណរង្វង់ជាង៣រយតោនក្នុងមួយថ្ងៃ និងសម្រាប់ប្រើប្រាស់រយៈពេល៥ឆ្នាំ ក៏ប៉ុន្តែដោយកំណើនសំរាមមានការកើនឡើងច្រើនជាបន្តបន្ទាប់ រហូតដល់ជាង៨រយតោន និងឈានដល់ជាង១ពាន់តោន ក្នុងមួយថ្ងៃៗ ដែលធ្វើឲ្យទីលានជួបបញ្ហា។

លោកបានបញ្ជាក់ថា ចំពោះមុខក្នុងឆ្នាំ២០២៦ នេះដោយមានការយកចិត្តទុកដាក់ពីលោក ម៉ាង ស៊ីណេត អភិបាលខេត្តព្រះសីហនុ បានរៀបចំទីលានចាក់សំរាមបណ្ដោះអាសន្នបន្ថែម ដើម្បីឆ្លើយតបទៅនឹងកំណើន នៃកាកសំណល់សំរាម ហើយនៅឆ្នាំ២០២៧-២០២៨ខាងមុខក្រសួងបរិស្ថាន ចុះសិក្សារៀបចំទីលានចាក់សំរាមថ្មី ដែលមានស្តង់ដា និងបង្កភាពងាយស្រួល ក្នុងការរៀបចំទុកដាក់សំរាមឲ្យបានត្រឹមត្រូវផងដែរ៕