(កែប)៖​ លោក សន ប៊ុនហួរ រដ្ឋលេខាធិការក្រសួងធម្មការនិងសាសនា បានលេីកឡេីងថា ការលើកស្ទួយវិស័យព្រះពុទ្ធសាសនា ទាមទារឲ្យមានការចូលរួមចំណែកពីវិស័យពាក់ព័ន្ធ និងពុទ្ធសាសនិក ជាពិសេសគឺព្រះសង្ឃផ្ទាល់ ដែលជាតួរអង្គប្រតិបត្តិនូវធម៌វិន័យ ពង្រឹងវិស័យសាសនាឲ្យកាន់តែរីកចម្រើនបន្ថែមទៀត។

លោក សន ប៊ុនហួរ បានថ្លែងបែបនេះ ក្នុងឱកាសលោក និងលោកបណ្ឌិត សោម ពិសិដ្ឋ អភិបាលខេត្តកែប បានចូលរួមជាគណៈអធិបតី ក្នុងពិធីបិទអនុសំវច្ឆរៈមហាសន្និបាតមន្ត្រីសង្ឃទូទាំងខេត្តកែប នារសៀលថ្ងៃទី២៣ ខែមករា ឆ្នាំ២០២៦ នៅសាលប្រជុំសាលាខេត្តកែប ដោយមានការនិមន្ត និងអញ្ជើញចូលរួមពីព្រះមេគណខេត្តទាំងពីរគណៈ ព្រះថេរានុត្ថេរៈ​ លោក លោកស្រី អភិបាលរងខេត្ត ប្រធានមន្ទីរអង្គភាពជុំវិញខេត្ត​ អភិបាល​ក្រុង​ស្រុក​ មេឃុំ ចៅសង្កាត់ តាជី យាយជី សរុប ៣១៤ អង្គ/នាក់។

បើតាម មន្ត្រីជាន់ខ្ពស់ក្រសួងធម្មការ ការលើកស្ទួយវិស័យព្រះពុទ្ធសាសនា រួចចំណែកកសាងប្រទសកម្ពុជា ឲ្យក្លាយទៅជាសង្គមមួយដែលមានសន្តិភាព និងគ្មានអំពើហិង្សា។

លោកបណ្ឌិត សោម ពិសិដ្ឋ បានលើកឡើងថា រដ្ឋបាលខេត្តកែប បានយកចិត្តទុកដាក់ខ្ពស់បំផុត ក្នុងវិស័យព្រះពុទ្ធសាសនា ដែលជាសាសនារបស់រដ្ឋ បាននិងកំពុងមានភារកិច្ចរួមចំណែកយ៉ាងសកម្ម ក្នុងការអភិវឌ្ឍប្រទេសជាតិ បណ្តុះបណ្តាលធនធានមនុស្ស អប់រំផ្នែកបញ្ញាស្មារតីចំណេះដឹង អប់រំសីលធម៌ គុណធម៌ និងសុជីវធម៌ ដល់ប្រជាពលរដ្ឋគ្រប់ស្រទាប់វណ្ណៈក្នុងសង្គមជាតិទាំងមូល។

លោកអភិបាលខេត្ត បន្តថា​ រដ្ឋបាលខេត្តកែប និងបន្តខិតខំលើកស្ទួយវិស័យព្រះពុទ្ធសាសនា ឲ្យកាន់តែមានឥទ្ធិពល កាន់តែជ្រៅក្នុងក្រអៅបេះដូងប្រជាជនខ្មែរគ្រប់ៗរូប និងស្ថិតស្ថេរគង់វង្សជាអមតៈ ស្របតាមបាវចនា ជាតិ សាសនា ព្រះមហាក្សត្រ។

គួរជម្រាបថា អនុសំវច្ឆរៈមហាសន្និបាតមន្ត្រីសង្ឃទូទាំងប្រទេសលើកទី៣៣ បានដាក់ចេញនូវខ្លឹមសារសំខាន់ៗ ក្នុងគោលបំណង ចូលរួមចំណែកសម្រាលទុក្ខលំបាករបស់សង្គម ចែករំលែកលើការងារមនុស្សធម៌ ក្នុងការចុះសួរសុខទុក្ខប្រជាពលរដ្ឋភៀសសឹក វីរកងទ័ព និងវីរនគរបាលជាតិ ដែលមានស្មារតីលះបង់ខ្ពស់ក្នុងការការពារជាតិ ដែនអធិបតេយ្យភាព និងបូរណភាពទឹកដី​ ប្រជាជន និងព្រះមហាក្សត្រ៕