(ភ្នំពេញ)៖ ស្ថានទូតឥណ្ឌាប្រចាំកម្ពុជា បានរៀបចំពិធីបញ្ជូនមន្ត្រីកម្ពុជា ពីក្រសួងផែនការ និងក្រសួងមហាផ្ទៃចំនួន ៤០រូប ទៅចូលវគ្គបណ្តុះបណ្តាលតាមតម្រូវការនៅប្រទេសឥណ្ឌា ដែលមន្ត្រីចំនួន ២០រូប មកពីក្រសួងមហាផ្ទៃ នឹងចូលរួមវគ្គសិក្សា «ការស៊ើបអង្កេតឧក្រិដ្ឋកម្មតាមអ៊ីនធឺណិត និងការធ្វើកោសល្យវិច្ច័យតាមអ៉ីនធឺណិត» ហើយមន្ត្រីចំនួន ២០រូប មកពីក្រសួងផែនការ នឹងចូលរួមវគ្គសិក្សា «ស្ថិតិថ្នាក់ក្រោមជាតិដោយប្រើប្រាស់ទិន្នន័យរដ្ឋបាល»។

គួរបញ្ជាក់ដែរថា មន្ត្រីចំនួន ២០រូប មកពីក្រសួងមហាផ្ទៃ នឹងចូលរួមវគ្គសិក្សា «ការស៊ើបអង្កេតឧក្រិដ្ឋកម្មតាមអ៊ីនធឺណិត និងការធ្វើកោសល្យវិច្ច័យតាមអ៉ីនធឺណិត» ចាប់ពីថ្ងៃទី ២៨ ខែមករា ដល់ថ្ងៃទី ៣ ខែកុម្ភៈ ឆ្នាំ ២០២៦។កម្មវិធីនេះមានគោលបំណងបំពាក់មន្ត្រីកម្ពុជានូវជំនាញសំខាន់ៗ ដើម្បីអាចរកឃើញ ស៊ើបអង្កេត និងទប់ស្កាត់ឧក្រិដ្ឋកម្មតាមអ៉ិនធឺណិត បានយ៉ាងមានប្រសិទ្ធភាព។

មន្ត្រីចំនួន ២០រូប មកពីក្រសួងផែនការ នឹងចូលរួមវគ្គសិក្សា «ស្ថិតិថ្នាក់ក្រោមជាតិដោយប្រើប្រាស់ទិន្នន័យរដ្ឋបាល» ចាប់ពីថ្ងៃទី២៧ ខែមករា ដល់ថ្ងៃទី៧ ខែកុម្ភៈ ឆ្នាំ២០២៦។ ការបណ្តុះបណ្តាលនេះត្រូវបានរៀបចំឡើង ដើម្បីបង្កើនសមត្ថភាពមន្ត្រីរាជរដ្ឋាភិបាលកម្ពុជា ក្នុងការប្រើប្រាស់ទិន្នន័យរដ្ឋបាលប្រកបដោយប្រសិទ្ធភាព ដើម្បីបង្កើតស្ថិតិថ្នាក់ក្រោមជាតិដែលអាចទុកចិត្តបាន ទាន់ពេលវេលា និងពាក់ព័ន្ធនឹងគោលនយោបាយ។

ពិធីរៀបចំបញ្ជូនមន្ត្រីកម្ពុជាចំនួន ៤០រូប ទៅចូលវគ្គបណ្តុះបណ្តាលតាមតម្រូវការនៅប្រទេសឥណ្ឌា បានធ្វើឡើងនៅថ្ងៃទី២៣ ខែមករា ឆ្នាំ២០២៦ ឡើងនៅ India House ក្រោមវត្តមានលោកទេសរដ្ឋមន្ត្រី ឆាយ ស៊ីណារិទ្ធ ប្រធានមជ្ឈមណ្ឌលបច្ចេកវិទ្យាព័ត៌មានជាតិ និងលោក Vanlalvawna Bawitlung ឯកអគ្គរដ្ឋទូតឥណ្ឌាប្រចាំព្រះរាជាណាចក្រកម្ពុជា។

នាឱកាសនោះលោកទេសរដ្ឋមន្ត្រី ឆាយ ស៊ីណារិទ្ធ ក៏បានសម្តែងការដឹងគុណចំពោះរដ្ឋាភិបាលឥណ្ឌា ចំពោះការប្តេជ្ញាចិត្តក្នុងការពង្រឹងសមត្ថភាពបច្ចេកវិទ្យារបស់កម្ពុជា។

ស្របជាមួយនោះ លោក Vanlalvawna Bawitlung បានគូសបញ្ជាក់ពីសារៈសំខាន់នៃកិច្ចសហប្រតិបត្តិការអន្តរជាតិ និងការចែករំលែកចំណេះដឹង ក្នុងការពង្រឹងសមត្ថភាពមន្ត្រីរដ្ឋាភិបាលផងដែរ។

សូមបញ្ជាដែរថា នាថ្មីៗនេះគំនិតផ្តួចផ្តើមបណ្តុះបណ្តាលជាច្រើនដែលបានចូលរួមដោយមន្ត្រីមកពីក្រសួងនានានៅក្នុងប្រទេសកម្ពុជា។ ក្នុងនោះក្រុមមន្ត្រីចំនួន ២០នាក់មកពីអាជ្ញាធរជាតិប្រយុទ្ធប្រឆាំងគ្រឿងញៀន (NACD) បានបញ្ចប់វគ្គសិក្សាស្តីពីការប្រយុទ្ធប្រឆាំងការជួញដូរគ្រឿងញៀនខុសច្បាប់ នៅបណ្ឌិតសភាជាតិស្តីពីពន្ធគយ និងគ្រឿងញៀន Palasamudram ប្រទេសឥណ្ឌា ដោយជោគជ័យ។

លើសពីនេះ កន្លែងចំនួន ៤០ត្រូវបានបែងចែកដល់មន្ត្រីមកពីក្រសួងផ្សេងៗ ក្រោមការសម្របសម្រួលរបស់ក្រសួងមុខងារសាធារណៈ សម្រាប់វគ្គសិក្សាទូលំទូលាយស្តីពីអភិបាលកិច្ចល្អ និងគោលនយោបាយសាធារណៈ ដែលត្រូវបានបញ្ចប់រួចហើយ ខណៈដែលមន្ត្រីចំនួន ៤០នាក់ផ្សេងទៀតនៅតែកំពុងបណ្តុះបណ្តាលនៅប្រទេសឥណ្ឌា។ លើសពីនេះមន្ត្រីចំនួន ២០នាក់មកពីក្រសួងយុត្តិធម៌ កំពុងចូលរួមវគ្គសិក្សាមួយនៅបណ្ឌិតសភាយុត្តិធម៌ជាតិនៃប្រទេសឥណ្ឌា។

ស្ថានទូតឥណ្ឌារំពឹងថា មន្ត្រីទាំងអស់នឹងបញ្ចប់វគ្គសិក្សាទាំងនេះដោយជោគជ័យ ហើយស្វាគមន៍ត្រឡប់មកវិញជាមួយនឹងចំណេះដឹង និងជំនាញថ្មីៗ ដើម្បីរួមចំណែកបន្ថែមទៀតដល់ការអភិវឌ្ឍន៍ប្រទេសកម្ពុជា៕