(សៀមរាប)៖ សមាគម BGEA សហការជាមួយក្រុមជំនុំជាង៤០០ ក្នុងខេត្តចំនួន៥ទូទាំងតំបន់រួមមាន៖ ខេត្តបន្ទាយមានជ័យ ឧត្តរមានជ័យ ព្រះវិហារ កំពុងធំ និងសៀមរាប រៀបចំព្រឹត្តិការណ៍ «មហោស្រពសៀមរាបជាទីស្រឡាញ់» រយៈពេល០២យប់ ដោយចាប់ផ្តើមពីថ្ងៃទី២៤-២៥ ខែមករា ឆ្នាំ២០២៦នេះ នៅព្រលានយន្តហោះខេត្តសៀមរាប (ចាស់) ដែលបើកឱ្យចូលរួមដោយសេរី។

មហោស្រពនេះដែរ ក៏មានការសម្តែងតន្ត្រីផ្ទាល់ពីសំណាក់សិល្បករក្នុងស្រុក និងសិល្បករអន្តរជាតិល្បីៗ ដែលធ្លាប់ឈ្នះពានរង្វាន់ ដូចជា៖ TAYA និងក្រុម The Afters ផងដែរ។

ក្នុងសន្និសីទសារព័ត៌មាន នារសៀលថ្ងៃទី២៣ ខែមករា ឆ្នាំ២០២៦ លោកគ្រូគង្វាល ហ្វ្រែងឃ្លីន ហ្គ្រាហាំ​ ប្រធាន និងជានាយកប្រតិបត្តិ នៃសមាគមផ្សព្វផ្សាយដំណឹងល្អ ប៊ីលី ហ្រ្គាម (BGEA) បានលើកឡើងថា ខេត្តសៀមរាប គឺជាគោលដៅទេសចរណ៍ល្អមួយ ដែលមានភ្ញៀវទេសចរជាច្រើនចង់មកទស្សនា មានដូចជា៖ ប្រាសាទអង្គរវត្ត ដែលជាសម្បត្តិបេតិកភណ្ឌពិភពលោក និងមានរមណីយដ្ឋានប្រវត្តិសាស្រ្ត ព្រមទាំងតំបន់អេកូទេសចរជាច្រើនទៀត។

លោកបានបន្តថា៖ «នេះគឺជាគ្រាដ៏លំបាកវេទនាសម្រាប់ប្រជាពលរដ្ឋកម្ពុជា រាល់ទុក្ខវេទនាទាំងនេះ គឺពិតជាខ្លោចផ្សាណាស់។ លោកចង់រំលឹកដល់អ្នកទាំងអស់គ្នាថា យើងនៅមានក្ដីសង្ឃឹម»។ លោកមកទីនេះ គឺដើម្បីចែករំលែកសារដែលពោរពេញដោយក្ដីសង្ឃឹមនៃព្រះគម្ពីរ និងដើម្បីអធិស្ឋានសុំ «សន្តិភាព» ផងដែរ។

លោកគ្រូ លន់ សូភី អនុប្រធានគណៈកម្មការរៀបចំមហោស្រពសៀមរាបជាទីស្រឡាញ់ ខេត្តសៀមរាប បានឱ្យដឹងថា គោលបំណងនៃព្រឹត្តិការណ៍នេះ គឺលោកគ្រូគង្វាល ហ្វ្រែងឃ្លីន ហ្គ្រាហាំ នឹងនាំមកនូវរាជសារ ឫក៏បន្ទូលព្រះ អំពីក្តីសង្ឃឹមមកកាន់បងប្អូននៅក្នុងខេត្តសៀមរាប។

លោកគ្រូក៏បានថ្លែងអំណរគុណដល់អាជ្ញាធរខេត្តសៀមរាប ដែលបានអនុញ្ញាតឱ្យយើងរៀបចំព្រឹត្តិការណ៍នេះឡើង ក៏ដូចជាអាជ្ញាធរអាកាសចរស៊ីវិល បានអនុញ្ញាតឱ្យនៅព្រលានយន្តហោះខេត្តសៀមរាប (ចាស់) សម្រាប់ប្រារព្ធនូវព្រឹត្តិការណ៍នេះ។

លោកបន្តថា សម្រាប់យើងជាគ្រឹសពុទ្ធបរិស័ទនេះជាពេលវេលាដ៏សមស្របមួយដែលបងប្អូនមឹងបានឮសូររាជសារនៃការលើកទឹកចិត្ត និងការផ្សះផ្សា ក៏ដូចជាសេចក្តីសង្ឃឹមនូវក្នុងស្ថានភាពដែលកំពុងជួបប្រទះនេះ។

លោកបន្ថែមថា ចំពោះបញ្ហាសុខសុវត្ថិភាពក្នុងដំណាក់កាល ដែលយើងគំពុងមានបញ្ហានូវតាមព្រំដែន គឺយើងមានការជឿជាក់លើរាជរដ្ឋាភិបាល នៅពេលដែលលោកបានអនុញ្ញាតឱ្យប្រារព្ធនូវពិធីនេះ លោកបានដឹងអំពីទំហំនៃសុវត្ថិភាពប៉ុណ្ណា ទើបលោកអនុញ្ញាតឱ្យប្រារព្ធនូវពិធីនេះឡើង។

លោកបញ្ជាក់ថា ព្រឹត្តិការណ៍នេះក៏ជាសារមួយទៅកាន់ភ្ញៀវទេសចរ ដែលមានគោលបំណងមកទស្សនាប្រាសាទនានា នៅក្នុងខេត្តសៀមរាប បើទោះបីជាប្រទេសកម្ពុជា មានបញ្ហាជម្លោះនៅតាមព្រំដែនកម្ពុជា-ថៃក៏ដោយ ក៏ខេត្តសៀមរាបនៅតែជាគោលទេសចរណ៍ដ៏ទាក់ទាញ និងមានសុវត្ថិភាពផងដែរ។

សូមជម្រាបថា ក្រោយពីមានការផ្ទុះជម្លោះព្រំដែនកាលពីខែមិថុនា និងខែធ្នូ ក្រុមជំនុំនានាទូទាំងខេត្តសៀមរាប សហការជាមួយសមាគម BGEA ក៏បានរៀបចំកញ្ចប់ជំនួយដែលមានដូចជា៖ ភួយ មុង ស្បៀងអាហារ និងសម្ភារៈមួយចំនួនទៀត ជូនដល់បងប្អូនប្រជាពលរដ្ឋដែលជាជនភៀសសឹកផងដែរ៕