(ព្រះវិហារ)៖ លោកស្រី សុខា គងពិសី គីមរិទ្ធី ភរិយាលោក គីម រិទ្ធី អភិបាលខេត្តព្រះវិហារ នៅព្រឹកថ្ងៃទី២៤ ខែមករា ឆ្នាំ២០២៦ បានអញ្ជើញចូលរួមក្នុងពិធីបុណ្យរាប់បាតព្រះសង្ឃចំនួន ២០៩អង្គ និងពិធីបុណ្យ ទក្ខិណានុប្បទាន ដោយនាំយកទេយ្យវត្ថុ និងបច្ច័យប្រគេនដល់ព្រះសង្ឃ នៅវត្តប្រាសាទគោកបេង ស្ថិតក្នុងភូមិគោកបេង សង្កាត់កំពង់ប្រណាក ក្រុងព្រះវិហារ ខេត្តព្រះវិហារ។

ពិធីបុណ្យនេះត្រូវបានរៀបចំឡើងក្នុងបំណងឧទ្ទិសកុសលផលបុណ្យ ដែលកើតចេញពីសទ្ធាជ្រះថ្លា និងចិត្តសប្បុរសធម៌ ជូនចំពោះដួងវិញ្ញាណក្ខន្ធវីរកងទ័ព ដែលបានលះបង់សាច់ស្រស់ឈាមស្រស់ និងអាយុជីវិត ក្នុងបុព្វហេតុការពារបូរណភាពទឹកដី អធិបតេយ្យភាព និងសន្តិភាពនៃជាតិមាតុភូមិកម្ពុជា។

ក្នុងឱកាសនោះ លោកស្រី សុខា គងពិសី គីមរិទ្ធី បានសម្តែងនូវការគោរពរំលឹក និងដឹងគុណយ៉ាងជ្រាលជ្រៅ ចំពោះវីរភាព និងការលះបង់ដ៏ឧត្តុង្គឧត្តមរបស់វីរកងទ័ព ដែលបានបូជាជីវិត ដើម្បីការពារជាតិ សាសនា ព្រះមហាក្សត្រ និងសេចក្តីសុខសាន្តរបស់ប្រជាពលរដ្ឋកម្ពុជា។

ជាមួយគ្នានេះផងដែរ ព្រះសីមាវិជិត ឡុង សុមុនី ព្រះមេគណខេត្តព្រះវិហារ និងជាព្រះគ្រូចៅអធិការវត្តគោកបេង បានមានសង្ឃដីកា បញ្ជាក់ថា៖ពិធីបុណ្យរាប់បាត និងទក្ខិណានុប្បទាននេះ គឺធ្វើឡើងដើម្បីជួយទំនុកបម្រុងបច្ច័យបួនដល់ព្រះសង្ឃផង និងដើរក្សាប្រពៃណីព្រះពុទ្ធសាសនា ព្រមទាំងជាការបណ្តុះស្មារតីគុណធម៌ ការដឹងគុណ និងការគោរពរំលឹកចំពោះអ្នកបានលះបង់អាយុជីវិត ដើម្បីបម្រើប្រទេសជាតិ។

ព្រះមេគណខេត្តព្រះវិហារ បានមានសង្ឃដីកាបន្ថែមទៀតថា៖កុសលផលបុណ្យដែលកើតចេញពីសទ្ធាជ្រះថ្លានេះ សូមឧទ្ទិសជូនដល់ដួងវិញ្ញាណក្ខន្ធវីរកងទ័ពទាំងអស់ ឲ្យបានទៅកាន់សុគតិភព និងជាអំណោយធម៌ដ៏ប្រសើរ សម្រាប់បណ្តុះសុខសន្តិភាព សាមគ្គីភាព និងការរីកចម្រើនយូរអង្វែងរបស់ប្រទេសជាតិយើង។

ពិធីបុណ្យនេះបានប្រព្រឹត្តទៅពោរពេញដោយសទ្ធាជ្រះថ្លា ដោយមានការចូលរួមពីព្រះសង្ឃ អាជ្ញាធរមូលដ្ឋាន មន្ត្រីរាជការ និងពុទ្ធបរិស័ទជាច្រើនរូប ដែលបានរួមចំណែកធ្វើបុណ្យកុសល និងឧទ្ទិសផលបុណ្យជូនដល់វីរកងទ័ពដែលបានបាត់បង់ជីវិត ដើម្បីជាតិ និងប្រជាជន៕