(ភ្នំពេញ)៖ គណៈកម្មការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែងនៅរាជធានីភ្នំពេញ បានបញ្ចប់ការចុះពិនិត្យផ្ទៀងផ្ទាត់រចនាសម្ព័ន្ធ និងវត្តមានមន្ត្រីរាជការក្របខ័ណ្ឌ មន្ត្រីជាប់កិច្ចសន្យា និងមន្ត្រីផ្សេងទៀត ដែលកំពុងបំពេញការងារជាក់ស្តែង នៅតាមរចនាសម្ព័ន្ធអង្គភាពសុខាភិបាលមូលដ្ឋានក្រោមសមត្ថកិច្ចការិយាល័យសុខាភិបាលស្រុកប្រតិបត្តិបាសាក់ ព្រែកព្នៅ មេគង្គ និងគ្រឹះស្ថានសិក្សាសាធារណៈស្ថិតក្នុងភូមិសាស្ត្ររដ្ឋបាលខណ្ឌ៧មករា និងសែនសុខ។

ចាប់ពីថ្ងៃទី២១​ ដល់ថ្ងៃទី២៤ ខែមករា ឆ្នាំ២០២៦ គណៈកម្មការជំរឿន បានចុះជំរឿនមន្ត្រីជាក់ស្តែង នៅតាមមន្ទីរពេទ្យចំនួន៤, មណ្ឌលសុខភាពចំនួន១៦ និងប៉ុស្តិ៍សុខភាពចំនួន២ នៃរចនាសម្ព័ន្ធអង្គភាពសុខាភិបាលមូលដ្ឋាន ក្រោមសមត្ថកិច្ចការិយាល័យសុខាភិបាលស្រុកប្រតិបត្តិទាំង៣ ព្រមទាំងវិទ្យាល័យចំនួន៥, សាលាបឋមសិក្សាចំនួន១២, មត្តេយ្យសិក្សាចំនួន២ និងសាលាឧបសម្ព័ន្ធចំនួន២ ដែលស្ថិតក្នុងភូមិសាស្ត្ររដ្ឋបាលខណ្ឌទាំង២។

នាថ្ងៃទី២៦ ខែមករា ឆ្នាំ២០២៦ខាងមុខនេះ គណៈកម្មការជំរឿន នឹងបន្តចុះធ្វើជំរឿនមន្ត្រីជាក់ស្តែងគ្រឹះស្ថានសិក្សាសាធារណៈ ក្នុងភូមិសាស្ត្ររដ្ឋបាលខណ្ឌចំការមន កំបូល និងទួលគោក ព្រមទាំងអង្គភាពសុខាភិបាលមូលដ្ឋាន ក្រោមសមត្ថកិច្ចការិយាល័យសុខាភិបាលស្រុកប្រតិបត្តិសែនសុខ និងដង្កោ៕