(ព្រះសីហនុ)៖ លោកឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ នៅថ្ងៃទី២៤ ខែមករា ឆ្នាំ២០២៦ បានថ្លែងថា ការចុះមូលដ្ឋានគឺដើម្បីស្គាល់ស្រុកទេស ហើយថ្លឹងថ្លែងសមិទ្ធផលសង្គមជាតិ និងពិនិត្យជីវភាពរស់នៅប្រចាំថ្ងៃប្រជាពលរដ្ឋរបស់យើង។

ការថ្លែងបែបនេះរបស់លោករដ្ឋមន្ត្រី បានធ្វើឡើងនាឱកាសដែលលោកអញ្ជើញជាអធិបតី ក្នុងសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់រដ្ឋបាលខេត្តព្រះសីហនុ។

ចំពោះមុខអង្គពិធី លោកឧបនាយករដ្ឋមន្ត្រី បានរំលឹកពីសាវតានៃប្រព័ន្ធចុះមូលដ្ឋានរបស់កម្ពុជា ដែលកើតឡើងក្រោយឆ្នាំ១៩៧៩។ គ្រានោះ កម្ពុជា បានចាប់ផ្ដើមមានប្រព័ន្ធចុះមូលដ្ឋាន ដោយបានចាត់មន្ត្រីជាន់ខ្ពស់២រូប ទៅប្រទេសម៉ាឡេស៊ី ដើម្បីសិក្សាពីប្រព័ន្ធចុះមូលដ្ឋានរបស់គេ កាលពីឆ្នាំ១៩៩១។

លោក បានបន្តថា ចាប់ពីពេលនោះរហូតមកដល់បច្ចុប្បន្ន យើងមានប្រព័ន្ធចុះមូលដ្ឋានច្បាស់លាស់ តែមានលក្ខណៈពិសេសបន្ដិច​ គឺការចុះមូលដ្ឋានដើម្បីមកសិក្សារៀនសូត្រ ក្នុងគោលដៅស្វែងយល់បន្ថែមពីបរិបថប្រទេសរបស់យើង។

ឧបនាយករដ្ឋមន្ត្រី សាយ សំអាល់ បានថ្លែងដូច្នេះថា៖ «ខ្ញុំបានណែនាំមន្ត្រីរបស់យើងថា ការចុះមូលដ្ឋានមិនមែនទៅប្រជុំទេ ហើយចុះមូលដ្ឋានក៏ត្រូវថ្លឹងពីសមិទ្ធផលរួមរបស់សង្គមជាតិ និងសមិទ្ធផលដែលទាក់ទងនឹងក្រពះរបស់បងប្អូនប្រជាពលរដ្ឋរបស់យើងជាក់ស្ដែង។ អ៊ីចឹងយើងត្រូវមានយុទ្ធសាស្ត្ររបស់យើង ក្នុងការចុះមូលដ្ឋាន ហើយបើយើងមិនចុះមូលដ្ឋានទេ គឺមិនស្គាល់ស្រុកទេសរបស់យើងឡើយ»។

ជាមួយគ្នានេះដែរ លោករដ្ឋមន្ត្រី បានមានប្រសាសន៍ថា ការចុះមូលដ្ឋាន ការដែលបានទៅឃើញផ្ទាល់ ជួបផ្ទាល់ ដឹងផ្ទាល់ ស្វែងយល់ពីបញ្ហាដែលប្រជាពលរដ្ឋបានជួបប្រទះ ទើបយើងអាចរកនូវដំណោះស្រាយរួមមួយសម្រាប់ពួកគាត់៕