តើធ្វើដូចម្ដេច ដើម្បីទទួលបានប្រាក់ឧបត្ថម្ភរបស់រាជរដ្ឋាភិបាល ពីកម្មវិធីអាហារូបករណ៍សម្រាប់សិស្សក្រីក្រ?
26-01-2026 13:18
(ភ្នំពេញ)៖ រាជរដ្ឋាភិបាលកម្ពុជាបានដាក់អនុវត្ត «កម្មវិធីជាតិជំនួយសង្គមក្នុងកញ្ចប់គ្រួសារ» ហើយប្រសិនបើមាតាបិតា ដែលមានបណ្ណសមធម៌មានសុពលភាព នាំកូនទៅចុះឈ្មោះចូលកម្មវិធីនៅសាលាឃុំ សង្កាត់ដើម្បីទទួលបានប្រាក់ឧបត្ថម្ភនៅរៀងរាល់ចុងខែ។
សូមគ្រួសារដែលមានបណ្ណសមធម៌ (ក្រីក្រ១ និងក្រីក្រ២) មានសុពលភាព អញ្ជើញទៅចុះឈ្មោះសិស្សចូល ក្នុងកម្មវិធីអាហារូបករណ៍សម្រាប់សិស្សក្រីក្រ នៅបឋមសិក្សា និងមធ្យមសិក្សាចំណេះទូទៅ ក្នុងក្របខណ្ឌកម្មវិធីជាតិជំនួយសង្គមក្នុងកញ្ចប់គ្រួសារ តាមនីតិវិធីដូចខាងក្រោម ៖
១. សិស្សានុសិស្សត្រូវទៅជួបមន្ត្រីអនុវត្ដកម្មវិធីនៅសាលារៀនដែលខ្លួន កំពុងសិក្សាដោយភ្ជាប់មកជាមួយបណ្ណសមធម៌ច្បាប់ដើមមានសុពលភាព និងលិខិតចុះឈ្មោះចូលរៀន ដើម្បីធ្វើការបញ្ជាក់ការចុះឈ្មោះចូលរៀនក្នុងប្រព័ន្ធអែប (App) របស់កម្មវិធីជាតិជំនួយសង្គមក្នុងកញ្ចប់គ្រួសារ
២. បន្ទាប់មកត្រូវទៅជួបមន្ត្រីអនុវត្ដកម្មវិធីនៅសាលាឃុំ-សង្កាត់ ដោយភ្ជាប់ជាមួយនូវបណ្ណសមធម៌ច្បាប់ដើមមានសុពលភាព និងលិខិតចុះឈ្មោះចូលរៀនដើម្បីចុះឈ្មោះក្នុងកម្មវិធី។
សូមបញ្ជាក់ផងដែរថា ៖ សិស្សានុសិស្សស្ថិតក្នុងគ្រួសារមានបណ្ណសមធម៌ និងបានចុះឈ្មោះចូលក្នុងកម្មវិធីរួចរាល់ នឹងទទួលបានប្រាក់ឧបត្តម្ភនៅរៀងរាល់ចុងខែ សម្រាប់៖
* បឋមសិក្សា ទទួលបាន ២ម៉ឺនរៀល ក្នុង ១ខែ
* មធ្យមសិក្សាបឋមភូមិ ទទួលនបាន ២ម៉ឺនរៀល ក្នុង ១ខែ
* មធ្យមសិក្សាទុតិយភូមិ ទទួលបាន ៣ម៉ឺនរៀល ក្នុង ១ខែ
លេខទំនាក់ទំនងសម្រាប់ព័ត៌មានបន្ថែម ៖ ០៩២ ២១៩ ៨៨៨ ឬ ០១៥ ២១៩ ៨៨៨ រៀងរាល់ម៉ោងធ្វើការ៕
