(ចិន)៖ លោក ថោង ចិន្តា ប្រធាននិយ័តករទូរគមនាគមន៍កម្ពុជា (ន.ទ.ក.) និងលោក Chaucer Leung អគ្គនាយកនៃអាជ្ញាធរគមនាគមន៍ នៃតំបន់រដ្ឋបាលពិសេសហុងកុង នៃសាធារណរដ្ឋប្រជាមានិតចិន (OFCA) នៅថ្ងៃទី២៦ ខែមករា ឆ្នាំ២០២៦ បានចុះហត្ថលេខាលើអនុស្សរណៈនៃការយោគយល់ ដើម្បីពង្រឹងកិច្ចសហប្រតិបត្តិការទ្វេភាគី ក្នុងការដោះស្រាយបញ្ហាប្រឈមពាក់ព័ន្ធនឹងការឆបោក និងសារឥតបានការ (Spam) ក្នុងវិស័យទូរគមនាគមន៍។

អនុស្សរណៈនៃការយោគយល់នេះ លើកកម្ពស់ការផ្លាស់ប្តូរឧត្តមានុវត្តន៍ លើការធ្វើនិយ័តកម្ម ការចែករំលែកព័ត៌មានទាន់ពេលវេលាអំពីនិន្នាការថ្មីៗ និងការធ្វើកិច្ចសហការគ្នា ដើម្បីការពារអ្នកប្រើប្រាស់ និងរក្សាទំនុកចិត្តលើសេវាទូរគមនាគមន៍។

ទន្ទឹមនឹងពិធីចុះហត្ថលេខានេះដែរ និយ័តករទាំងពីរ បានរៀបចំកិច្ចប្រជុំទ្វេភាគី ដើម្បីពិភាក្សាអំពីបច្ចុប្បន្នភាពនៃការធ្វើនិយ័តកម្ម និងគំនិតផ្តួចផ្តើមដែលកំពុងអនុវត្ត។

លោកប្រធាន ថោង ចិន្តា បានថ្លែងថា ភាពជាដៃគូនេះ នឹងពង្រឹងភាពធន់ក្នុងវិស័យទូរគមនាគមន៍ឱ្យកាន់តែរឹងមាំ និងជំរុញការការពារអ្នកប្រើប្រាស់ ព្រមទាំងបង្កើនទំនុកចិត្តលើប្រព័ន្ធឌីជីថលនៅកម្ពុជា និងតំបន់រដ្ឋបាលពិសេសហុងកុង នៃសាធារណរដ្ឋប្រជាមានិតចិន៕