(កំពង់ស្ពឺ)៖ ដោយមានការចង្អុលបង្ហាញតម្រែតម្រង់ទិស​​​របស់ នាយ​ឧត្តម​សេនីយ៍​​​​ សៅ​​​ សុខា​​​ អគ្គ​មេបញ្ជាការ​រង​កងយោធពល​ខេមរ​ភូមិន្ទ​​​ និងជាមេបញ្ជាការ​កង​រាជ​អាវុធហត្ថ​លើ​ផ្ទៃ​ប្រទេស​ នៅថ្ងៃទី២៦ ខែមករា ឆ្នាំ២០២៦​នេះ​ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ​​ កង​រាជ​អាវុធហត្ថ​ខេត្ត​កំពង់ស្ពឺ​ បានអញ្ជើញដឹកនាំក្រុមការងារកងរាជអាវុធហត្ថខេត្តកំពង់ស្ពឺ​ រៀបចំពិធីសំណេះសំណាល និងជូនដំណើរយោធិននៃកងរាជអាវុធហត្ថទើបជ្រើសរើសថ្មី (ជាប់ជាស្ថាពរ) ឲ្យចូលទៅហ្វឹកហ្វឺន នៅវិទ្យាស្ថានកងរាជអាវុធហត្ថ (កំបូល)។

ពិធីនេះ ធ្វើឡើងក្រោមអធិបតីភាព លោកស្រី គា សុភូ អភិបាលរងខេត្តកំពង់ស្ពឺ ជាតំណាងលោកបណ្ឌិត ជាម ចន្ទ័សោភណ័ អភិបាលខេត្តកំពង់ស្ពឺ និងមានការអញ្ជើញចូលរួម ពីប្រតិភូអមដំណើរលោកស្រីអភិបាលរងខេត្ត ព្រមទាំងនាយទាហាន នាយទាហានរង ពលទាហាន នៃកងរាជអាវុធហត្ថខេត្តកំពង់ស្ពឺ រួមនិងក្រុមគ្រួសារ មាតាបិតា អាណាព្យាបាលយោធិនជ្រើសរើសថ្មីផងដែរ​ ស្ថិតនៅបញ្ជាការដ្ឋានកងរាជអាវុធហត្ថខេត្តកំពង់ស្ពឺ។

ថ្លែងក្នុងពិធីនាពេលនោះ​ដែរ​​​ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ​​ ក៏បានសំណេះសំណាលជាមួយក្រុមគ្រួសារ មាតាបិតា អាណាព្យាបាលយោធិនជ្រើសរើសថ្មី​ ជាពិសេសបានផ្តាំផ្ញើ ដល់យោធិននៃកងរាជអាវុធហត្ថទើបជ្រើសរើសថ្មី (ជាប់ជាស្ថាពរ) ទាំងអស់ ត្រូវតស៊ូអត់ធ្មត់ ព្យាយាមហ្វឹកហ្វឺនរៀនសូត្រ គោរពបទបញ្ជាផ្ទៃក្នុងសាលាឲ្យបានល្អ និងបានបញ្ជាក់បន្ថែមទៀតថា ដើម្បីក្លាយជាកងកម្លាំងមាន គុណភាព មានសមត្ថភាព សាម៉ីខ្លួនម្នាក់ៗត្រូវខិតខំប្រឹងប្រែងដុះខាត់សមត្ថភាព និងជំនាញឲ្យបានខ្លាំងខ្លា។

នាឱកាសនោះ លោកស្រី គា សុភូ បានសំណេះសំណាលជាមួយយោធិន នៃកងរាជអាវុធហត្ថទើបជ្រើសរើសថ្មី (ជាប់ជាស្ថាពរ) ទាំងអស់​ រួមនិងក្រុមគ្រួសារ មាតាបិតា អាណាព្យាបាលយោធិនជ្រើសរើសថ្មី​ ដែលបានចូលរួមក្នុងពិធី ជាពិសេសក៏បានពាំនាំនូវពាក្យផ្តាំផ្ញើពីសំណាក់លោកបណ្ឌិត ជាម ចន្ទ័សោភ័ណ​​ ដល់យោធិនទើបជ្រើសរើសថ្មី ឲ្យខិតខំយកចិត្តទុកដាក់រៀនសូត្រ បំពេញតួនាទី ភារកិច្ច បេសកកម្មក្នុងការហ្វឹកហ្វឺនឲ្យទទួលបានជោគជ័យ និងត្រូវគោរពច្បាប់លក្ខន្តិកៈ នៃកងយោធពលខេមរភូមិន្ទឲ្យបានល្អ ដើម្បីអភិវឌ្ឍន៍ខ្លួន ឲ្យក្លាយជាធនធានល្អ សម្រាប់សង្គមជាតិនៃយើង។

ជាចុងក្រោយ ​មុននឹងបញ្ចប់នៃកម្មវិធី លោកឧត្តមសេនីយ៍ត្រី ម៉េង ស្រ៊ុន មេបញ្ជាការ រួមជាមួមនឹងលោកស្រី គា សុភូ អភិបាលរងខេត្តកំពង់ស្ពឺ ក៏បានបំពាក់ក្រម៉ា និងជូនបាច់ផ្កាអនុស្សាវរីយ៍ ដល់យោធិននៃកងរាជអាវុធហត្ថទើបជ្រើសរើសថ្មី (ជាប់ជាស្ថាពរ) ហើយក៏បានឧបត្ថម្ភដនូវសម្ភារៈមួយចំនួន សម្រាប់ហូបចុកពេលទៅហ្វឹកហ្វឺនរៀនសូត្រ ដោយក្នុងនោះម្នាក់ៗទទួលបាន៖ ទឹកផ្លែឈើចំនួន០១កេស, មីចំនួន០១កេស​ និងទឹកសុទ្ធចំនួន០១កេស ថែមទៀត៕