(កំពង់ឆ្នាំង)៖ លោកបណ្ឌិត ហ៊ឺ វីរៈ អ្នកតំណាងរាស្ត្រមណ្ឌលខេត្តកំពង់ឆ្នាំង នៅថ្ងៃទី២៦ ខែមករា ឆ្នាំ២០២៦ បានដឹកនាំក្រុមការងារចុះប្រគល់ធុងចម្រោះទឹកក្ដៅ និងទឹកត្រជាក់ ដែលជាអំណោយរបស់សមាគមបង្ហាញផ្លូវល្អ និងអភិវឌ្ឍន៍សង្គម តាមរយៈលោក ស្លេះ សា ប្រធានគម្រោងនៃសមាគមបង្ហាញផ្លូវល្អ និងអភិវឌ្ឍន៍សង្គម ចំនួន១៨ធុង ត្រូវបានប្រគល់ជូនរដ្ឋបាលឃុំទាំង១០ សរុបចំនួន១០ធុង និងប្រគល់ជូនវិទ្យាល័យចំណេះទូទៅ និងបច្ចេកទេសព្រះបាទសម្ដេចព្រះបរមនាថ នរោត្តម សីហមុនី ចំនួន៤ធុង និងវិទ្យាល័យ ហ៊ុន សែន កំពង់ត្រឡាច ចំនួន៤ធុង។

នាឱកាសនោះលោកបណ្ឌិត ហ៊ឺ វីរៈ បានបញ្ជាក់ថា ការចែកជូននូវធុងចម្រោះទឹកពិសានៅពេលនេះ ក្នុងគោលបំណងដើម្បីឱ្យរដ្ឋបាលឃុំ លោកគ្រូ អ្នកគ្រូ និងសិស្សានុសិស្សកាត់បន្ថយការចំណាយលើការទិញទឹកពីខាងក្រៅមកពិសារ និងចូលរួមកាត់បន្ថយការប្រើប្រាស់ដបប្លាស្ទិក។ អំណោយដែលបានផ្ដល់ជូននៅពេលនេះ ជាអំណោយរបស់សមាគមបង្ហាញផ្លូវល្អ និងអភិវឌ្ឍន៍សង្គម ដែលសមាគមតែងតែយកចិត្តទុកដាក់ផ្ដល់ជំនួយមនុស្សធម៌ ជូនដល់គ្រួសារ ដែលមានជីវភាពខ្វះខាត ចាស់ជរា មានជំងឺ ក្មេងកំព្រា ដែលជាការចូលរួមចំណែកទ្រទ្រង់ផ្នែកសុខាភិបាល និងវិស័យអប់រំ ដោយមិនប្រកាន់ពូជសាសន៍ ពណ៌សម្បុរ និងនិន្នការនយោបាយឡើយ។

ឆ្លៀតក្នុងឱកាសនោះលោកបណ្ឌិត ក៏បានផ្សព្វផ្សាយអំពីគម្រោងការសាងសង់មជ្ឈមណ្ឌលថែទាំមនុស្សវ័យចាស់ ដែលគម្រោងនេះបង្កើតឡើងសម្រាប់ការផ្ដល់ជូនដល់មនុស្សចាស់គ្មានទីពឹង គ្មានកូនចៅថែទាំ ឬមានស្ថានភាពក្រីក្រ និងជំងឺប្រចាំកាយ។ ក្រោយការបង្កើតមជ្ឈមណ្ឌលនេះនឹងក្លាយទៅជាកន្លែងស្នាក់អាស្រ័យប្រចាំថ្ងៃ ការថែទាំ និងការគាំទ្រផ្នែករាងកាយ និងផ្លូវចិត្ត ដល់មនុស្សវ័យចាស់ដែលខ្វះទីពឹង ក្នុងមូលដ្ឋាននៃឃុំទាំង១០ របស់ស្រុកកំពង់ត្រឡាច ខេត្តកំពង់ឆ្នាំង។

លោកបណ្ឌិត អ្នកតំណាងរាស្ត្រមណ្ឌលខេត្តកំពង់ឆ្នាំង ក៏បានសំណូមពរឱ្យមានការចូលរួមពីសិស្សានុសិស្សទូទាំងស្រុកកំពង់ត្រឡាច ក្នុងការមានកម្មវិធីទៅចូលរួមសួរសុខទុក្ខចាស់ជរាផងដែរ៕