(ភ្នំពេញ)៖ អគ្គិសនីកម្ពុជា (EDC) បានចាប់ផ្ដើមចូលរួមវិនិយោគ បង្កើតស្ថានីយបញ្ចូលថាមពលយានយន្តអគ្គិសនីនៅតាមរាជធានី-ខេត្តទាំង២៥ ដែលនឹងដាក់ឲ្យដំណើរការ ជាបន្តបន្ទាប់ ក្នុងពេលឆាប់ៗខាងមុខ។ នេះបើតាមលិខិត របស់អាជ្ញាធរអគ្គិសនីកម្ពុជា ផ្ញើទៅអ្នកកាន់អាជ្ញាបណ្ណធ្វើសេវាកម្មអគ្គិសនីនៅកម្ពុជា ចុះថ្ងៃទី២២ ខែមករា ឆ្នាំ២០២៦។

អាជ្ញាធរអគ្គិសនីកម្ពុជាបានបញ្ជាក់ថា «អគ្គិសនីកម្ពុជា-EDC បានចូលរួមវិនិយោគបង្កើតស្ថានីយបញ្ចូលថាមពល នៅតាមរាជធានី-ខេត្តទាំង២៥ ដែលស្ថានីយទាំងនោះ នឹងចាប់ផ្តើមដាក់ឱ្យដំណើរការជាបន្តបន្ទាប់ ក្នុងពេលឆាប់ៗខាងមុខ»។

ក្នុងលិខិតនោះ អាជ្ញាធរអគ្គិសនីកម្ពុជា ក៏បានប្រាប់ដល់អ្នកកាន់អាជ្ញាបណ្ណ ធ្វើសេវាកម្មអគ្គិសនីនៅកម្ពុជា ជំរុញការអភិវឌ្ឍស្ថានីយបញ្ចូលថាមពលយានយន្តអគ្គិសនី និងជំរុញកំណើន នៃការប្រើប្រាស់យានយន្តអគ្គិសនី នៅក្នុងប្រទេសកម្ពុជា។

បើតាមអាជ្ញាធរអគ្គិសនីកម្ពុជា, គោលការណ៍ និងនីតិវិធីនេះ មានគោលបំណង៖

១៖ លើកកម្ពស់ការអភិវឌ្ឍការបញ្ចូលថាមពលឱ្យយានយន្ត អគ្គិសនីមានគ្រប់គ្រាន់ គ្រប់ទីកន្លែងយ៉ាងឆាប់រហ័ស និងជំរុញកំណើន នៃការប្រើប្រាស់យានយន្តអគ្គិសនីនៅកម្ពុជា ស្របតាមគោលនយោបាយរបស់រាជរដ្ឋាភិបាល ស្តីពីការអភិវឌ្ឍវិស័យយានយន្តអគ្គិសនី,
២៖ គ្រប់គ្រងការផ្តល់សេវាកម្មបញ្ចូលថាមពលរបស់ស្ថានីយបញ្ចូលថាមពល ឱ្យយានយន្តអគ្គិសនី ឱ្យមានសុវត្ថិភាព និរន្តរភាព ប្រសិទ្ធភាព និងមានថ្លៃសមរម្យ និង៣៖ គ្រប់គ្រងការទទួលយកថាមពលរបស់ យានយន្តអគ្គិសនីបញ្ចូលក្នុងអាគុយឱ្យមានសុវត្ថិភាព ស្ថិរភាព និងប្រសិទ្ធភាព។

ក្នុងគោលបំណងរួម ចំណែកអនុវត្តគោលការណ៍នេះ អាជ្ញាធរអគ្គិសនីកម្ពុជា ស្នើសុំអ្នកកាន់អាជ្ញាបណ្ណធ្វើសេវាកម្មផ្គត់ផ្គង់អគ្គិសនីទាំងអស់ ពិនិត្យលទ្ធភាពវិនិយោគ បង្កើតស្ថានីយបញ្ចូលថាមពល នៅក្នុងតំបន់ផ្គត់ផ្គង់អគ្គិសនីរបស់ខ្លួន និងចូលរួមប្រើប្រាស់យានយន្តអគ្គិសនី ជាពិសេសយានយន្តសម្រាប់បម្រើ ឱ្យប្រតិបត្តិការអាជីវកម្មអគ្គិសនី៕