(សៀមរាប)៖ នាព្រឹកថ្ងៃទី២៧​ ខែមករា​ ឆ្នាំ២០២៦​ នៅសាលាខេត្តសៀមរាប លោក ប្រាក់ សោភ័ណ អភិបាលនៃគណៈអភិបាលខេត្តសៀមរាប ​ បានដឹកនាំកិច្ចប្រជុំផ្សព្វផ្សាយអនុក្រឹត្យលេខ​ ០៣​ អនក្រ.បក​ ស្តីពីការគ្រប់គ្រងសន្តិសុខ​ សុវត្ថិភាព​ តាមទីតាំងរស់នៅប្រមូលផ្តុំ​ ក្នុងភូមិសាស្ត្រខេត្តសៀមរាប ដើម្បីធានាដល់សន្តិសុខ សុវត្ថិភាពសង្គម និងសណ្ដាប់ធ្នាប់សាធារណៈ និងដើម្បីមុខមាត់ខេត្តសៀមរាប ដែលជាខេត្តទេសចរណ៍របស់កម្ពុជាយើង។

លោកអភិបាលខេត្តមានប្រសាសន៍ លើកទឹកចិត្តដល់ប្រជាពលរដ្ឋ ក្នុងករណីសង្ស័យមានការឆបោកតាមប្រព័ន្ធបច្ចេកវិទ្យា (Online Scams) សូមរាយការណ៍ជូនកងកម្លាំងមានសមត្ថកិច្ច ហើយជំនាញនឹងរក្សាការសម្ងាត់ជូន។ ក្នុងគោលបំណង ដើម្បីធានាដល់សន្តិសុខ សុវត្ថិភាពសង្គម និងសណ្ដាប់ធ្នាប់សាធារណៈ ដែលរាជរដ្ឋាភិបាលកម្ពុជា បានធ្វើប្រតិភូកម្មការងារគ្រប់គ្រងការស្នាក់នៅ និងការគ្រប់គ្រងសន្តិសុខ សុវត្ថិភាពតាមទីតាំងរស់នៅប្រមូលផ្ដុំ ជូនរដ្ឋបាលរាជធានី/ខេត្ត ក្រុង ស្រុក ខ័ណ្ឌតាមអនុក្រឹត្យលេខ ០៣ អនក្រ.បក។

លោកអភិបាល បានក្រើនរំលឹកឱ្យសមត្ថកិច្ចពាក់ព័ន្ធ ត្រូវបង្កើនការទប់ស្កាត់ និងបង្រ្កាបរាល់បទល្មើសនានានៅតាមមូលដ្ឋាន ពិសេសបទល្មើសតាមប្រព័ន្ធបច្ចេកវិទ្យា (Online Scams) កុំឱ្យកើតមាននៅក្នុងភូមិសាស្រ្តខេត្តសៀមរាប។ លោកក៏បានលើកទឹកចិត្តដល់មន្ត្រីរាជការ កងកម្លាំងមានសមត្ថកិច្ច និងអាជ្ញាធរមូលដ្ឋានទាំងអស់ ត្រូវចលនាឱ្យប្រជាពលរដ្ឋធ្វើជាភ្នែកច្រមុះរបស់យើង បើមានការសង្ស័យ ឱ្យគាត់រាយការណ៍មកយើង ហើយត្រូវរក្សាការសម្ងាត់ឱ្យគាត់ ដើម្បីសមត្ថកិច្ចមានវិធានការតាមច្បាប់ឱ្យទាន់ពេលវេលា ចំពោះការប្រមូលផ្ដុំរបស់ជនបរទេសដោយខុសច្បាប់ ៕