(កំពង់ឆ្នាំង)៖ លោកយាយវ័យចាស់ជរា និងជាស្ត្រីមេម៉ាយគ្មានទីពឹងចំនួន៣នាក់ រស់នៅក្នុងស្រុកកំពង់លែង ខេត្តកំពង់ឆ្នាំង នៅព្រឹកថ្ងៃទី២៨ ខែមករា ឆ្នាំ២០២៦ បានទទួលអំណោយមនុស្សធម៌ ជាគ្រឿងឧបភោគបរិភោគ ពីលោកប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តកំពង់ឆ្នាំង។

លោកយាយទាំង៣នាក់នេះ ១៖ ឈ្មោះ ប្រាក់ សារឿន អាយុ៧៨ឆ្នាំ មានទីលំនៅក្នុងភូមិត្រងិល ឃុំត្រងិល ស្រុកកំពង់លែង ជាស្ត្រីមេម៉ាយទូរគត រស់នៅតែម្នាក់ឯង ប្ដីរបស់លោកយាយទើបស្លាប់ចោល ប្រមាណជា១អាទិត្យកន្លងទៅថ្មីៗនេះ បច្ចុប្បន្នលោកយាយរស់នៅតែម្នាក់ឯង ក្នុងជីវភាពខ្វះខាតមិនមានមុខរបរ និងម្យ៉ាងរូបលោកយា យក៏មានជំងឺប្រចាំកាយ មួយថ្ងៃកាត់មួយថ្ងៃកោរផងដែរ។

២៖ លោកយាយ យឹម អុន អាយុ៧៤ឆ្នាំ មានទីលំនៅក្នុងភូមិត្រងិល ឃុំត្រងិល ស្រុកកំពង់លែង លោកយាយជាស្ត្រីក្រមុំចាស់ទូរគតរស់នៅតែម្នាក់ឯង គ្មានកូនគ្មានចៅនោះទេ លោកយាយរស់នៅពឹងទៅលើអាជ្ញាធរ និងប្រជាពលរដ្ឋជាអ្នករស់នៅក្នុងមូលដ្ឋាន ជួយផ្គត់ផ្គង់រស់សម្រាប់តែមួយថ្ងៃទៅមួយថ្ងៃតែប៉ុណ្ណោះ។

ចំណែកលោកយាយម្នាក់ទៀត មានឈ្មោះ ប្រាក់ សារ៉េត អាយុ៧៥ឆ្នាំ ក៏ជាស្ត្រីក្រមុំចាស់ដូចលោកយាយខាងលើផងដែរ បច្ចុប្បន្នលោកយាយរស់នៅតែម្នាក់ឯង មិនមានកូនចៅឬកូនក្មួយ រស់នៅជាមួយនោះទេ គឺរស់ពឹងទៅលើអ្នកជិតខាង ដែលរស់នៅក្បែរខាងជួយចិញ្ចឹមលោកយាយ សម្រាប់រស់ពីមួយថ្ងៃទៅមួយថ្ងៃ លោកយាយក៏មានជំងឺប្រចាំកាយ មិនអាចដើរហើរទៅណាបានឆ្ងាយនោះឡើយ។

ដោយឃើញស្ថានភាពលោកយាយទាំង៣នាក់ជួបការលំ បាកផ្នែកជីវភាពក្នុងការរស់នៅប្រចាំថ្ងៃ នៅព្រឹកថ្ងៃទី២៨ ខែមករានេះ លោក ឈៀង ចន្ធី ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តកំពង់ឆ្នាំង តាមរយៈបណ្ដាញព័ត៌មាន Fresh News លោកប្រធានមន្ទីរ ក៏បានផ្ដល់អំណោយជាគ្រឿងឧបភោគបរិភោគមានអង្ករ, មី, ត្រីខ, ទឹកត្រី, ទឹកស៊ីអ៊ីវ, សារ៉ុង, ជូនដល់លោកយាយទាំង៣នាក់ខាងលើនេះ សម្រាប់ដោះស្រាយជីវភាពរបស់ពួកគាត់បា នមួយរយៈពេលផងដែរ។

ទន្ទឹមនឹងនេះ លោកប្រធានមន្ទីរសង្គមកិច្ច អតីតយុទ្ធជន លោកនិងបន្តស្វែងរកការ ជួយឧបត្ថម្ភពីសប្បុរសជននានា ជាស្បៀងអាហារដើម្បីជួយឧបត្ថម្ភដល់លោកយាយទាំង៣នាក់ ខាងលើនេះ ក៏ដូចជាជួយដល់ប្រជាពលរដ្ឋដទៃទៀត ដែលជួបការលំបាកខ្វះខាតផ្នែកជីវភាព ដូចអ្វីដែលលោកប្រធានមន្ទីរ ធ្លាប់បានជួយឧបត្ថម្ភដល់ពួកគាត់កន្លងមក នៅនិងបន្តជួយជាបន្តបន្ទាប់សម្រាប់ នៅក្នុងខេត្តកំពង់ឆ្នាំងនេះ៕