(ស្វាយរៀង)៖ លោក លឹម សៀងហេង អភិបាលក្រុងបាវិត ខេត្តស្វាយរៀង បានណែនាំដល់ប្រជាពលរដ្ឋរស់នៅអមសងខាងផ្លូវហើយបានសាងសង់សំណង់រឹង លើចំណីផ្លូវ ត្រូវរុះរើចេញ ចាប់ពីកែងផ្លូវប្រឡាយព្រៃយាយរហូតដល់ផ្លូវបេតុងស្ថានីយប្រេងឥន្ធនៈកាល់តិច ស្ថិតក្នុងភូមិបាវិតលើ សង្កាត់បាវិត ក្រុងបាវិត ដើម្បីអាជ្ញាធរសិក្សាក្រាលថ្មមិចផ្លូវ និងស្ដារប្រព័ន្ធប្រឡាយទឹក។

ការណែនាំបែបនេះរបស់លោកអភិបាលក្រុងបាវិត បានធ្វើឡើងនៅក្នុងឱកាសដែលលោកបានអញ្ជើញចុះត្រួតពិនិត្យផ្លូវ ១ខ្សែ ប្រវែង ២ ០០០ម៉ែត្រ ដើម្បីសិក្សាក្រាលថ្មមិច និងស្ដារប្រព័ន្ធប្រឡាយទឹក នៅថ្ងៃទី២៨ ខែមករា ឆ្នាំ២០២៦។

លោកអភិបាលក្រុងក៏បានកោតសរសើរដល់ប្រជាពលរដ្ឋមួយចំនួនរស់នៅតាមអមសងខាងផ្លូវ ដែលរយៈកាលកន្លងមកអាជ្ញាធរបានធ្វើការស្ថាបនា និងជួសជុលកែរលម្អរផ្លូវ និងលូរំដោះទឹក ហើយតែងតែចូលរួមសហការព្រមរុះរើសំយ៉ាបផ្ទះ និងសំណង់រឹងដែលប៉ះពាល់ចេញ ដើម្បីឱ្យក្រុមការងារអភិវឌ្ឍន៍មូលដ្ឋានក្រុងបាវិត ប្រព្រឹត្តិទៅដោយរលូន។

ជាមួយគ្នានេះ ប្រជាពលរដ្ឋក្រុងបាវិត សូមថ្លែងអំណរគុណដល់អាជ្ញាធរក្រុងបាវិត ជាពិសេសលោកអភិបាលក្រុងដែលបានកសាងនូវហេដ្ឋារចនាសម្ព័ន្ធជាច្រើន ជាពិសេសផ្លូវថ្នល់ និងប្រព័ន្ធចម្រោះទឹក លូបង្ហូរទឹក ប្រឡាយទឹក ដើម្បីជាប្រយោជន៍រួមដល់ប្រជាពលរដ្ឋនៅមូលដ្ឋានបានប្រើប្រាស់៕