(ភ្នំពេញ)៖ បន្ទាប់ពីមានចំណាត់ការ និងអន្តរាគមន៍របស់លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ករណីហាងលក់ម៉ូតូ «CHD Moto Shop» នៅម្ដុំរង្វង់មូលសំពៅមាស ខណ្ឌ៧មករា ជាមួយអ្នកទិញនោះត្រូវបានដោះស្រាយបញ្ហារួចរាល់ហើយ នៅល្ងាចថ្ងៃទី៣១ ខែមករា ឆ្នាំ២០២៦នេះ។

ដំណោះស្រាយដើម្បីឈានដល់បញ្ចប់បញ្ហារវាងអ្នកលក់ និងអ្នកទិញនេះ គឺម្ចាស់ហាងលក់ម៉ូតូដែលមានបញ្ហានោះ បានព្រមប្រគល់លុយចំនួន១,៩៧០ដុល្លារ ហើយអ្នកទិញបានប្រគល់ម៉ូតូនោះ ទៅភាគីអ្នកលក់វិញ។ ដោយឡែក បញ្ហាដែលពាក់ព័ន្ធជាមួយម៉ូតូ និងក្រុមហ៊ុនបង់រំលស់នោះ គឺម្ចាស់ហាងជាអ្នកទទួលខុសត្រូវទាំងអស់ មិនពាក់ព័ន្ធជាមួយជនរងគ្រោះនោះឡើយ។

សូមរំលឹកថា ប្រជាពលរដ្ឋរស់នៅខេត្តតាកែវ ចាញ់បោកកន្លែងលក់ម៉ូតូមួយកន្លែងយីហោ «CHD Moto Shop» នៅម្ដុំរង្វង់មូលសំពៅមាស ខណ្ឌ៧មករា រាជធានីភ្នំពេញ ក្រោមរូបភាពម្ចាស់ហាងយកម៉ូតូជាប់ក្នុងបញ្ជីបង់រំលស់ជាមួយក្រុមហ៊ុន ប៉ុន្ដែលក់ឲ្យជនរងគ្រោះទិញផ្ដាច់ រួចគេចវេសមិនទទួលខុសត្រូវ ធ្វើឲ្យក្រុមហ៊ុនបង់រំលស់ទាក់ទងមកជនរងគ្រោះ ដើម្បីឲ្យបំពេញកាតព្វកិច្ចបង់រំលស់។

យុវជនឈ្មោះ តុង ចាន់វ៉ា អាយុ២២ឆ្នាំ ជាកម្មកររោងចក្រស្នាក់នៅបន្ទប់ជួលក្នុងរាជធានីភ្នំពេញ ប្រាប់ភ្នាក់ងារ Fresh News ឲ្យដឹងនៅថ្ងៃទី៣១ ខែមករា ឆ្នាំ២០២៦នេះ កាលពីថ្ងៃទី២៨ ខែធ្នូ ឆ្នាំ២០២៥កន្លងទៅ ខ្លួនបានជិះម៉ូតូមួយគ្រឿងម៉ាក Honda Dream C125 ពណ៌ខ្មៅ ឆ្នាំ២០២២ ពាក់ផ្លាកលេខភ្នំពេញ 1JS-7488 ក្នុងតម្លៃ២,១៧០ដុល្លារ (ទិញដាច់) ពីហាងលក់ម៉ូតូយីហោ «CHD Moto Shop»។

ជនរងគ្រោះបានបន្ដថា លុះដល់ថ្ងៃទី២៩ ខែមករា ឆ្នាំ២០២៦ មានលេខទូរស័ព្ទមួួយបានទាក់ទងមកខ្លួន ដោយអះអាងថា ជាបុគ្គលិកក្រុមហ៊ុនបង់រំលស់ឈ្មោះ ឆាយលីស រ៉ូយ៉ាល់ ហ្វាយនែន និងបានបញ្ជាក់ថា ម៉ូតូដែលជនរងគ្រោះកំពុងប្រើប្រាស់នេះ គឺជាប់ក្នុងបញ្ជីបង់រំលស់ជាមួយក្រុមហ៊ុន។ ក្រោយមកនៅថ្ងៃទី៣០ ខែមករា ឆ្នាំ២០២៦ម្សិលមិញ ជនរងគ្រោះ និងបុគ្គលិក អាយលីស រ៉ូយ៉ាល់ ហ្វាយនែន ក៏បានទៅសួរនាំនៅហាងលក់ម៉ូតូដែលខ្លួនបានទិញ។

ហាងលក់ម៉ូតូខាងលើ បានសន្យាថា នៅថ្ងៃទី៣១ ខែមករា ឆ្នាំ២០២៦នេះ ឲ្យជនរងគ្រោះ យកម៉ូតូមកលក់ឲ្យខ្លួនវិញ ប៉ុន្ដែខាត២០០ដុល្លារ។ នៅពេលជនរងគ្រោះទៅដល់មុខហាងដែលបានទិញម៉ូតូនោះ ម្ចាស់ហាងមិនចេញមកជួប ហើយបានប្ដូរទីតាំងណាត់ជួប ទៅម្ដុំវត្តទួលទំពូងវិញ នៅពេលជនរងគ្រោះទៅដល់វត្តទួលទំពូង ស្រាប់តែម្ចាស់ហាងប្រាប់ឲ្យទៅកន្លែងទិញម៉ូតូម្ដុំរង្វង់មូលសំពៅមាសវិញ។ ពោលតាំងពីព្រឹក រហូតមកដល់រសៀលថ្ងៃទី៣១ ខែមករានេះ គឺម្ចាស់ហាងបន្ដគេចវេសមិនទទួលខុសត្រូវនោះឡើយ៕