(ប៉ោយប៉ែត)៖​ លោកបណ្ឌិត ប៉ាន់ខែម ប៊ុនថន រដ្ឋលេខាធិការទីស្តីការគណៈរដ្ឋមន្ត្រី​ និងជាប្រធានក្រុមការងាររាជរដ្ឋាភិបាល ចុះមូលដ្ឋានក្រុងប៉ោយប៉ែត នាព្រឹកថ្ងៃទី០៤ ខែកុម្ភៈ ឆ្នាំ២០២៦ បានជួបប្រជុំជាមួយក្រុមពាណិជ្ជករ ​និងក្រុមអាជីវករក្រុងប៉ោយប៉ែត​ ដើម្បីពិភាក្សាអំពីគម្រោងផែនការ អភិវឌ្ឍក្រុងប៉ោយប៉ែត នៅសាលប្រជុំសាលាក្រុងប៉ោយប៉ែត។

​ក្នុងកិច្ចប្រជុំពិភាក្សានេះ ក៏មានការចូលរួមពីសំណាក់លោក លៀម សូដា អភិបាលរង​ខេត្តបន្ទាយមានជ័យ លោក គាត ហ៊ុល អភិបាលក្រុងប៉ោយប៉ែត​ លោក ព្រហ្ម ពិសិទ្ធ អធិការនៃអធិការដ្ឋាននគរបាលក្រុងប៉ោយប៉ែត​ ចៅសង្កាត់​ មន្ត្រីរាជការ​ ព្រមទាំងបងប្អូនពាណិជ្ជករនិងអាជីវករក្រុងប៉ោយប៉ែត។

លោកបណ្ឌិត​ ប៉ាន់ខែម​ ប៊ុនថន បានបញ្ជាក់ថា​ ការប្រជុំគ្នាថ្ងៃនេះ​ គឺក្នុងបំណងរួមគ្នាពិភាក្សាដោះដូរយោបល់ ក្នុងន័យផ្ដោតសំខាន់ លើការជំរុញកសាងហេដ្ឋារចនាសម្ព័ន្ធ​ និងអភិវឌ្ឍក្រុងប៉ោយប៉ែតទាំងមូល ឱ្យកាន់តែមានសោភ័ណភាព​ ស៊ីវីល័យ​ ទាន់សម័យ​ និងកាន់តែមានការរីកចម្រើនល្អប្រសើរឡើង ទាំងផ្នែកសេដ្ឋកិច្ច​ និងសង្គម​សាធារណៈ​ ដើម្បីបញ្ជាក់ឱ្យពិភពលោក បានឃើញថា កម្ពុជាមានសុខសន្តិភាព​ តំបន់ព្រំដែ​នកម្ពុជាមានការអភិវឌ្ឍ​ និងជាទីកន្លែងប្រកបដោយសុខុដុមនីយកម្ម ជាមួយគ្រប់ជាតិសាសន៍ ក្រោមម្លប់សន្តិភាព​ និងការដឹកនាំប្រកបដោយគតិបណ្ឌិតរបស់សម្តេចបវរធិបតី​ ហ៊ុន​ ម៉ាណែត​ នាយករដ្ឋមន្ត្រីកម្ពុជា៕