(ពោធិ៍សាត់)៖ ហាងលក់ម៉ូតូហុងដា ខូយ វ៉េត (សំពៅមាសពោធិ៍សាត់) ដោយបានការចូលរួមសហការ ពីក្រុមហ៊ុន អិន ស៊ី អិច ហុងដា (NCX Honda), នាយកវិទ្យាល័យពោធិ៍សាត់ និងតំណាងមន្ទីរសាធារណការ និងដឹកជញ្ជូនខេត្តពោធិ៍សាត់ នាថ្ងៃទី០៤ ខែកុម្ភៈ ឆ្នាំ២០២៦នេះ បានរៀបចំកម្មវិធីផ្សព្វផ្សាយច្បាប់ចរាចរណ៍ផ្លូវគោក និងការបណ្តុះបណ្តាលជំនាញសុវត្ថិភាពបើកបរទ្រង់ទ្រាយធំ ជូនសិស្សានុសិស្ស នៃវិទ្យាល័យពោធិ៍សាត់។

ពិធីនេះត្រូវបានធ្វើឡើង នៅបរិវេណវិទ្យាល័យពោធិ៍សាត់ ដោយបានការចូលរួមពី លោក បុណ្យ ចាន់ហឿន និងលោក ថោង សុខុម តំណាងមន្ទីរសាធារណការ និងដឹកជញ្ជូន, លោក ជា ឡេងឃួន នាយកវិទ្យាល័យពោធិ៍សាត់, លោក សេង វាសនា តំណាងក្រុមហ៊ុន អិន ស៊ី អិច ហុងដា (NCX Honda), លោក ខូយ វ៉េត ម្ចាស់ហាងលក់ម៉ូតូហុងដា ខូយ វ៉េត (សំពៅមាសពោធិ៍សាត់) ព្រមទាំងលោកគ្រូ អ្នកគ្រូ និងប្អូនៗសិស្សានុសិស្ស ប្រមាណជិត២ពាន់នាក់។

លោក សេង វាសនា តំណាងក្រុមហ៊ុន អិន ស៊ី អិច ហុងដា (NCX Honda) បានថ្លែងថា គ្រោះថ្នាក់ចរាចរណ៍ គឺជាបញ្ហាសំខាន់មួយ ដែលប្រទេសយើងកំពុងប្រឈមមុខជារៀងរាល់ថ្ងៃ ព្រមទាំងបណ្តាលឱ្យមានការបាត់បង់ជីវិត រងរបួស និងការខូចខាតទ្រព្យសម្បត្តិរាប់មិនអស់ រួមទាំងបង្កគ្រោះថ្នាក់ចំពោះសុខភាពផ្លូវចិត្តនៃគ្រួសារ និងសហគមន៍ផងដែរ។

លោកបន្តថា ដើម្បីរួមចំណែកកាត់បន្ថយគ្រោះថ្នាក់ចរាចរណ៍, ក្រុមហ៊ុន អិន ស៊ី អិច ហុងដា (NCX Honda) បានបង្កើតសាលាបង្រៀនបើកបរទោចក្រក្រយានយន្ត ចាប់តាំងពីឆ្នាំ២០០៨ ដើម្បីផ្តល់ការអប់រំ ដោយឥតគិតថ្លៃ ស្តីពីច្បាប់ចរាចរណ៍ផ្លូវគោក និងជំនាញបើកបរប្រកបដោយសុវត្ថិភាព។ ក្រុមហ៊ុន និងដៃគូអាជីវកម្មរបស់ខ្លួននៅទូទាំងប្រទេស បានបន្តការខិតខំលើកកម្ពស់ការយល់ដឹង អំពីសុវត្ថិភាពចរាចរណ៍ និងផ្តល់ការអប់រំដល់វិស័យផ្សេងៗដូចជា៖ ស្ថាប័នអប់រំ, អង្គការក្រៅរដ្ឋាភិបាល, ក្រុមហ៊ុនឯកជន និងសាជីវកម្មនានា...។ល។

ជាក់ស្តែងនាថ្ងៃនេះ លោក ខូយ វ៉េត ម្ចាស់ហាងលក់ម៉ូតូហុងដា ខូយ វ៉េត ដែលត្រូវផ្លាស់ប្តូរឈ្មោះថ្មី ជាហាងសំពៅមាសពោធិ៍សាត់ ក៏បានផ្តល់កិត្តិយសចូលរួម និងតែងតែឧបត្ថម្ភគាំទ្រដល់ការរៀបចំវគ្គបណ្តុះបណ្តាលនេះ ជាប់ជាប្រចាំ ជាពិសេសក្នុងខេត្តពោធិ៍សាត់ ក្នុងគោលបំណងដើម្បីការពារ និងកាត់បន្ថយគ្រោះថ្នាក់ចរាចរណ៍, ពង្រឹងចំណេះដឹង និងការយល់ដឹង, ផ្លាស់ប្តូរឥរិយាបថរបស់អ្នកបើកបរ ឱ្យគោរពច្បាប់ និងវិន័យសង្គម និងកិច្ចការពារផលប្រយោជន៍សេដ្ឋកិច្ច។

លោកបានគូសបញ្ជាក់ថា ចាប់តាំងពីឆ្នាំ២០២៣ ក្រុមហ៊ុនបានដំឡើងម៉ាស៊ីនបើកបរ នៅទូទាំងប្រទេស ចំនួន៣៥គ្រឿង និងកំពុងបន្តដំឡើងបន្ថែមជាង១០គ្រឿងទៀត ដើម្បីចូលរួមបណ្តុះបណ្តាល និងលើកកម្ពស់ការយល់ដឹង អំពីសុវត្ថិភាពចរាចរណ៍អតិថិជនទាំងអស់ ជាពិសេសគឺជាយុវជន សិស្សានុសិស្ស ដែលជាទំពាំងស្នងឬស្សី និងជាកម្លាំងនៃការផ្លាស់ប្តូរ។

លោកសង្ឃឹមយ៉ាងមុតមាំថា ការបន្តការខិតខំប្រឹងប្រែងលើកកម្ពស់ការយល់ដឹង អំពីសុវត្ថិភាពចរាចរណ៍ ការបន្តដំឡើងម៉ាស៊ីនបើកបរ និងសកម្មភាពចូលរួមក្នុងសង្គមផ្សេងៗទៀត គឺជានិមិត្តរូប នៃការប្តេជ្ញាចិត្តរបស់យើង ចំពោះសុវត្ថិភាពចរាចរណ៍។

លោក សេង វាសនា ក៏សូមផ្តាំផ្ញើដល់ប្អូនៗសិស្សានុសិស្ស សូមចូលរួមគោរពច្បាប់ចរាចរណ៍ទាំងអស់គ្នា និងធ្វើខ្លួនជាគំរូល្អ សម្រាប់អ្នកដទៃ, កុំបើកបរលើសល្បឿន ដែលច្បាប់បានកំណត់, សូមពាក់មួកសុវត្ថិភាពជានិច្ច រាល់ពេលរធ្វើដំណើរទោះជិត ឬឆ្ងាយ, កុំប្រើទូរស័ព្ទ ពេលជិះឬបើកបរ និងសូមជួយផ្សព្វផ្សាយ ទៅកាន់មិត្រភក្ត្រ និងបងប្អូនឱ្យបានដឹង។

ក្នុងឱកាសនោះ ក៏មានការបង្ហាត់បង្ហាញជាក់ស្តែង ដែលបង្រៀនដោយគ្រូបង្គោល នៃក្រុមហ៊ុន អិន ស៊ី អិច ហុងដា (NCX Honda) អំពីច្បាប់ចរាចរណ៍ផ្លូវគោក និងផ្តល់នូវជំនាញបើកបរបានត្រឹឹមត្រូវ និងមានសុវត្ថិភាព ជូនសិស្សានុសិស្ស នៅទីលានអនុវត្តដៃចង្កូត ព្រមទាំងប្រគល់វត្ថុអនុស្សាវរីយ៍ ជាមួកការពារ អាវយឺត និងប្រេងម៉ាស៊ីនម៉ូតូផងដែរ៕