(កំពង់ស្ពឺ)៖ ដោយអនុវត្តតាមការចង្អុលបង្ហាញរបស់នាយឧត្ដមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និងមានការណែនាំដោយផ្ទាល់ពីសំណាក់​ បណ្ឌិត ជាម ច័ន្ទសោភ័ណ្ឌ អភិបាលខេត្តកំពង់ស្ពឺ ក្រោមការដឹកនាំបញ្ជាយ៉ាងម៉ឺងម៉ាត់របស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ ក្រោមការសម្របសម្រួលនីតិវិធីពី​​ព្រះរាជអាជ្ញា អមសាលាដំបូងខេត្តកំពង់ស្ពឺ កាលពីនៅវេលាម៉ោង ១០៖០៥នាទី​​ព្រឹកនាថ្ងៃទី៣០ ខែមករា ឆ្នាំ២០២៦ ​កន្លងមកនេះ​ កម្លាំងមូលដ្ឋានកងរាជអាវុធហត្ថក្រុងច្បារមន បានចេញល្បាត ដល់ចំនុចផ្លូវបំបែក ស្ថិតនៅភូមិត្រាចជ្រុំ សង្កាត់សុព័រ៍ទេព បាន​បង្រ្កាប​ជាក់ស្តែង​ ដោយឃាត់ខ្លួនជនសង្ស័យម្នាក់ ជាប់​ពាក់ព័ន្ធ​ករណី​ករណីគ្រឿងញៀន។

ជនសង្ស័យមានឈ្មោះ​ លិន រដ្ឋសភា ភេទប្រុស អាយុ៣៧ឆ្នាំ មុខរបមិនពិតប្រាកដ មានទីលំនៅបច្ចុប្បន្នភូមិព្រៃផ្តៅ ឃុំត្រពាំងគង ស្រុកសំរោងទង ខេត្តកំពង់ស្ពឺ។ រហូតដល់វេលាម៉ោង ១៨៖១០នាទីល្ងាច ថ្ងៃទី៣០​ ខែមករា ឆ្នាំ២០២៦ កម្លាំងមូលដ្ឋាន​កង​រាជ​អាវុធហត្ថ​ក្រុងច្បារមន សហការជាមួយកម្លាំងមន្ទីរស្រាវជ្រាវ បង្រ្កាបទល្មើ និងកម្លាំងមូលដ្ឋាន​កងរាជ​អាវុធហត្ថ​ស្រុកសំរោងទង បានកំណត់មុខសញ្ញា ស្រាវជ្រាវបន្តឃាត់ខ្លួនជនសង្ស័យ បានម្នាក់ទៀត នៅក្នុងរោងចក្រកាត់ដេរមួយកន្លែង ដោយជនសង្ស័យមានឈ្មោះ ឈុំ ស៊ីថេត ភេទប្រុស អាយុ៣៩ឆ្នាំ មុខរបរកម្មកររោងចក្រ ទីលំនៅបច្ចុប្បន្ន ស្ថិតនៅភូមិរោងគោ ឃុំសំរោងទង ស្រុកសំរោងទង ខេត្តកំពង់ស្ពឺ។

ក្រោម​វិធានការ​ជំនាញ​អាវុធ​ខេត្តកំពង់ស្ពឺ នៅវេលាម៉ោង ១២៖៥៦នាទីរសៀល នាថ្ងៃទី៣១ ខែមករា ឆ្នាំ២០២៦ កម្លាំង​មន្ទីរស្រាវជ្រាវបង្ក្រាប និងបទល្មើស​ បាន​សហការ​ជាមួយកម្លាំងមូលដ្ឋានកងរាជអាវុធហត្ថក្រុងច្បារមន និងកម្លាំងមូលដ្ឋានកងរាជអាវុធហត្ថសុខសំរោងទង បានកំណត់មុខសញ្ញា​បន្តឃាត់ខ្លួនជនសង្ស័យបានចំនួន២នាក់បន្ថែមទៀត ស្ថិតនៅភូមិត្រពាំងខ្យង ឃុំត្រពាំងគង ស្រុកសំរោងទង។

ជនសង្ស័យមានឈ្មោះ ស៊ឹម សារិត ភេទប្រុស អាយុ៣១ឆ្នាំ មុខរបរមិនពិតប្រាកដ ទីលំនៅបច្ចុប្បន្ន ភូមិអូរក្រាំងអំបិល ឃុំត្រពាំងគង ស្រុកសំរោងទង ខេត្តកំពង់ស្ពឺ​ និងឈ្មោះ ប៉ែន ប៊ុនធឿន ភេទប្រុស អាយុ៣២ឆ្នាំ មុខរបរកសិករ ទីលំនៅបច្ចុប្បន្ន ភូមិត្រពាំងខ្យង ឃុំត្រពាំងគង ស្រុកសំរោងទង ខេត្តកំពង់ស្ពឺ។

នៅបន្ទាប់ត្រូវនិងថ្ងៃទី១ ខែកុម្ភៈ ឆ្នាំ២០២៦ នាវេលាម៉ោង ១៤៖៣៧នាទី កម្លាំងមន្ទីរស្រាវជ្រាវ និងបង្ក្រាបបទល្មើស​​ បានបន្តសហការជាមួយមូលដ្ឋានកងរាជអាវុធហត្ថក្រុងច្បារមន និងកម្លាំងមូលដ្ឋានកងរាជអាវុធហត្ថ ស្រុកសំរោងទង ចុះឆែកឆេរផ្ទះរបស់ឈ្មោះ ប៉ិច សុថុន ភេទប្រុស អាយុ៤០ឆ្នាំ រស់នៅភូមិគរ ឃុំសំបូរ ស្រុកសំរោងទង ខេត្តកំពង់ស្ពឺ (តែជនសង្ស័យរត់គេចខ្លួនបាត់)។

ជា​លទ្ធផល​ក្នុងរង្វង់ប្រតិបត្តិ​ការ​បង្ក្រាប​ចំនួន៤ទីតាំង​ផ្សេងគ្នា​នេះ​ កម្លាំង​ជំនាញអាវុធហត្ថខេត្តកំពង់ស្ពឺ ចាប់យកវត្ថុតាងបានរួមមាន៖

*ម្សៅក្រាមសថ្លាសង្ស័យជាសារធាតុញៀនចំនួន២១កញ្ចប់ (ទម្ងន់៧៥១.៤ក្រាម)
*ទូរស័ព្ទចំនួន០៤គ្រឿង
*នាឡិកាដៃចំនួន០១គ្រឿង
*កាបូបចំនួន០១
*ម៉ូតូចំនួន០១គ្រឿង
*ជញ្ជីងថ្លឹងគ្រឿងញៀនចំនួន០១គ្រឿង
*ផ្លាកលេខរថយន្តចំនួន០២គូរ (៤សន្លឹក) (ភ្នំពេញ 2AP-3745 និងខេមរភូមិន្ទ 2-9083)
*ប័ណ្ណសម្គាល់យានយន្ត ចំនួន០១សន្លឹក
*កាតគ្រីរថយន្តចំនួន០២សន្លឹក
*កាតគ្រីម៉ូតូចំនួន០៩សន្លឹក
*លិខិតរថយន្ត MC ចំនួន ០១សន្លឹក
*អត្តសញ្ញាណបណ្ណសញ្ញាតិខ្មែរ ចំនួន០១សន្លឹក(ឈ្មោះ ប៉ិច សុថុន)​​ និងថង់ច្រកព្រមទាំងឧបករណ៍ប្រើប្រាស់ថ្នាំញៀនមួយចំនួនទៀត។

បច្ចុប្បន្នជនសង្ស័យខាងលើ រួមនឹងវត្ថុតាងត្រូវបានកម្លាំងជំនាញកងរាជអាវុធហត្ថខេត្តកំពង់ស្ពឺ កសាងសំណុំរឿង‌‎បញ្ជូនទៅសាលាដំបូងខេត្តកំពង់ស្ពឺ ដើម្បីចាត់ការតាមនីតិវិធី៕

ទស្សនាវិដេអូ៖ https://t.me/freshnewsasia/271780