(ក្រចេះ)៖ នៅថ្ងៃពុធ ទី៤ ខែកុម្ភៈ ឆ្នាំ២០២៦នេះ សាលាអនុគណស្រុកសំបូរ បានរៀបចំ​ពិធីផ្សព្វផ្សាយខ្លឹមសារសង្ឃប្រកាសអនុសំវច្ឆរ​មហា​សន្និ​បាតមន្ត្រីសង្ឃទូទាំងប្រទេស​លើក​ទី៣៣ នៅទូទាំងស្រុកសំបូររបស់សាលា​អនុគណ​ស្រុកសំបូរ។

ពិធីនេះប្រព្រឹត្តទៅក្រោមអធិបតីភាព ព្រះញាណសារណវេទី​ លឹម​ ប៊ុនថុន​ ព្រះរាជា​គ​ណៈ​​កិត្តិយស​ នៃព្រះរាជាណាចក្រកម្ពុជា​ ព្រះវិន័យមេធា​ ព្រះបាឡាត់គណខេត្តក្រចេះ​ តំណាង​ព្រះមេគណខេត្តក្រចេះ លោក ស៊ូ សែ ប្រធានមន្ទីរធម្មការ និងសាសនាខេត្ត​ក្រចេះ និងលោក គង់ មេត្តា អភិបាល នៃគណៈអភិបាលស្រុកសំបូរ។ ពិធីក៏មានការ​និមន្ត​​ចូលរួមពីសំណាក់ព្រះសិរីសម្ភារ៍​ បណ្ឌិត​ អេង​ ផល្លា​ ព្រះរាជាគណៈកិត្តិយស នៃព្រះរាជាណាចក្រកម្ពុជា​ ព្រះគ្រូវិសោធបញ្ញា ព្រះអនុគណស្រុក​សំបូរ​ ខេត្តក្រចេះ និងជាព្រះចៅអធិការវត្ត​ព្រះ​វិហារធំសសរ១០០ និងមានការនិមន្ត និងអញ្ជើញចូលរួមពីសហការីមន្ត្រីសង្ឃសាលាគណ​ខេត្ត​ក្រចេះ មន្ត្រីសង្ឃ ព្រះចៅអធិការ ភិក្ខុ សាមណេរ សមណសិស្ស-សិស្ស លោកអាចារ្យ គណៈកម្មការទាំង២៧វត្ត នៃសាលាអនុគណស្រុកសំបូរ។

ព្រះញាណសារណវេទី លឹម ប៊ុនថុន ព្រះវិន័យមេធា ព្រះបាឡាត់គណខេត្ត បានមានសង្ឃ​ដីកាក្រើនរំលឹក​ដលើមន្ត្រីសង្ឃគ្រប់ជាន់ថ្នាក់ក្នុងស្រុកសំបូរ ត្រូវបន្តយកចិត្តទុក​ដាក់ខ្ពស់​ក្នុងកិច្ចប្រតិបត្តិធម៌វិន័យរបស់ខ្លួនឱ្យបានខ្ជាប់ខ្ជួន ដើម្បីរក្សាជំហរដ៏រឹងមាំក្នុងភាពជាអ្នក​គោរព​ប្រតិបត្តិពុទ្ធសាសនា-ពង្រឹងការដឹកនាំ ប្រកបដោយគុណភាពនិងប្រសិទ្ធ គប្បីបើក​វគ្គ​ខ្លីបណ្តុះបណ្តាលបព្វជិតជាបេក្ខសមណៈ ដែលត្រូវបានជ្រើសរើសជាគណៈសង្ឃវត្ត អំពីភាពជាអ្នកដឹកនាំការគ្រប់គ្រង វិន័យសីលធម៌ របៀបស្វាធ្យាយព្រះធម៌ កិច្ចវត្ត របៀបនៃការ​គោរពព្រះមហាថេរៈ ចតុប្បារិសុទ្ធិសីល និងអភិសមាចារ ឱ្យស័ក្តិ​សមជា​សមណៈ​​សក្យបុត្ដិយ៍-សហការជាមួយក្រសួងធម្មការនិងសាសនា បន្តពង្រឹង និងលើក​កម្ពស់ វិស័យពុទ្ធិកសិក្សាគ្រប់កម្រិត ដែលជាឆ្អឹងខ្នងដ៏សំខាន់នៃពុទ្ធសាសនាថេរវាទ​កម្ពុជា ជៀសវាងការឆកល្វែងនិងធ្វេសប្រហែសក្នុងការពន្លឿន លើដំណើរការអភិវឌ្ឍពុទ្ធិកបឋមសិក្សា ដែលជាមូលដ្ឋានដ៏រឹងមាំ នៃចំណេះដឹង។

ព្រះសិរីសម្ភារ៍បណ្ឌិត អេង ផល្លា ព្រះរាជាគណៈកិត្តិយស ព្រះគ្រូវិសោធបញ្ញា ព្រះអនុ​គណ​ស្រុកសំបូរ និងជាព្រះចៅអធិការវត្តព្រះវិហារធំសសរ១០០ បានឱ្យដឹងថា បច្ចុប្បន្ន​ស្រុក​សំបូរមានវត្តអារាមសរុប ២៧វត្ត និងព្រះសង្ឃសរុប ២១៥អង្គ អាចារ្យសរុប ៨៦នាក់ និងគណៈកម្មការសរុប១៩នាក់។

ដោយមានការយកចិត្តទុកដាក់របស់មន្ទីរធម្មការ និងសាសនាខេត្ត បច្ចុប្បន្នស្រុកសំបូរ មាន​សាលាពុទ្ធិកបឋមសិក្សាចំនួន ១កន្លែង គឺកម្រងសាលាពុទ្ធិកបឋមសិក្សាសម្ដេច អគ្គមហាសេនាបតីតេជោ ហ៊ុន សែន ស្រុកសំបូរ ស្ថិតក្នុងវត្តព្រះវិហាធំរសសរ១០០ ភូមិ​សំបូរ ស្រុកសំបូរ ខេត្តក្រចេះ មានចំនួន ៣ថ្នាក់ (ឆ្នាំទី១-៣) មានសមណសិស្សចំនួន ១០០អង្គ ក្នុងឆ្នាំសិក្សា២០២៥-២០២៦ មាននាយកកម្រង ១អង្គ នាយករង ១អង្គ គ្រូជាប់កិច្ចសន្យាចំនួន ៣អង្គ គ្រូស្ម័គ្រចិត្តចំនួន២អង្គ៕