(ភ្នំពេញ)៖ នៅថ្ងៃទី៥ ខែកុម្ភៈ ឆ្នាំ២០២៦នេះ អ្នកឧកញ៉ា ម៉ុង ឬទ្ធី បានបង្ហាញរូបភាព​ជា​ច្រើនសន្លឹកក្នុងដំណាក់កាលសាងសង់វិថី «ឧកញ៉ា ម៉ុង ឬទ្ធី» ដែលជាវិថីមួយខ្សែក្នុង​រាជធានីភ្នំពេញ និងបង្ហាញពីមូលហេតុនាំវិថីនេះដាក់ឈ្មោះរបស់លោក។

អ្នកឧកញ៉ា ម៉ុង ឬទ្ធី បានរំលឹកថា វិថីមួយខ្សែនេះ បាន​ចាប់ផ្តេីម​​សាងសង់​ក្នុង​ឆ្នាំ២០០៨​ហេីយសាងសង់រួចរាល់ និង​បេីកឱ្យដំណេីរការ​ប្រេីប្រាស់​ក្នុងឆ្នាំ​២០០៩។

អ្នកឧកញ៉ា ម៉ុង ឬទ្ធី ក៏បានបង្ហាញពីមូលហេតុដែលនាំឱ្យវិថីនេះ ត្រូវបានដាក់ឈ្មោះ​របស់​លោកផងដែរ។ បើតាមអ្នកឧកញ៉ា ម៉ុង ឬទ្ធី ការដែលវិថីនេះ ដាក់ឈ្មោះរបស់​លោក ក៏ព្រោះរូបលោកបានចូលរួមកសាងហេដ្ឋារចនាសម្ព័ន្ធនានានៅកម្ពុជា ជាមួយរាជ​រដ្ឋាភិបាល ក្រោយពេលប្រទេសជាតិរកបានសុខសន្តិភាពពេញលេញនៅឆ្នាំ១៩៩៨។

សម្រាប់អ្នកឧកញ៉ា ម៉ុង ឬទ្ធី ការរំលឹកពីរឿងដាក់ឈ្មោះលើផ្លូវនេះ គ្រាន់តែចង់បង្ហាញ​ពីមូល​ហេតុនៃការដាក់ឈ្មោះរបស់លោកលើផ្លូវនេះប៉ុណ្ណោះ គ្មានគោល​បំណង​យក​គុណស្រ័យ​អ្វីនោះទេ​។ មានអ្នកដឹងគុណ​ក៏បាន​ ហើយរមិលគុណ​ក៏មិនអីទេ​។

ជាមួយការបង្ហាញរូបភាពនេះ នាំឱ្យអ្នកលេងបណ្តាញជាច្រើនចាប់អារម្មណ៍ និងចែក​រំលែក​​បន្ត ខណៈអ្នកខ្លះក៏មិនស្គាល់ផងដែរថា តើវិថីនោះស្ថិតនៅកន្លែងណា?

វិថីឧកញ៉ា ម៉ុង ឬទ្ធី ជាវិថីមួយខ្សែចាប់ផ្តើមពីរង្វង់មូលកាំកូស៊ីធី ឆ្លងកាត់មហាមិត្តភាព​កម្ពុជា-វៀតណាម កាត់ផ្សារបឹងបៃតង ហើយ​មកភ្ជាប់ត្រឹមវិថីឧកញ៉ា ទ្រី ហេង។ ប៉ុន្តែ​បច្ចុប្បន្ន​នេះ វិថីមួយខ្សែនេះ ត្រូវបានអាជ្ញាធរសង់ផ្លូវបេតុងបន្ត​ទម្លុះមករហូតដល់បុរី​ពិភព​ថ្មី​​សែនសុខ។

តាមរយៈរូបភាពដែលបង្ហាញដោយអ្នកឧកញ៉ា ម៉ុង ឬទ្ធី ក្នុងដំណាក់កាលសាង​សង់​កាល​ពីឆ្នាំ២០០៨ បានបង្ហាញថា ទិដ្ឋភាពអមសងខាងវិថីនេះ ប្រៀបដូចជាតំបន់ជនបទដាច់​ស្រ​យាលមិនសូវមានសំណង់អគារផ្សេងៗនោះឡើយ។ ទិដ្ឋភាពកាលពីឆ្នាំ២០០៨នោះ នៅអមសាងខាងវិថីមួយខ្សែនេះ គឺខុសគ្នាខ្លាំងណាស់ជាមួយស្ថានភាពនាពេល​បច្ចុ​ប្បន្ន​។

រយៈពេល១៨ឆ្នាំមកនេះ អមសងខាងវិថី «ឧកញ៉ា ម៉ុង ឬទ្ធី» បានវិវឌ្ឍន៍ពីទីស្ងប់ស្ងាត់​ជា​តំបន់ប្រមូលផ្តុំដោយសំណង់លំនៅឋាន សំណង់អគារពាណិជ្ជកម្ម ផ្សារទំនើប និង​អា​ហារដ្ឋានជាដើម។ ជាពិសេសនោះ វិថីមួយខ្សែនេះ បានប្រែក្លាយជាវិថីដែលមិនសូវមាន​ចរា​ចរណ៍ ក្លាយទៅជាកន្លែងមានចរាចរណ៍យ៉ាងមមាញឹក។

តាមរយៈរូបភាពវិថីបង្ហាញដោយអ្នកឧកញ៉ា ម៉ុង ឬទ្ធី ក៏បានស្តែងពីការវិវឌ្ឍ និងប្រែប្រួល​យ៉ាង​ច្រើនក្នុងរាជធានីភ្នំពេញ។ ការវិវឌ្ឍរីកចម្រើននេះ ប្រហែលមិនអាចកើតមានឡើយ បើកម្ពុជាមិនអាចបញ្ចប់សង្គ្រាមផ្ទៃក្នុងនាឆ្នាំ១៩៩៨ ហើយមិនមានការប្រឹងប្រែងពីគ្រប់តួ​អង្គក្នុងសង្គមក្រោមការដឹកនាំរបស់រាជរដ្ឋាភិបាល ដែលមានសម្តេចតេជោ ហ៊ុន សែន ជាប្រមុខ។

រូបភាពទាំងនេះ ក៏បានបង្ហាញយើងផងដែរថា កុំថាឡើយក្របខណ្ឌទូទាំងប្រទេស ត្រឹម​តែរាជធានីភ្នំពេញ ទម្រាំប្លែកភ្នែកដូចបច្ចុប្បន្ន បានឆ្លងកាត់គំនិត និងញើសមិនអាច​គណ​នាអស់ឡើយ។ ប្រជាជាតិកម្ពុជាលំបាកខ្លាំងណាស់ទំរាំអាចឈានមកកាន់ដំណាក់​កាល​ដូចបច្ចុប្បន្ន ដូច្នេះប្រជាជាតិត្រូវបន្តក្តីសង្ឃឹម បន្តប្រឹងប្រែងរួបរួមសាមគ្គីជាបន្តលើកិច្ចកសាងជាតិ ដើម្បីឈានឆ្ពោះទៅក្តីសង្ឃឹម និងការរីកចម្រើនជាបន្តទៀត៕