(ឧត្តរមានជ័យ)៖ សកម្មភាពយោធាថៃ ឈ្លានពានមកលើដែនអធិបតេយ្យភាពកម្ពុជា ទាំងពីរលើកក្នុងឆ្នាំ២០២៥ បានបន្សល់វិនាសកម្មយ៉ាងច្រើនឥតគណនា មកលើប្រជាពលរដ្ឋស្លូតត្រង់របស់កម្ពុជា។ ក្នុងនោះមានផ្ទះសម្បែង សាលារៀន មណ្ឌលសុខភាព វត្តអារ៉ាម ផ្លូវថ្នល់ ស្ពាន ព្រមទាំងហេដ្ឋារចនាសម្ព័ន្ធជាច្រើន។

សម្រាប់ខេត្តឧត្តរមានជ័យតែមួយ គឺមានសាលារៀនចំនួន១៤ ត្រូវបន្តបិទមិនអាចឱ្យកូនសិស្សចូលសិក្សាបាននោះទេ ពីព្រោះសាលារៀនត្រូវបានយោធា ជ្រើសរើសជាគោលដៅក្នុងការវាយប្រហារ ដើម្បីបំពេញមហិច្ឆតាឈ្លានពាន។

បើតាមលោក ឡៃ ផល្លា នាយកសាលាបឋមសិក្សាតាមន្តសែនជ័យ បានឱ្យដឹងថា យោធាថៃ បានទម្លាក់គ្រាប់បែកប៉ះចំសាលាកាលពីថ្ងៃទី២៧ ខែកក្កដា ឆ្នាំ២០២៥ ម្តងបាញ់ផ្លោងកាំភ្លើងធំជាច្រើនគ្រាប់ ប៉ុន្តែ បន្ទាប់ពីបទឈប់បាញ់រវាងកងទ័ពទាំងពីរ បានចូលជាធរមាន គណៈកម្មការសាលារៀន និងមានការជួយជ្រោមជ្រែងពីសំណាក់អង្គការដៃ និងថ្នាក់ដឹកនាំ បានរៀបចំជាតងសម្រាប់ឱ្យកូនសិស្សបានសិក្សា ក៏ប៉ុន្តែ នៅខែធ្នូ ឆ្នាំ២០២៥ យោធាថៃ បានបើកការឈ្លានពានលើកកម្ពុជា ជាលើកទី២ និងបានបាញ់កម្ទេចអគារសិក្សា និងតងបណ្តាលឱ្យខូចខាតបន្ថែមទៀត។

«ខ្ញុំមានអារម្មណ៍សោកស្ដាយ ព្រោះកាលណាខូតខាតយើងមិនងាយជួសជុលបានហើយសិស្ស ក៏អាចបានចូលរៀន ខ្ញុំមិនដឹងថាកងទ័ពថៃ ធ្វើបែបនេះចង់បានអ្វីនោះទេ បានកម្ទេចសាលារៀន»។ នេះជាការបញ្ជាក់បន្ថែមរបស់លោកគ្រូ ឡៃ ផល្លា។

នាយកសាលារូបនេះបានន្តថា សាលាបឋមសិក្សាតាមន្តសែនជ័យ មានសិស្សជាង ២០០នាក់ ដែលមានថ្នាក់រៀនចំនួន៦ថ្នាក់ ដោយថ្នាក់រៀនទាំងនេះបានរងការខូតខាតយ៉ាងខ្លាំង៕