(តាកែវ)៖ សំណង់ស្ថាបត្យកម្មប្រាសាទសិរីវិជយ នៅកណ្ដាលបឹងតាកែវ ត្រូវបានធ្វើពិធីបញ្ជុះបឋមសិលាបើកការដ្ឋានសាងសង់ជាផ្លូវការ នៅថ្ងៃទី៧ ខែកុម្ភៈ ឆ្នាំ២០២៦នេះ ក្រោមអធិបតីភាពលោកស្រី ញ៉ែម សាខន សខេង និងលោកស្រីបណ្ឌិត ម៉ៅ ម៉ាល័យ កែគឹមយ៉ាន រួមនិងលោកស្រី កែ សួនសុភី សសុខា។

ពិធីដ៏មហាអស្ចារ្យនេះក៏មានការយាងនិមន្តពីសម្ដេចសង្ឃគ្រប់ឋានានុក្រមនៃព្រះរាជាណាចក្រកម្ពុជា និងព្រះមន្រ្តីសង្ឃទូទាំងខេត្តតាកែវ អ្នកឧកញ៉ា ឧកញ៉ា ថ្នាក់ដឹកនាំក្រសួងស្ថាប័ននានា មន្រ្តីរាជការ លោកគ្រូ អ្នកគ្រូ ក្រុមយុវជន សិស្ស និស្សិត និងប្រជាពលរដ្ឋជាច្រើននាក់ទៀតចូលរួមផងដែរ។

សូមបញ្ជាក់ថា គម្រោងសាងសង់ប្រាសាទសិរីវិជយកណ្ដាលបឹងតាកែវនេះ គឺជាគំនិតផ្ដួចផ្ដើមរបស់រដ្ឋបាលខេត្តតាកែវ ដោយទទួលបានការគាំទ្រ និងចូលរួមបរិច្ចាគថវិកាពីសប្បុរសជននានាជិតឆ្ងាយ។ សំណង់ប្រាសាទនេះ ត្រូវបានកសាងឡើងក្នុងគោលបំណង រំលឹកដល់ប្រវត្តិសាស្ត្រដ៏រុងរឿង នៃទឹកដីខេត្តតាកែវ ដែលជាខេត្តវ័យចំណាស់ ក៏ដូចជាទុកជាមរតកវប្បធម៌ សម្រាប់មហាជនគោរពសក្ការបូជា តទៅអនាគត។

ប្រាសាទសិរីវិជ័យបឹងតាកែវ សាងសង់ឡើងតាមលំនាំអាស្រមតាឥសី នៅចង្កេះភ្នំដា សង់ឡើងអំពីបេតុងអាមេយ៉ាងរឹងមាំ ដោយមានការបិទ និងក្រាលលម្អដោយថ្មភក់ ប្រកបដោយភាពផ្ចិតផ្ចង់ ប្រាសាទមានរាងចតុកោណ ដែលមានបណ្តោយ ៦.៥៦ម៉ែត្រ ទទឹង៦ម៉ែត្រ និងកម្ពស់៩ម៉ែត្រ បំពាក់ដោយដំបូលជ្រុងក្រឡូមតាមលក្ខណៈបុរាណ និងបញ្ចប់ដោយកំពូលប្រាសាទមានរូបរាងជា «ក្រពុំឈូក» ដែលជានិមិត្តរូប នៃភាពបរិសុទ្ធ និងភាពរីកចម្រើន និងស្ពាននាគចូលប្រាសាទមានប្រវែង១៤៣.៤៥ម៉ែត្រ និងទទឹង៤ម៉ែត្រ៕