ឧត្តមសេនីយ៍ត្រី ម៉េង ស្រ៊ុន ដឹកនាំក្រុមការងារអាវុធហត្ថខេត្តកំពង់ស្ពឺ បន្តចុះសួរសុខទុក្ខប្រជាពលរដ្ឋ ដែលរងគ្រោះឆេះផ្ទះអស់ស្ទើរទាំងស្រុង ក្នុងស្រុកសំរោងទង
09-02-2026 18:11
(កំពង់ស្ពឺ)៖ ក្រោមការចង្អុលបង្ហាញ តម្រង់ទិសប្រកបដោយគុណធម៌ របស់នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និងមានការណែនាំដោយផ្ទាល់ពីសំណាក់លោកបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ។
លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ ជានិច្ចកាលតែងតែបន្តដឹកនាំក្រុមការងារក ងរាជអាវុធហត្ថខេត្តកំពង់ស្ពឺ ចូលរួមយ៉ាងសកម្ម ក្នុងការងារមនុស្សធម៌ ដោយបានចុះសួរសុខផ្ទាល់ និងនាំយកសម្ភារៈគ្រឿងឧបភោគបរិភោគ ព្រមទាំងបរិច្ចាគនូវថវិកាផ្ទាល់ខ្លួន និងមានការចូលឧបត្ថម្ភ ពីបងប្អូនសប្បុរសជននានា ដែលមានចិត្តសប្បុរសធម៌ ក្នុងចូលរួមឧបត្ថម្ភគាំទ្រ តាមរយៈបញ្ជាការដ្ឋានកងរាជ អាវុធហត្ថខេត្តកំពង់ស្ពឺ ជាបន្តបន្ទាប់នាពេលកន្លងមក។
នាវេលាម៉ោង៩៖០០នាទីព្រឹក ថ្ងៃទី៦ ខែកុម្ភៈ ឆ្នាំ២០២៦ ក្រោមស្មារតីមនុស្សធម៌ និងវប្បធម៌ចែករំលែកក្នុងនាមខ្មែរស្រលាញ់ខ្មែរ ជួយគ្នាក្នុងគ្រាលំបាក បន្ទាប់ពីទទួលនូវព័ត៌មាន ពីក្រុមការងារមូលដ្ឋានកងរាជអាវុធហត្ថស្រុកសំរោងទង ពាក់ព័ន្ធអគ្គិភ័យឆេះផ្ទះប្រជាពលរដ្ធមួយគ្រួសារ ស្ថិតនៅភូមិព្រៃផ្ដៅ ឃុំត្រពាំងគង ស្រុកសំរោងទង ខេត្តកំពង់ស្ពឺ មានឈ្មោះ សំ សុផា ភេទប្រុស អាយុ៦៩ឆ្នាំ និងប្រពន្ធ ឈ្មោះ នូ គីមណៃ ភេទស្រី អាយុ៦០ឆ្នាំ មានកូន៧នាក់ ប្រុស ០៣នាក់ និងស្រី០៤នាក់ ដែលត្រូវបានរងគ្រោះ ដោយសារអគ្គិភ័យលេបត្របាក់ ឆាបឆេះផ្ទះ អស់ស្ទើរទាំងស្រុង កាលពីប៉ុន្នានថ្ងៃមុនកន្លងមកនេះ។
ដោយក្តីអាណិតអាសូរ លោកឧត្តមសេនីយ៍ត្រី ម៉េង ស្រ៊ុន រួមនិងក្រុមការងារទាំងអស់ បានសម្តែងការចូលរួមសោកស្តាយបំផុត ចំពោះគ្រោះចង្រៃនេះផង ជាពិសេសក៏បាននាំយកនូវថវិកាចំនួន ៤០០,០០០រៀល រួមនិងសម្ភារៈប្រើប្រាស់គ្រឿងឧបភោគបរិភោគមួយចំនួនរួមមាន៖ អង្ក២បាវ/មី ២កេស/ទឹកសុទ្ធ ២កេស/ទឹកផ្លែឈើ ២កេស/ទឹកស៊ីអ៊ីវ ២យួរ/ទឹកត្រី ២យួរ/ត្រីខ ២យួរ/ភួយ ចំនួន៤ រួមនិងខ្នើយចំនួន៤ថែមទៀតផង។
សកម្មភាពមនុស្សធម៌នេះ បានបង្ហាញឲ្យឃើញអំពីការយកចិត្តទុកដាក់ ក្នុងស្មារតីជាតិនិយមខ្ពស់បំផុត របស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការ ព្រមទាំងក្រុមការងារ កងរាជអាវុធហត្ថខេត្តកំពង់ស្ពឺ និងសប្បុរសជនទាំងអស់ទាំងក្នុង និងក្រៅស្រុក ដែលតែងតែឧបត្ថម្ភនូវសម្ភារៈគ្រឿងឧបភោគបរិភោគផ្សេងៗ របស់របរប្រើប្រាស់ រួមនិងបរិច្ចាគធនធានផ្ទាល់ខ្លួនក្នុងការចូលរួមចំណែកជាមួយ លោកឧត្តមសេនីយ៍ត្រី ម៉េង ស្រ៊ុន ក្នុងការឧបត្ថម្ភជូនទៅដល់បងប្អូនប្រជាពលរដ្ឋ ដែលមានជីវភាពខ្វះខាត ជួបការលំបាក និងមានបញ្ហាផ្សេងៗ ក្នុងជីវភាពរស់ប្រចាំថ្ងៃផងដែរ៕
