(ភ្នំពេញ)៖ ក្រសួងរៀបចំដែនដី នគរូបនីយកម្ម និងសំណង់ នៅព្រឹកថ្ងៃទី១០ ខែកុម្ភៈ ឆ្នាំ២០២៦នេះ បានជួបប្រជុំជជែកជាមួយអតិថិជនគម្រោងដីឡូត៍ FOREST HARMONY​ នៅកំពត និងតំណាងក្រុមហ៊ុន CIC ដើម្បីស្វែងរកដំណោះស្រាយ បន្ទាប់ពីអតិថិជននៃគម្រោងនេះត្រូវរងគ្រោះដោយសារម្ចាស់គម្រោងដែលគេស្គាល់ថា លោក គុយ វ៉ាត ជួបបញ្ហាបំណុលចាក់ស្រេះ រើខ្លួនពុំរួច។

កិច្ចប្រជុំនេះធ្វើឡើងក្នុងអធិបតីភាពលោក ថេង ច័ន្ទសង្វារ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ នៅទីស្តីការក្រសួង។

លោក ថេង ច័ន្ទសង្វារ បង្ហោះរូបភាព និងខ្លឹមសារនៃការជួបជុំនេះលើបណ្តាញទំនាក់ទំនងសង្គមរបស់ខ្លួនថា «ទោះត្រូវប្រជុំសម្របសម្រួលច្រើនលើកច្រើនសារ​ អតិថិជនគម្រោងដីឡូត៍ដែលមានបញ្ហា​ នៅតែបន្តអត់ធ្មត់ចូលរួមជាមួយក្រុមការងារទទួលបន្ទុក​ ដើម្បីផ្តល់មតិ​យោបល់​ ធាតុចូល​ និងស្នើជាជម្រើសដោះស្រាយនានា​ ធ្វើយ៉ាងណា​ធានាឱ្យបាននូវយុត្តិធម៌​អន្តរកាលមួយ ដែល​អាចទទួលយកបាន​ពីគ្រប់ភាគី​ដែលពាក់ព័ន្ធ។ កិច្ចប្រជុំកិច្ចប្រជុំដំណោះស្រាយបញ្ហាលក់ទិញដីឡូត៍​ក្នុង បុរី FOREST HARMONY​ កំពត (១០-០២-២០២៦)»៕