(ភ្នំពេញ)៖ លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានថ្លែងបញ្ជាក់ថា គិតត្រឹមឆ្នាំសិក្សា ២០២៥-២០២៦ សាលាមត្តេយ្យសិក្សា និងគ្រឹះស្ថានសិក្សាចំណេះទូទៅទាំងសាធារណៈ​ សហគមន៍ និង​ឯកជនមានចំនួនសរុប ១៩.៥៩២កន្លែង ខណៈដែលអត្រាចូលរៀលរបស់សិស្សមានការកើនឡើងជាបន្តបន្ទាប់។

លោកបណ្ឌិតសភាចារ្យ ហង់ជួន ណារ៉ុន បានថ្លែងដូចនេះនាព្រឹកថ្ងៃទី១១ ខែកុម្ភៈ ឆ្នាំ២០២៦នេះ នាឱកាសអញ្ជើញជាអធិបតីបើកសន្និបាតបូកសរុបការងារអប់រំ យុវជន និងកីឡា ឆ្នាំសិក្សា ២០២៤-២០២៥ និងទិសដៅឆ្នាំសិក្សា ២០២៥-២០២៦ ក្រោមប្រធានបទ «គន្លងអប់រំថ្មី ដើម្បីអភិវឌ្ឍមូលធនមនុស្ស​ប្រកបដោយបរិយាបន្ន និងភាពធន់" ក្នុងគោលបំណងបន្តធ្វើបរិវត្តកម្មក្នុងវិស័យអប់រំ ឱ្យឆ្លើយតបនឹងក្របខណ្ឌគោលនយោបាយរបស់រាជរដ្ឋាភិបាលកម្ពុជា ដែលបានដាក់ចេញនាពេលកន្លងមក។

លោកបណ្ឌិតសភាចារ្យ ហង់ជួន ណារ៉ុន បានថ្លែងបញ្ជាក់ដូចនេះថា គិតត្រឹមឆ្នាំសិក្សា ២០២៥-២០២៦ សាលាមត្តេយ្យសិក្សា និងគ្រឹះស្ថានសិក្សាចំណេះទូទៅទាំងសាធារណៈ​ សហគមន៍ និង​ឯកជនសរុប ១៩.៥៩២កន្លែង ក្នុងនោះសាលាមត្តេយ្យសិក្សាគ្រប់រូបភាព ៩.២០៧កន្លែង សាលាបឋមសិក្សា ៨.២៤៨កន្លែង, អនុវិទ្យាល័យ ១.៣៦០កន្លែង និងវិទ្យាល័យ ៩៥៧កន្លែង។ គ្រឹះស្ថានសិក្សាដែលផ្តល់សេវាអប់រំបច្ចេកទេស មានចំនួន ៤៩កន្លែង និងគ្រឹះស្ថានឧត្តមសិក្សាទូទាំងប្រទេសមាន ២០០ ក្នុងនោះគ្រឹះស្ថានឧត្តមសិក្សាក្រោមក្រសួងអប់រំ យុវជន កីឡាមានចំនួន ៩៤កន្លែង។

លោកបណ្ឌិតសភាចារ្យ បានបន្ថែមថា ចំពោះការអប់រំកុមារតូចវិញ មានកុមារអាយុ៣ ទៅ៥ឆ្នាំ បានចូលរៀនគ្រប់រូបភាពមានវឌ្ឍនភាពល្អប្រសើរឡើង ក្នុងរយៈពេល ១០ឆ្នាំកន្លងមក ដោយកុមារអាយុ ៣ ទៅ ៥ឆ្នាំ កើនពី ៣១ម៉ឺននាក់ ស្រី ១៦ម៉ឺននាក់ នៅឆ្នាំសិក្សា២០១៤-២០១៥ កើនឡើងដល់ ៤៤ម៉ឺននាក់ ស្រី ២២ម៉ឺននាក់ នៅឆ្នាំសិក្សា២០២៥-២០២៦។ អត្រាចុះឈ្មោះចូលរៀនរបស់កុមារអាយុ ៥ឆ្នាំ បានកើនឡើងពី ៦១,៤% កើនដល់ ៧៧,៩% ដែលផ្អែកតាមវឌ្ឍនភាពនេះបង្ហាញថា អត្រាកុមារអាយុ ៥ឆ្នាំបានចូលរៀនគ្រប់រូបភាពមានកំណើន ១,៥% ក្នុង ១ឆ្នាំសិក្សា។

លោកបណ្ឌិតសភាចារ្យ ហង់ជួន ណារ៉ុន បានបន្ថែមថា ការចូលរៀននៅបឋមសិក្សា មានវឌ្ឍនភាពប្រសើរឡើងជាលំដាប់ ដោយអត្រាពិតនៃការសិក្សានៅបឋមសិក្សាបានកើនពី ៩៧,៩% នៅឆ្នាំសិក្សា២០១៤-២០១៥ ដល់ ១០១,៦% នៅឆ្នាំសិក្សា ២០២៥-២០២៦។ ជាមួយនេះចំនួនសិស្សបឋមសិក្សាបានកើនពី ២លាន ៨ម៉ឺននាក់ នៅឆ្នាំសិក្សា២០១៤-២០១៥ កើនដល់ ២លាន ២សែន ៥ម៉ឺននាក់ នៅឆ្នាំសិក្សា២០២៥-២០២៦។ អត្រាពិតនៃការសិក្សានៅបឋមសិក្សាស្ថិតក្នុងរង្វង់ ១០០% ក្នុងរយៈពេល ១០ឆ្នាំកន្លងមក។ អត្រារំហូរសិស្សនៅកម្រិតបឋមសិក្សា មានវឌ្ឍនភាពប្រសើរឡើងគួរឱ្យកត់សម្គាល់ ដោយអត្រាឡើងថ្នាក់បានកើនពី ៨៦,៥% ដល់ ៩០,៥% អត្រាបោះបង់ការសិក្សាថយចុះពី ៦,២% មកត្រឹម ៤,៤% និងអត្រាត្រួតថ្នាក់ស្ថិតក្នុងរង្វង់ ៥% ៕