(ភ្នំពេញ)៖ លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នាថ្ងៃទី២០ ខែកុម្ភៈ ឆ្នាំ២០២៦ បានសម្ពោធដាក់ឱ្យដំណើរការជាផ្លូវការនូវកម្មវិធីផ្តល់សេវាតាមទូរសព្ទដៃ PPWSA Mobile App ដែលនឹងបន្តពង្រឹងការផ្តល់សេវា និងស្របតាមការវិវត្តឥតឈប់ឈរនៃបច្ចេកវិទ្យា ដើម្បីបង្កើនប្រសិទ្ធភាពក្នុងការផ្តល់សេវាសាធារណៈឱ្យកាន់តែប្រសើរជាងមុន។

ការដាក់ឱ្យប្រើប្រាស់នូវមុខងារថ្មីនេះ នឹងជួយសម្រួលដល់អតិថិជនឱ្យកាន់តែងាយស្រួលក្នុងការគ្រប់គ្រងការទូទាត់ថ្លៃទឹករបស់ខ្លួនបានគ្រប់ពេលវេលា និងគ្រប់ទីកន្លែង ដោយមិនចាំបាច់ធ្វើដំណើរទៅកាន់ទីតាំងរដ្ឋាករទឹកដោយផ្ទាល់។

ថ្លែងប្រាប់អ្នកសារព័ត៌មានក្នុងកម្មវិធីបិទ​សន្និបាតបូកលទ្ធផលការងារអាជីវកម្មឆ្នាំ២០២៥ និងទិសដៅការងាររបស់រដ្ឋាករទឹកស្វយ័តក្រុងភ្នំពេញឆ្នាំ២០២៦ លោក ឡុង ណារ៉ូ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយករដ្ឋាករទឹកស្វយ័តក្រុងភ្នំពេញ បានលើកទឹកចិត្តដល់ពលរដ្ឋដែលប្រើប្រាស់បណ្តាញទឹកស្អាតរបស់រដ្ឋាករទឹកស្វយ័តក្រុងភ្នំពេញទាំងអស់ប្រើប្រាស់ កម្មវិធីទូរសព្ទដៃ​​«PPWSA App» ដែលធ្វើឱ្យអតិថិជន មានភាពងាយស្រួល និងចំណេញពេលវេលាក្នុងការបង់ថ្លៃទឹក និងឬស្នើសុំភ្ជាប់បណ្តាញទឹកថ្មី ក៏ដូចជាការស្នើសុំសេវាផ្សេងៗពីរដ្ឋាករទឹក។ លើសពីនេះ អតិថិជនក៏អាចដាក់លុយទុកបង់ នៅពេលមានការរវល់ឬចេញទៅក្រៅប្រទេសផងដែរ។​

លើសពីភាពងាយស្រួលក្នុងការទូទាត់ថ្លៃប្រើប្រាស់ទឹក PPWSA App​ មានមុខងារសំខាន់ៗមួយចំនួនទៀត ដូចជាការពិនិត្យវិក្កយបត្រ​ទឹកប្រចាំខែ និងប្រវត្តិបង់ប្រាក់, តាមដានការប្រើប្រាស់ និងពិនិត្យទិន្នន័យគីឡូទឹក, ស្នើសុំតភ្ជាប់ថ្មី និងដាក់ពាក្យសុំតភ្ជាប់បណ្តាញទឹកស្អាត។ លើសពីនេះ អតិថិជននឹងទទួលបានដំណឹងអំពីការផ្អាកផ្គត់ផ្គង់ទឹក ឬការជួសជុលផ្សេងៗ។

បើតាម លោក ឡុង ណារ៉ូ PPWSA App ត្រូវបានដាក់ឱ្យដំណើរការសាកល្បង កាលពីចុងឆ្នាំ២០២៣ ដែលមកទល់ពេលនេះ មានអ្នកទាញកម្មវិធីនេះយកទៅប្រើប្រាស់ប្រមាណជាង៤ម៉ឺននាក់​៕