(សៀមរាប)៖ លោក ឌី រ៉ាដូ អភិបាលរងខេត្តសៀមរាប បានលើកឡើងថា បានដាក់ឱ្យ​ដំណើរ​ការថ្នាលឌីជីថលកក់បន្ទប់«48hr Hotel Booking» ដើម្បីផ្តល់ភាពងាយស្រួល​ដល់​ភ្ញៀវទេសចរ ដែលត្រូវការបន្ទប់ស្នាក់នៅភ្លាមៗ ឬមុន ៤៨ម៉ោង និងដើម្បីរួមចំណែក​អភិវឌ្ឍ​ទេសចរណ៍ក្នុងខេត្តសៀមរាប។

ពិធីដាក់ឱ្យដំណើរការថ្នាលឌីជីថល 48hr Hotel Booking បានធ្វើឡើងនាល្ងាចថ្ងៃ​ទី២១ ខែកុម្ភៈ ឆ្នាំ២០២៦ នៅសណ្ឋាគារមេម៉រ ផាលេស និងរីសត របស់សមាគមក្លឹប​ទេសចរណ៍​សៀមរាប។ ការបង្កើតថ្នាលឌីជីថល 48hr Hotel Booking ទទួលបានការ​គាំទ្រ​ពីរដ្ឋបាលខេត្តសៀមរាប និងអង្គការ JICA ក្នុងគម្រោងទីក្រុងឆ្លាតវៃ ដើម្បីបង្កភាព​ងាយ​ស្រួល ដល់ភ្ញៀវទេសចរ និងជាផ្នែកមួយចូលរួមអភិវឌ្ឍវិស័យទេសចរណ៍​ក្នុងខេត្ត​សៀមរាប។

លោក ឌី រ៉ាដូ យល់ថា តាមរយៈប្រព័ន្ធថ្នាលឌីជីថល 48hr Hotel Booking បាន​បង្ហាញ​នូវ​ការ ប្តេជ្ញាចិត្ត និងចក្ខុវិស័យរបស់វិស័យឯកជន ជាពិសេសសមាគម​ក្លឹបទេស​ចរណ៍សៀមរាប ក្នុងការជំរុញការអភិវឌ្ឍវិស័យទេសចរណ៍សៀមរាបឱ្យកាន់តែទំនើប និងមានសក្កានុពល។

ទន្ទឹមគ្នានេះ លោកបានថ្លែងអំណរគុណ ដល់អង្គការ JICA ដែលបានគាំទ្រ និងសហ​ការ​ជាមួយសមាគមក្លឹបទេសចរណ៍សៀមរាប បង្កើតប្រព័ន្ធ 48hr Hotel Booking ដែលជាប្រព័ន្ធថ្មីសម្រាប់កក់បន្ទប់ ជំរុញទេសចរណ៍សៀមរាប។ ភាពជាដៃគូរបស់​អង្គ​ការ JICA បង្ហាញពីការអភិវឌ្ឍប្រកបដោយភាពស្ថាបនា និងត្រូវការចូលរួមពី​គ្រប់ភាគី​ពាក់ព័ន្ធ។

នៅក្នុងឆ្នាំ២០២៥កន្លងទៅ ភ្ញៀវទេសចរមកកម្សាន្តក្នុងខេត្តសៀមរាបមានជាង ៤លាន​នាក់ ក្នុងនោះទេសចរបរទេសជិត ១លាននាក់។

បើតាមអភិបាលរងខេត្តសៀមរាប ការធ្លាក់ចំនួនទេសបរទេសនៅអំឡុងពេលខែសម្បូរ​ភ្ញៀវ គឺនៅក្នុងខែធ្នូ ដោយសារមានការរំខាន និងបញ្ហាព្រំដែន ដែលបង្កឡើងដោយ​ទាហាន​ថៃ។ យ៉ាងណាក្តី លោកជឿជាក់ថា ស្ថានភាពនេះមិនប៉ះពាល់ធ្ងន់ធ្ងរទេ តាមរយៈការចូលរួមពីភាគីពាក់ព័ន្ធ និងភាពជឿជាក់របស់ភ្ញៀវទេសចរ ពួកគេនៅតែធ្វើដំណើរមកកម្សាន្តខេត្តសៀមរាប និងប្រទេសកម្ពុជា។

លោក ឌី រ៉ាដូ បានលើកទឹកចិត្តដល់ម្ចាស់សណ្ឋាគារ និងប្រតិបត្តិករទេសចរណ៍​ក្នុងខេត្តចូលរួមប្រើប្រព័ន្ធនេះ ដើម្បីជាការរួមចំណែកទ្រទ្រង់វិស័យទេសចរណ៍ និងសេដ្ឋកិច្ចខេត្តសៀមរាប។

លោក សែត កៅ ប្រធានសមាគមក្លឹបទេសចរណ៍សៀមរាប (STC) បានលើកឡើងថា ការដាក់ឱ្យដំណើរការថ្នាលឌីជីថល 48hr Hotel Booking ដែលជាប្រព័ន្ធកក់បន្ទប់ថ្មីនេះ នឹងបង្កភាពងាយស្រួលដល់ភ្ញៀវទេសចរ ដែលត្រូវការបន្ទប់ស្នាក់នៅភ្លាមៗ ឬមុន ៤៨ម៉ោង។

លោកបន្តថា ចំណុចពិសេសនោះ គឺប្រព័ន្ធនេះអាចប្រើប្រាស់បានសម្រាប់ទេសចរក្នុងស្រុក និងជនជាតិបរទេស ដែលកំពុងស្នាក់នៅ និងធ្វើការក្នុងប្រទេសកម្ពុជា ហើយតាមរយៈប្រព័ន្ធនេះ ពួកគេនឹងទទួលបានការបញ្ចុះតម្លៃពី ៣០ទៅ៥០%។

លោក សែត កៅ បញ្ជាក់ថា ការបង្កើតថ្នាលឌីជីថលថ្មីនេះ ស្របតាមគោលនយោបាយរបស់រាជរដ្ឋាភិបាល ក៏ដូចជាក្រសួងទេសចរណ៍ ដែលបានលើកឡើង និងជំរុញឱ្យខេត្តសៀមរាបបង្កើតអ្វីដែលទាក់ទាញបន្ថែម ទាំងផលិតផលសេវាកម្មទេសចរណ៍ ដើម្បីជំរុញភ្ញៀវទេសចរក្នុងស្រុក ឱ្យបន្តស្នាក់នៅ និងដកស្រង់វិស្សមកាលនៅក្នុងខេត្តមួយនេះ។ ដូច្នេះតាមរយៈឆាណែល ឬបណ្តាញអេបកក់បន្ទប់ 48hr Hotel Booking នឹងរួមចំណែកជំរុញវិស័យទេសចរណ៍ក្នុងខេត្តបានមួយកម្រិត។

លោកបញ្ជាក់ថា ភ្ញៀវទេសចរអាចកក់បន្ទប់តាមប្រព័ន្ធថ្នាលឌីជីថល 48hr Hotel Booking តាមប្រព័ន្ធធនាគារ ABA អេស៊ីលីដា និងតាមសេវាកម្ម SmartNas របស់ក្រុមហ៊ុន Smart Axiataផងដែរ៕