(កំពង់ធំ)៖ លោក ជា ធីរិទ្ធ អ្នកនាំពាក្យគណបក្សប្រជាជនកម្ពុជា និងជាអ្នកនាំពាក្យ​សម្តេច​​តេជោ ហ៊ុន សែន បានថ្លែងថាយុវជនរបស់បក្សត្រូវក្ដាប់ឱ្យបានរាល់កម្មវិធី​នយោ​បាយ គោលការណ៍ និងសេចក្ដីសម្រេចនានារបស់គណបក្ស ដើម្បីលើកកម្ពស់ការជឿ​ជាក់ និងគាំទ្រការដឹកនាំរបស់ថ្នាក់ដឹកនាំគណបក្ស។

លោក ជា ធីរិទ្ធ បានថ្លែងបែបនេះ ក្នុងពិធីសំណេះសំណាលជាមួយយុវជនគណបក្ស​ប្រជា​ជន​កម្ពុជា ស្រុកកំពង់ស្វាយជិត ២០០នាក់ នារសៀលថ្ងៃទី២៣ ខែកុម្ភៈ ឆ្នាំ២០​២៦ នៅសណ្ឋាគារកំពង់ធំរ៉ូយ៉ាល់។

លោក បានសម្ដែងការកោតសរសើរ និងវាយតម្លៃខ្ពស់ចំពោះក្រុមការងារយុវជនគណ​បក្ស​ស្រុក ឃុំ យុវជនគណបក្សភូមិ យុវជនគណបក្សតាមសាខា នៅក្នុងស្រុកកំពង់​ស្វាយ ដែលតែងតែចូលរួមយ៉ាងសកម្មក្នុងការចុះជួយដល់ប្រជាពលរដ្ឋ និងចូលរួមផ្សព្វ​ផ្សាយដល់យុវជនឱ្យមានឱកាសជួបជុំគ្នា និងផ្លាស់ប្តូរបទពិសោធន៍ពីគ្នាទៅវិញទៅមក ជាពិសេសពង្រឹងសាមគ្គីភាពជាធ្លុងមួយ និងឯកភាពផ្ទៃក្នុងរបស់យុវជនគណបក្សនៅ​គ្រប់​ជាន់​ថ្នាក់បានយ៉ាងល្អប្រសើរ និងមានប្រសិទ្ធភាពខ្ពស់។

លោក ជា ធីរិទ្ធ ក៏បានណែនាំយុវជនគណបក្សប្រជាជនកម្ពុជាស្រុកកំពង់ស្វាយ ត្រូវ​ក្ដាប់​ឱ្យបានរាល់កម្មវិធីនយោបាយ គោលការណ៍ និងសេចក្ដីសម្រេចនានារបស់​គណបក្ស សំដៅ​ដល់ការលើកកម្ពស់ការជឿជាក់ និងគាំទ្រការដឹកនាំរបស់សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចមហាបវរធិបតី ហ៊ុន ម៉ាណែត អនុប្រធាន​គណបក្ស និងជានាយករដ្ឋមន្ត្រីកម្ពុជា ក្នុងការថែរក្សាការពារសុខសន្តិភាព ការពារឯក​រាជ្យ អធិបតេយ្យ និងបូរណភាពទឹកដីឱ្យបានយូអង្វែងតទៅ។

លោក បន្តថាសមិទ្ធផលនានារបស់គណបក្សប្រជាជនកម្ពុជាក្នុងរយៈកាលប្រមាណ ៤៧​ឆ្នាំកន្លងមកនេះ គឺកើតឡើងពីបុព្វហេតុដ៏ត្រឹមត្រូវ និងកម្មវិធីនយោបាយ​ច្បាស់​លាស់​របស់​គណបក្ស ដែលត្រូវបានប្រែក្លាយជាគោលនយោបាយរបស់រាជរដ្ឋាភិបាល នៅរៀង​រាល់អាណត្តិនយោបាយ បន្ទាប់ពីជ័យជម្នះក្នុងការបោះឆ្នោត។ មួយវិញទៀត គោល​នយោ​បាយទាំងនេះ ក៏ត្រូវបានអនុវត្តយ៉ាងមានប្រសិទ្ធភាព និងប្រសិទ្ធផល ដោយមាន​ការចូលរួមយ៉ាងសកម្មពីសំណាក់គ្រប់យន្តការ និងតួអង្គពាក់ព័ន្ធ ជាពិសេស​សកម្ម​ជន​យុវជនគណបក្សគ្រប់រូប ដែលជាកម្លាំងស្នូលដ៏មោះមុត។

លោក ជា ធីរិទ្ធ បានផ្តាំផ្ញើដល់យុវជនគណបក្សទាំងអស់ឱ្យបន្តខិតខំបំពេញ​ការងារ​ប្រកប​ដោយស្មារតីទទួលខុសត្រូវ ដើម្បីសម្រេចបាននូវគោលដៅរួមបន្ថែមទៀតជូន​គណបក្ស និងរាជរដ្ឋាភិបាលដោយហេតុផល យុវជនជាកម្លាំងចលករមិនអាចខ្វះ​បាន​ក្នុងការបន្តវេនសម្រាប់ធានាដល់ការអភិវឌ្ឍប្រទេសនាពេលបច្ចុប្បន្ននិងអនាគត៕