(សៀមរាប)៖ លោក ឌី រ៉ាដូ អភិបាលរងខេត្តសៀមរាប បានព្រមានចាត់វិធានការតាមផ្លូវច្បាប់ ចំពោះម្ចាស់អាជីវកម្មរ៉ែ ដែលធ្វើការជីកកកាយយករ៉ែដែលគ្មានអាជ្ញាបណ្ណត្រឹមត្រូវ នឹងត្រូវទទួលទោសតាមច្បាប់កំណត់ជាធរមាន ដោយគ្មានករណីលើកលែងឡើយ។

ថ្លែងយ៉ាងដូច្នេះរបស់លោក ឌី រ៉ាដូ នៅក្នុងកិច្ចប្រជុំពិភាក្សាការងារទប់ស្កាត់ការធ្វើអាជីវកម្មធនធានរ៉ែគ្រប់ប្រភេទ ក្នុងភូមិសាស្រ្តខេត្តសៀមរាប នាថ្ងៃទី២៧ ខែកុម្ភៈ ឆ្នាំ២០២៦នេះ នៅសាលប្រជុំសាលាខេត្តសៀមរាប ដោយមានការចូលរួមពីថ្នាក់ដឹកនាំមន្ទីរ អង្គភាព ជុំវិញខេត្ត និងអាជ្ញាធរមូលដ្ឋានផងដែរ។

លោកបានបន្តថា សម្រាប់ម្ចាស់ជីវកម្មរ៉ែដែលមានអាជ្ញាបណ្ណចល័តហើយ មិនមែនមានន័យថា ពួកគាត់សុទ្ធតែមានសិទ្ធិជីកកកាយតាមសេរីភាពនោះទេ ក៏ត្រូវសុំអនុញ្ញាតពីអាជ្ញាធរមូលដ្ឋាន ដើម្បីបញ្ជាក់ថា ដីជីកយករ៉ែទាំងនោះ មិនប៉ះពាល់ដល់ដីរដ្ឋ និងទួលបុរាណ ឬតំបន់បេតិកភណ្ឌ និងតំបន់កសិកម្មផ្សេងៗ ដោយច្បាប់បានកំណត់យ៉ាងច្បាស់ហើយថា អាជ្ញាបណ្ណចល័ត គឺអាចជីកកាយបានតែដីឯកជនតែប៉ុណ្ណោះ ហើយមុននឹងបញ្ជាឲ្យជីកកាយម្ចាស់អាជីវកម្មរ៉ែ ត្រូវតែមានលិខិតអនុញ្ញាតត្រឹមត្រូវពីអាជ្ញាធរមូលដ្ឋានជាមុន។

លោកបញ្ជាក់ថា សម្រាប់ម្ចាស់អាជីវកម្មដែលមានអាជ្ញាបណ្ណចល័តហើយ ទទួលបានការអនុញ្ញាតពីអាជ្ញាធរមូលដ្ឋានហើយ ត្រូវអនុវត្តឲ្យបានត្រឹមត្រូវ ដោយការប្រើប្រាស់អាជ្ញាបណ្ណសិប្បកម្មធនធានរ៉ែ សម្រាប់សេវាកម្មជីកយកអាចម៍ដី រណ្ដៅដីចល័ត ត្រូវអនុវត្តឲ្យត្រូវតាមលក្ខខណ្ឌ ដែលអនុញ្ញាតឲ្យជីលើក្រឡាដីមិនលើសពី០.៥ហិកតា។

ជាពិសេសជម្រៅមិនលើសពី៣ម៉ែត្រ ឬប្រតិបត្តិការយកអាចម៍ដីដែលមានក្រឡាផ្ទៃដូចមុនលើស១ហិកតា និងជម្រៅមិនលើសពី១ម៉ែត្រ ហើយម្ចាស់អាជីវកម្មមុននឹងធ្វើអាជីវកម្ម ក៏ត្រូវមានកិច្ចសន្យាការពារបរិស្ថានផងដែរ។

ជាមួយគ្នានេះ លោកក៏បានជំរុញដល់រដ្ឋបាលក្រុងស្រុកទាំង១៣ និងអ្នកពាក់ព័ន្ធទាំងអស់ ត្រូវបន្តយកចិត្តទុកដាក់ និងតាមដានលើកិច្ចការនេះឲ្យបានម្មត់ចត់ និងម៉ឺងម៉ាត់ ព្រមទាំងចាត់វិធានការ ឲ្យបានទាន់ពេលវេលា ក្នុងករណីរកឃើញការជីកកាយយកអាចម៍ដីដោយខុសច្បាប់៕