(ភ្នំពេញ)៖ លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជា (CATA) បានជួបពិភាក្សាការងារជាមួយស្ថាបនិកអង្គការគាំពារធនធានសមុទ្រ ដើម្បីពង្រឹងកិច្ចសហប្រតិបត្តិការ និងជំរុញគម្រោងបណ្តុះបណ្តាលសហគមន៍មូលដ្ឋាន សំដៅលើការអភិរក្សធនធានធម្មជាតិ និងអភិវឌ្ឍទេសចរណ៍ប្រកបដោយចីរភាព។

ការលើកឡើងនេះ បានធ្វើឡើងបន្ទាប់ពីលោកស្រី ឆាយ ស៊ីវលីន ប្រធានសមាគមទេសចរណ៍កម្ពុជា បានទទួលជួបពិភាក្សាជាមួយស្ថាបនិកអង្គការគាំពារធនធានសមុទ្រស្តីពី កិច្ចសហប្រតិបត្តិការ និងគម្រោងបណ្តុះបណ្តាលសហគមមូលដ្ឋាន កាលពីថ្ងៃទី១០ ខែកុម្ភៈ ឆ្នាំ២០២៦ កន្លងទៅ។

ក្នុងកិច្ចប្រជុំនោះ លោកស្រី ឆាយ ស៊ីវលីន បានលើកឡើងអំពីសារៈសំខាន់នៃការទាញយកអត្ថប្រយោជន៍ពីធនធានធម្មជាតិដែលមានស្រាប់ ដោយភ្ជាប់ជាមួយការបណ្តុះបណ្តាលសេវាកម្មបដិសណ្ឋារកិច្ចឲ្យមានគុណភាព និងស្តង់ដារ។ លោកស្រីបានស្នើឲ្យជ្រើសរើសសហគមន៍មួយជាគម្រោងសាកល្បង ដើម្បីអនុវត្តជាគំរូ មុនពង្រីកទៅតំបន់ផ្សេងៗទៀត។

ដោយឡែកក្នុងកិច្ចសម្ភាសជាមួយបណ្ដាញព័ត៌មាន Fresh News លោកស្រីបានបញ្ជាក់ថា កិច្ចសហប្រតិបត្តិការនឹងផ្តោតលើ ៦ ចំណុចសំខាន់ៗ រួមមាន៖

ទី១៖ ការការពារឆ្នេរ និងបរិស្ថានសមុទ្រ
ទី២៖ ការជួយលើការនេសាទឲ្យបានត្រឹមត្រូវ និងចីរភាព
ទី៣៖ ការរក្សាទុក និងគ្រប់គ្រងកាបូន
ទី៤៖ ការអភិរក្សជីវចម្រុះ
ទី៥៖ ការអភិរក្ស និងស្តារដើមកោងកាង
ទី៦៖ ការជួយជ្រោមជ្រែង និងពង្រឹងសហគមន៍ទេសចរណ៍។

លោកស្រីបន្តថា វគ្គបណ្តុះបណ្តាលនៅតាមសហគមន៍ នឹងផ្តោតលើជំនាញបដិសណ្ឋារកិច្ច ការគ្រប់គ្រងអាជីវកម្មទេសចរណ៍ ការទាញយកអត្ថប្រយោជន៍ពីភ្ញៀវទេសចរ និងការបង្កើតតម្លៃបន្ថែមពីធនធានធម្មជាតិ និងរុក្ខជាតិជុំវិញភូមិ។ លើសពីនេះ សហគមន៍នឹងត្រូវណែនាំអំពី ការរៀបចំផ្ទះស្នាក់នៅ និងភោជនីយដ្ឋានឲ្យមានអត្តសញ្ញាណ និងអាចបង្កើតជាសាច់រឿង ឬប្រវត្តិនិទាន ដើម្បីទាក់ទាញ និងផ្តល់បទពិសោធន៍ពិសេសដល់ភ្ញៀវទេសចរ។

កិច្ចសហការនេះ ត្រូវបានរំពឹងថា នឹងជួយបង្កើនប្រាក់ចំណូលសហគមន៍ ការពារធនធានធម្មជាតិ និងលើកកម្ពស់ទេសចរណ៍ប្រកបដោយចីរភាព ស្របតាមទិសដៅអភិវឌ្ឍសេដ្ឋកិច្ចបៃតងរបស់កម្ពុជា៕