(ព្រះសីហនុ)៖ ដោយទទួលបានការអនុញ្ញាតពីនាយឧត្តមសេនីយ៍ ស ថេត អគ្គស្នងការនគរបាលជាតិ នារសៀលថ្ងៃទី១ ខែមីនា ឆ្នាំ២០២៦ លោកឧត្តមសេនីយ៍ឯក ទូច ពលៈ ប្រធាននាយកដ្ឋាននគរបាលការពារព្រំដែនទឹក និងជាអគ្គលេខាធិការរង នៃគ.ជ.ស.ស បានរៀបចំបដិសណ្ឋារកិច្ចទទួលប្រតិភូក្រសួងរៀបចំដែនដី នគរូបនីយកម្ម និងសំណង់ ដឹកនាំដោយលោកស្រី សេង សុមេត្តា រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ អញ្ជើញមកសំណេះសំណាល និងជាប្រធានក្រុមការងារ រាជរដ្ឋាភិបាលចុះមូលដ្ឋានក្រុងព្រះសីហនុ អញ្ជើញចុះសួរសុខទុក្ខ និងនាំយកនូវថវិកា និងគ្រឿងឧបភោគ-បរិភោគ ជូនដល់កងកម្លាំងវរសេនាតូចនគរបាលការពារព្រំដែនទឹកលេខ២៤០ ប្រចាំខេត្តព្រះសីហនុ នៅទីបញ្ជាការវរសេនាតូចនគរបាលការពារព្រំដែនទឹក លេខ២៤០ ប្រចាំខេត្តព្រះសីហនុ។

អំណោយទាំងនោះ រួមមាន៖

*ទី១៖ ថវិកា ចំនួន២២,០០០,០០០រៀល
*ទី២៖ អង្ករ ចំនួន១តោន
*ទី៣៖ ជ្រក់ត្រសក់ចំនួន៥០គីឡូក្រាម
*ទី៤៖ ឆៃប៉ូវផ្អែម ចំនួន៥០គីឡូក្រាម
*ទី៥៖ ឆៃប៉ូវប្រៃ ចំនួន៥០គីឡូក្រាម
*ទី៦៖ ត្រីងៀត ចំនួន២៥គីឡូក្រាម
*ទី៧៖ ប្រហុក ចំនួន២៥គីឡូក្រាម
*ទី៨៖ ផ្អក ចំនួន២៥គីឡូក្រាម
*ទី៩៖ មី ចំនួន១០កេសធំ
*ទី១០៖ ត្រីខ ចំនួន៥០យួរ
*ទី១១៖ Vodka ចំនួន៥កេស។

ជំនួសមុខឲ្យមន្ដ្រីក្រោមឱវាទទាំងអស់ លោកឧត្តមសេនីយ៍ឯក ទូច ពលៈ បានថ្លែងអំណរគុណដល់ប្រតិភូក្រសួងរៀបចំដែនដី នគរូបនីយកម្ម និងសំណង់ ដែលបានមកសួរសុខទុក្ខ និងឧបត្ថម្ភគ្រឿងឧបភោគបរិភោគ ជូនដល់កងកម្លាំងវរសេនាតូចនគរបាលការពារព្រំដែនទឹកលេខ២៤០ ប្រចាំខេត្តព្រះសីហនុ ដើម្បីផ្គត់ផ្គង់ក្នុងការប្រើប្រាស់ប្រចាំថ្ងៃ៕