(កំពង់ឆ្នាំង)៖ ផ្លូវថ្នល់ប្រវែង៥០០ម៉ែត្រ ដែលជាការផ្ដួចផ្ដើម និងស្ថាបនាឡើង ដោយប្រជាសហគមន៍ភូមិថ្នល់ ឃុំដារ ស្រុកកំពង់លែង សម្រាប់ប្រជាកសិករ ក្នុងមូលដ្ឋានងាយ ស្រួលក្នុងការធ្វើចរាចរណ៍ ក៏ដូចជាការដឹកកសិផលផ្សេងៗ។ ការផ្ដួចផ្ដើមស្ថាបនាផ្លូវថ្នល់នេះ ក៏មានការគាំទ្រ និងលើកទឹកចិត្តពីថ្នាក់ដឹកនាំខេត្ត និងអាជ្ញាធរ ក្នុងមូលដ្ឋានផងដែរ។

លោក វ៉ែន ឈុនហាក់ អនុប្រធានក្រុមការងារចុះមូលដ្ឋានឃុំដារ ស្រុកកំពង់លែង បានឱ្យដឹងថា ផ្លូវថ្នល់ប្រវែង៥០០ម៉ែត្រ ដែលជាគំនិតផ្ដួចផ្ដើមរបស់សហគមន៍ភូមិថ្នល់ ក្នុងឃុំដារ ខាងលើនេះ គឺជាផ្លូវថ្មី និងមានគម្រោងចាក់ដីថ្មភ្នំកិនបង្ហាប់ពីលើនៅពេលខាងមុខនេះ។

ការស្ថាបនាផ្លូវមួយខ្សែនេះ ក៏មានការលើកទឹកចិត្ត និងជួយឧបត្ថម្ភគាំទ្រពីលោកអភិបាលខេត្ត តាមរយៈលោក សាន់ យូ អភិបាលរងខេត្តកំពង់ឆ្នាំង ដែលលោកបានចុះពិនិត្យ ការស្ថាបនាផ្លូវខាងលើនេះ។

ជាក់ស្ដែង កាលពីថ្ងៃទី០១ ខែកុម្ភៈ ឆ្នាំ២០២៦កន្លងទៅ លោកអភិបាលរងខេត្ត ក៏បាននាំនូវថវិកា២លានរៀល ដែលជាការជួយឧបត្ថម្ភរបស់លោកអភិបាលខេត្ត ជូនដល់សហគមន៍ ភូមិថ្នល់ ដើម្បីចូលរួមការស្ថាបនាផ្លូវនេះ។

ទន្ទឹមនឹងនេះ លោកអភិបាលខេត្ត ក៏បានសន្យាថា នឹងជួយឧបត្ថម្ភគាំទ្រក្នុងការស្ថាបនាផ្លូវមួយខ្សែនេះ ជាបន្តបន្ទាប់ លុះត្រាតែការស្ថាបនាផ្លូវនេះ បានរួចរាល់ជាស្ថាពរ។

នៅក្នុងឱកាសចុះពិនិត្យការស្ថាបនាផ្លូវមួយខ្សែនេះ លោកអភិបាលរងខេត្ត ក៏បានបន្តដំណើរចុះសួរសុខទុក្ខប្រជាកសិករ និងពិនិត្យទៅលើស្រែប្រាំងចំនួន៧០ហិកតា ដើម្បីត្រៀមជួយសង្គ្រោះ នៅពេលជួបបញ្ហាខ្វះខាតទឹកស្រោចស្រព្យ នៅក្នុងរដូវប្រាំងខាងមុខនេះ។

ក្នុងឱកាសនោះដែរ លោកអភិបាលរងខេត្ត ក៏បានជួយឧបត្ថម្ភថវិកាមួយចំនួនដល់ពលរដ្ឋ ដែលមានជីវភាពខ្វះខាត ក្នុងមូលដ្ឋានផងដែរ៕