(ភ្នំពេញ)៖ លោកស្រី Vladanka Andreeva អ្នកសម្របសម្រួលអង្គការសហប្រជា​ជាតិប្រចាំនៅកម្ពុជា បានលើកឡើងថា អង្គការសហប្រជាជាតិ ចង់ឃើញកម្ពុជា និងថៃ ដោះស្រាយបញ្ហាព្រំដែនដោយសន្តិវិធី ផ្អែកលើធម្មនុញ្ញរបស់អង្គការសហប្រជាជាតិ និងច្បាប់អន្តរជាតិទាំងឡាយ។

លោកស្រី Vladanka Andreeva បានគូសរំលេចបែបនេះ ក្នុងឱកាសចូលជួប​សម្តែង​ការគួរសម និងពិភាក្សាការងារជាមួយសម្តេចមហាបវរធិបតី ហ៊ុន ម៉ាណែត នាយករដ្ឋ​មន្ត្រីកម្ពុជា នាព្រឹកថ្ងៃចន្ទ ទី២ ខែមីនា ឆ្នាំ២០២៦នេះ។

ក្នុងជំនួបនេះ សម្ដេចមហាបវរធិបតី ហ៊ុន ម៉ាណែត បានជម្រាបលោកស្រី Vladanka Andreeva អំពីការវិវត្តថ្មីៗនៃស្ថានការណ៍តាមបណ្ដោយព្រំដែន កម្ពុជា-ថៃ និង​បាន​គូស​បញ្ជាក់អំពីជំហររបស់កម្ពុជានៅក្នុងការបន្តប្រកាន់​យកការដោះស្រាយបញ្ហាព្រំដែន​ដោយសន្តិវិធី ផ្អែកលើច្បាប់អន្តរជាតិ អនុសញ្ញា សន្ធិសញ្ញា និងកិច្ចព្រមព្រៀង​ទ្វេភាគី​ដែលមានស្រាប់រវាងប្រទេសទាំងពីរ។

លោកស្រី ក៏បានជម្រាបសម្ដេចមហាបវរធិបតីថា អង្គការសហប្រជាជាតិ ចង់ឃើញ​ប្រទេស​ទាំងពីរដោះស្រាយភាពខ្វែងគ្នាដោយសន្តិវិធី ដោយគោរពតាមធម្មនុញ្ញនៃអង្គការ​សហប្រជាជាតិ និងច្បាប់អន្តរជាតិ។

ក្រៅពីបញ្ហាខាងលើនេះ ក្នុងជំនួបនាព្រឹកមិញនេះ សម្តេចមហាបវរធិបតី និងលោកស្រី Vladanka Andreeva បានពិភាក្សាលើកិច្ចសហប្រតិបត្តិការគ្នារវាងរាជរដ្ឋាភិបាល​កម្ពុជា និងទីភ្នាក់ងារនានារបស់អង្គការសហប្រជាជាតិផងដែរ។

ក្នុងជំនួបនេះ លោកស្រី បានថ្លែងអំណរគុណ និងវាយតម្លៃខ្ពស់ចំពោះការចូលរួម​ចំណែក​​​របស់កម្ពុជា​អំឡុងពេល២០ឆ្នាំក្នុងបេសកកម្មរក្សាសន្តិភាពពិភពលោក តាម​រយៈ​ការបន្តបញ្ជូន​កង​ទ័ពមួកខៀវទៅបំពេញបេសកកម្មថែរក្សាសន្តិភាពនៅឆ័ត្រក្រោម​អង្គការសហប្រជាជាតិ។ លោកស្រី ក៏បានវាយតម្លៃខ្ពស់ចំពោះកិច្ចសហប្រតិបត្តិការ​ដ៏ល្អ​រវាង​ក្រសួង-ស្ថាប័ន​ពាក់​ព័ន្ធ​កម្ពុជា ជាមួយទីភ្នាក់ងារអង្គការសហប្រជាជាតិប្រចាំនៅ​កម្ពុជានាពេលកន្លងមក។

លោកស្រីក៏បានជម្រាបសម្ដេចមហាបវរធិបតីថា ទីភ្នាក់ងារនានារបស់អង្គការសហប្រ​ជា​ជាតិ​នៅកម្ពុជា នឹងបន្តភាពសកម្មរបស់ខ្លួន ដើម្បីបន្តពង្រឹងភាពជាដៃគូជាមួយ​ក្រសួង-​ស្ថា​ប័នកម្ពុជា សំដៅគាំទ្រដល់ដំណើរការអភិវឌ្ឍសង្គម-សេដ្ឋកិច្ចរបស់កម្ពុជា ស្របតាម​យុទ្ធសាស្ត្របញ្ចកោណ ដំណាក់កាលទី១ ជាពិសេសការបង្កើតការងារ, ការបង្កើន​ជំនាញ​​បន្ថែម (Upskilling), ការកសាងមូលធនមនុស្សជាដើម។

ជាការឆ្លើយតប សម្ដេចមហាបវរធិបតីប្រមុខរាជរដ្ឋាភិបាល បានសម្ដែងនូវសេចក្ដី​សោម​ន​ស្ស​រីករាយ និងស្វាគមន៍លោកស្រី ដែលបានមកបំពេញបេសកកម្មការងារជាលើកទី២ នៅកម្ពុជា។ សម្ដេចនាយករដ្ឋមន្ត្រី បានវាយតម្លៃខ្ពស់ចំពោះតួនាទីក្នុងភាពជាដៃគូរបស់​អង្គការសហប្រជាជាតិក្នុងការគាំទ្រដល់ការរីកចម្រើនសង្គម-សេដ្ឋកិច្ចនៅកម្ពុជា ក៏ដូច​ជា​ការបន្តការគាំទ្ររបស់អង្គការសហប្រជាជាតិនៅកម្ពុជា ក្នុងដំណើរការនៃការចាកចេញពី​ចំណាត់ក្រុមប្រទេសដែលមានការអភិវឌ្ឍតិចតួច (LDC) ក្នុងឆ្នាំ២០២៩ ខាងមុខនេះ។

សម្ដេចនាយករដ្ឋមន្ត្រី បានរំលឹកឡើងវិញអំពីជំនួបពិភាក្សាការងារប្រកបដោយ​ផ្លែផ្កា​របស់​សម្ដេចមហាបវរធិបតី និងលោក António Guterres អគ្គលេខាធិការអង្គកា​រ​សហប្រជាជាតិ, លោកស្រី Annalena Baerbock ប្រធានសម័យប្រជុំលើកទី៨០ នៃ​មហាសន្និបាតអង្គការសហប្រជាជាតិ ក៏ដូចជាលោក Volker Türk ឧត្តមស្នង​ការសហ​ប្រជាជាតិទទួលបន្ទុកសិទ្ធិមនុស្ស ក្នុងឱកាសដែលសម្ដេចមហាបវរធិបតី​ អញ្ជើញ​បំពេញ​បេសកកម្មការងារនៅទ្វីបអឺរ៉ុប។

សម្ដេចមហាបវរធិបតី ក៏បានគូសបញ្ជាក់ថា ក្រសួង-ស្ថាប័នពាក់ព័ន្ធកម្ពុជា នឹងបន្តធ្វើ​ការ​យ៉ាងជិតស្និទ្ធ​ជាមួយបណ្ដាទីភ្នាក់ងារអង្គការសហប្រជាជាតិប្រចាំនៅកម្ពុជា៕