(ព្រៃវែង)៖ ក្នុងសម្លេងរណ្តំ នៃក្តារអង្រឹងត្បាញដែលបន្លឺឡើងចេញពីក្រោមផ្ទះ ស្រ្តីវ័យចំណាស់ម្នាក់ នៅក្នុងភូមិព្រែកចង្ក្រាន្ត ឃុំព្រែកចង្ក្រាន្ត ស្រុកស៊ីធរកណ្តាល ខេត្តព្រៃវែង នៅតែបន្តក្រងចងខ្សែសូត្រ និងជ្រលក់ពណ៌ យ៉ាងផ្ចិតផ្ចង់ ដើម្បីបង្កើតបានជាសំពត់ហូលដ៏ប្រណិត ទោះបីជាបច្ចុប្បន្នពួកគេកំពុងប្រឈមនឹងកង្វះខាតអ្នកបន្តវេនពីក្មេងជំនាន់ក្រោយក៏ដោយ។

​របរត្បាញហូលនៅឃុំព្រែកចង្ក្រាន្ត គឺជាកេរដំណែលតាំងពីដូនតារៀងមក។ ទោះជាយ៉ាងណាក្នុងសម័យកាលបច្ចេកវិទ្យានេះ យុវជនភាគច្រើនបានសម្រេចចិត្តចាកចេញពីស្រុកកំណើត ដើម្បីទៅធ្វើការនៅតាមរោងចក្រ ឬចំណាកស្រុកទៅក្រៅប្រទេស ដែលធ្វើឱ្យរបរមួយនេះនៅសល់តែមនុស្សវ័យចំណាស់ជាអ្នកថែរក្សា។

ការគាំទ្រពីមហាជនក្នុងការប្រើប្រាស់ផលិតផលខ្មែរទោះបីជាកម្លាំងអ្នកបន្តវេនមានតិចតួច ប៉ុន្តែស្មារតីនៃអ្នកភូមិព្រែកចង្ក្រាន្តនៅតែរឹងមាំ។ ការបន្តត្បាញហូលមិនត្រឹមតែជាការរកប្រាក់ចំណូលប៉ុណ្ណោះទេ ប៉ុន្តែគឺជាការត្បាញ ដាស់ព្រលឹងវប្បធម៌ខ្មែរឱ្យរស់រានមានជីវិតតទៅមុខទៀត។

លោកមេភូមិព្រែកចង្ក្រាន្ត បានប្រាប់លោក នុត នាង ភ្នាក់ងារព័ត៌មាន Fresh News ប្រចាំខេត្តស្វាយរៀង-ព្រៃវែង នៅថ្ងៃទី៣ ខែមីនា ឆ្នាំ២០២៦ថា នៅក្នុងភូមិព្រែកចង្ក្រាន្ត មានកីតម្បាញ៥៦កី ចំណែកប្រជាពលរដ្ឋ ដែលប្រកបរបរនេះមាន៤៦គ្រួសារ។ មុខរបរនេះមានតាំងពីដូនតា តម្បាញហូលតជំនាន់រហូតដល់សព្វថ្ងៃនេះ។

លោកបានបញ្ជាក់ថា ប្រជាពលរដ្ឋមិនសូវតស៊ូតម្បាញហូលដោយសារវត្ថុធាតុដើម សូត្រមានតម្លៃថ្លៃ រីឯតម្លៃហូលវិញនៅរក្សាតម្លៃដើមដដែល អ្នកខ្លះលក់បានពី ៨០ទៅ ១០០ដុល្លារ ក្នុង ១ក្បិន ចំណូលបានមកពីការ តម្បាញហូលនេះ ចំណេញតិចធ្វើឱ្យប្រជាពលរដ្ឋមួយចំនួនបានបោះបង់មុខរបរនេះចោល នាំគ្នាទៅធ្វើការរោងចក្រ និងប្រកបរបរផ្សេងវិញ៕