(ព្រះវិហារ)៖ លោកស្រី ហែម សុគុណពិសី ប្រធានមន្ទីរព័ត៌មានខេត្តព្រះវិហារ នៅព្រឹកថ្ងៃទី៣ ខែមីនា ឆ្នាំ២០២៦ បានដឹកនាំក្រុមការងារ ចុះសួរសុខទុក្ខ និងនាំយកអំណោយជាសម្ភារប្រើប្រាស់ និងគ្រឿងឧបភោគបរិភោគ មកប្រគល់ជូនវីរៈកងទ័ពជួរមុខ ដែលកំពុងឈរជើងយ៉ាងអង់អាចក្លាហាន ការពារបូរណភាពទឹកដី តាមខ្សែបន្ទាត់ព្រំដែនកម្ពុជា-ថៃ ក្នុងភូមិសាស្ត្រខេត្តព្រះវិហារ។

ក្នុងឱកាសនោះលោកស្រីប្រធានមន្ទីរព័ត៌មានខេត្តព្រះវិហារ បានថ្លែងកោតសរសើរ និងវាយតម្លៃខ្ពស់ចំពោះការលះបង់កម្លាំងកាយចិត្ត របស់បងប្អូនកងទ័ព ដែលបានប្រឈមមុខនឹងការលំបាកគ្រប់បែបយ៉ាង ដើម្បីការពារសន្តិភាព ស្ថិរភាព និងសុវត្ថិភាពជូនប្រជាពលរដ្ឋ។

លោកស្រីថ្លែងបានបញ្ជាក់ថា ការចុះសួរសុខទុក្ខនាពេលនេះ គឺជាការបង្ហាញពីទឹកចិត្តសាមគ្គី និងការគាំទ្រយ៉ាងពេញទំហឹងពីមន្ត្រីព័ត៌មាន និងថ្នាក់ដឹកនាំ ចំពោះវីរកងទ័ពដែលកំពុងបំពេញភារកិច្ចដ៏ថ្លៃថ្នូរ។

លោកស្រី ហែម សុគុណពិសី បានបន្តថា ទោះបីអំណោយទាំងនេះមិនមានតម្លៃមហិមាក្តី ប៉ុន្តែជាការចែករំលែកពីចិត្តស្មោះស្ម័គ្រ និងជាកម្លាំងចិត្តមួយ ជួយសម្រួលដល់ជីវភាពរស់នៅ និងការបំពេញភារកិច្ចប្រចាំថ្ងៃ របស់កងកម្លាំងជួរមុខ។ លោកស្រីបានជូនពរដល់បងប្អូនវីរកងទ័ពទាំងអស់ សូមមានសុខភាពល្អ មាំមួន មានទឹកចិត្តរឹងមាំ និងបន្តស្មារតីស្នេហាជាតិ ដើម្បីជាបង្អែកដ៏រឹងមាំសម្រាប់ជាតិមាតុភូមិ។

សូមបញ្ជាក់ថា អំណោយដែលបាននាំយកទៅប្រគល់ជូននាពេលនេះរួមមាន៖ បន្ទះសូឡាអាគុយចំនួន ១ឈុត ចង្ក្រាន និងកំប៉ុងហ្គាស គ្រឿងឧបភោគបរិភោគ និងនំណែកមួយចំនួន ដែលជាការចូលរួមវិភាគទាន ពីលោកស្រីប្រធានមន្ទីរផ្ទាល់ រួមជាមួយលោកស្រី ធន សយនារីរត្នន៍ ទីប្រឹក្សាក្រសួងព័ត៌មាន។

បន្ថែមពីនេះ នាឡិកាដៃចំនួន ១៣គ្រឿង ជាអំណោយរបស់លោក ឃឹម វុទ្ធី អគ្គនាយក អគ្គនាយកដ្ឋានទូរទស្សន៍ជាតិកម្ពុជា និងលោកស្រី ឈឹមពៅ សុកាន់ឌី អគ្គនាយិកា អគ្គនាយកដ្ឋានវិទ្យុជាតិកម្ពុជា ព្រមទាំងទឹកពិសាបរិសុទ្ធចំនួន ៣០កេស ជាអំណោយរបស់លោកស្រី ជា ស៊ុនដាណែត រដ្ឋលេខាធិការប្រចាំការ នៃក្រសួងព័ត៌មាន៕