(ប៉េកាំង)៖ នាថ្ងៃអង្គារ ទី៣ ខែមីនា ចិនបានអំពាវនាវឱ្យគ្រប់ភាគីក្នុងសង្រ្គាមនៅមជ្ឈិមបូព៌ា រក្សាសុវត្ថិភាពច្រកសមុទ្រ Hormuz ដែលជាច្រកដឹកជញ្ជូនផ្លូវទឹកដ៏សំខាន់បំផុតមួយ សម្រាប់ប្រេងនិងឧស្ម័នរបស់ពិភពលោក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ជិត១ភាគ៤នៃប្រេងរបស់ពិភពលោក ដែលដឹកជញ្ជូនតាមផ្លូវទឹក គឺឆ្លងកាត់ច្រកសមុទ្រខាងលើ ហើយទំនិញក្នុងបរិមាណដ៏ច្រើន ក៏ដូចគ្នាដែរ។ អ្នកនាំពាក្យក្រសួងការបរទេសចិន លោកស្រី Mao Ning បាននិយាយថា ចិនទទូចឱ្យភាគីទាំងអស់បញ្ឈប់ជាបន្ទាន់ នូវប្រតិបត្តិការយោធា ចៀសវាងការបង្កើនភាពតានតឹងថែមទៀត រក្សាសុវត្ថិភាពនៃការដឹកជញ្ជូននៅច្រកសមុទ្រ Hormuz និងទប់ស្កាត់ផលប៉ះពាល់ធ្ងន់ធ្ងរ លើសេដ្ឋកិច្ចពិភពលោក។

ក្រោយការវាយប្រហាររបស់អាមេរិកនិងអ៉ីស្រាអែលលើអ៉ីរ៉ង់ កាលពីថ្ងៃសៅរ៍ចុងសប្តាហ៍មុន អ៉ីរ៉ង់បានប្រកាសបិទច្រកសមុទ្រ Hormuz ជាហេតុនាំឱ្យក្រុមហ៊ុនកប៉ាល់ដឹកជញ្ជូនអន្តរជាតិមួយចំនួន ផ្អាកការធ្វើដំណើរឆ្លងកាត់ច្រកសមុទ្រនោះ។

គួរបញ្ជាក់ថា ចិនគឺជាអតិថិជនធំជាងគេនៃប្រេងរបស់អ៉ីរ៉ង់ ដែលភាគច្រើនត្រូវបានដឹកជញ្ជូនឆ្លងកាត់ច្រកសមុទ្រ Hormuz។ លោកស្រី Mao បានបន្ថែមថា សន្តិសុខថាមពលមានសារសំខាន់ជាខ្លាំង ចំពោះសេដ្ឋកិច្ចសកល ហើយចិននឹងចាត់វិធានការចាំបាច់ ដើម្បីធានាការពារសន្តិសុខថាមពលរបស់ខ្លួន៕