(សៀមរាប)៖ លោក ចំរើន ចំរុង ជំទប់ទី១ ឃុំក្រឡាញ់ និងជាប្រធានគ្រប់គ្រងមណ្ឌលជំរំភៀសសឹកវត្តធម្មរង្សី ហៅវត្តសំពៅលូន ឃុំសំពៅលូន ស្រុកក្រឡាញ់ ខេត្តសៀមរាប បានឱ្យដឹងថា ក្រោយប្រជាពលរដ្ឋត្រូវបានជម្លៀស ចេញពីលំនៅដ្ឋាន អំឡុងពេលរងការវាយប្រហារ ដោយការឈ្លានពានពីសំណាក់យោធាថៃ ពីថ្ងៃទី៨-២៧ ខែធ្នូ ឆ្នាំ២០២៥ បច្ចុប្បន្ននេះ ស្ត្រីមានផ្ទៃពោះចំនួន ៣៥នាក់ បន្តស្នាក់នៅ និងរង់ចាំថ្ងៃសម្រាល នៅមណ្ឌលជំរំភៀសសឹកវត្តធម្មរង្សី ហៅវត្តសំពៅលូន ខណៈមានស្ត្រីចំនួន១២នាក់រួចទៅហើយ បានសម្រាលកូននៅក្នុងមណ្ឌលសុវត្ថិភាព។

ប្រធានគ្រប់គ្រងមណ្ឌលជំរំភៀសសឹកវត្តហៅវត្តសំពៅលូនបានបញ្ជាក់ថា ស្ត្រីមានផ្ទៃពោះ និងទើបសម្រាលកូនរួចរាល់ទាំងនោះ ក៏ដូចជាពលរដ្ឋភៀសសឹកដទៃទៀត ដែលកំពុងបន្តស្នាក់នៅមណ្ឌលសុវត្ថិភាពនេះ គឺមកពីសង្កាត់អូរស្មាច់ ក្រុងសំរោង ខេត្តឧត្តរមានជ័យ ដែលផ្ទះរបស់ពួកគាត់ត្រូវបានបំផ្លាញ និងគំរាមកំហែង (តំបន់ក្រហមនៅមានគ្រាប់មិនទាន់ផ្ទុះមិនអាចចូលទៅភូមិបាន) ដោយការបាញ់ផ្លោង គ្រាប់បែកចង្កោម និងទម្លាក់គ្រាប់របស់យោធាថៃ។

បច្ចុប្បន្ននេះ មានជនភៀសសឹកដែលកំពុងស្នាក់នៅក្នុងមណ្ឌលសុវត្ថិភាពវត្តសំពៅលូន ចំនួន ៤១៤គ្រួសារ ស្មើនឹង ១ ៣៩៥នាក់ ដែលភៀសសឹកមកពីតំបន់អូរស្មាច់ ក្រុងសំរោង ខេត្តឧត្តរមានជ័យ ជាទីតាំងដែលយោធាថៃ ចូលឈ្លានពានដេញពលរដ្ឋខ្មែរស្លូតត្រង់ចេញពីផ្ទះសម្បែង ក្រោយបទឈប់បាញ់រវាងកងទ័ពទាំងពីរចូលជាធរមាន៕