(ព្រះវិហារ)៖ មន្ទីរសាធារណការ និងដឹកជញ្ជូនខេត្តព្រះវិហារ បានចេញសេចក្តីជូនដំណឹង ស្តីពីគម្រោងជួសជុល និងពង្រីកកំណាត់ផ្លូវជាតិលេខ៦២ ទំហំ៥ម៉ែត្រសងខាង រួចក្រាលកៅស៊ូDBST ប្រវែង៦០០ម៉ែត្រ ស្ថិតក្នុងភូមិហ្មសែត សង្កាត់ប៉ាលហាល ក្រុងព្រះវិហារ ដោយចាប់ផ្តើមអនុវត្តនៅថ្ងៃទី១៦ ខែមីនា ឆ្នាំ២០២៦ តទៅ។

យោងសេចក្តីជូនដំណឹងរបស់មន្ទីរសាធារណការ និងដឹកជញ្ជូនខេត្តព្រះវិហារ ដែលចុះហត្ថលេខដោយលោក សំ លាងទ្រី ជាប្រធានមន្ទីរ ដែលបណ្តាញព័ត៍មានFresh News ទទួលបាននារសៀលថ្ងៃទី០៤ ខែមីនា ឆ្នាំ២០២៦ នេះ បានបញ្ជាក់ថា ក្រៅពីគម្រោងជួសជុលនិងពង្រីកតំណាត់ផ្លូវជាតិលេខ៦២នេះ មន្ទីរសាធារណការ ក៏រៀបចំគូសគំនូសចរាចរណ៍ប្រវែង៨២០ម៉ែត្រ ដាំដុំចំណាំងអ័ក្សផ្លូវ(Road Stud 3M)ចំនួន៩៧គ្រាប់ និងផ្លាកសញ្ញាចរាចរណ៍ចំនួន៦ផ្លាក ព្រមទាំងដាក់លូមូលបណ្តោយផ្លូវមុខកាត់១ម៉ែត្រ ប្រវែង១១២០ម៉ែត្រ រឺហ្គា ចំនួន៥០កន្លែង និងខឿនចិញ្ចើមផ្លូវប្រវែង១១២០ម៉ែត្រ ចាប់ពីគ.ម១២០+៦០០ ដល់ គ.ម១២១+២០០។

មន្ទីរសាធារណការ បានអំពាវនាវដល់ប្រជាពលរដ្ឋទាំងអស់ដែលជាម្ចាស់ចលនទ្រព្យ និងអាជីវករស្ថិតនៅទីតាំងខាងលើ សូមមេត្តាយយោគយល់ និងស្មារតីចូលរួមចំណែករុះរើសំណង់ផ្សេងៗដែលបានរំលោភចូលដីចំណីផ្លូវរបស់រដ្ឋ ក្នុងគោលបំណងសម្រួលដល់ការជួសជុល ពង្រីកកំណាត់ផ្លូវជាតិលេខ៦២ នេះ ដំណើរការដោយរលូនទាន់ពេលវេលាកំណត់ និងជៀសវាងមានបាតុភាពផ្សេងៗកើតឡើង៕