(ភ្នំពេញ)៖ លោកសាស្ត្រាចារ្យ ងី ម៉េង នាយកមន្ទីរពេទ្យមិត្តភាពខ្មែរ-សូវៀត បានថ្លែងលើកទឹកចិត្តដល់ប្រជាពលរដ្ឋទាំងក្នុង និងក្រៅប្រទេសអញ្ជើញមកទទួលសេវាពិនិត្យសុខភាពជាប្រចាំ ដែលមានសារៈសំខាន់ក្នុងការកាត់បន្ថយហានិភ័យមានជំងឺ រកឃើញនិងព្យាបាលជំងឺឲ្យទាន់ពេលវេលា និងពង្រឹងថែទាំសុខភាពទូទៅឲ្យបានប្រសើរជាងមុន។

ការថ្លែងយ៉ាងដូច្នេះរបស់លោកសាស្ត្រាចារ្យ ក្នុងឳកាសអញ្ជើញជាអធិបតីភាពដាក់ឱ្យដំណើរការបន្ទប់ពិនិត្យសុខភាព នៅមជ្ឈមណ្ឌលព្យាបាលជំងឺបេះដូង និងមនុស្សចាស់ នៅអគារព្រះសីហនុរាជនៃមន្ទីរពេទ្យមិត្តភាពខ្មែរ-សូវៀត ដើម្បីបង្កើនប្រសិទ្ធភាពក្នុងការព្យាបាលជំងឺ នាថ្ងៃទី៤ ខែមីនា ឆ្នាំ២០២៦។

លោកសាស្ត្រាចារ្យ ងី ម៉េង បានឲ្យដឹងថា «ការបើកដំណើរបន្ទប់ពិនិត្យជំងឺនេះ គឺសម្រាប់ពិនិត្យសុខភាពជាទូទៅ មានន័យថា មេឌីខល ឆែកអាប់ ដែលអ្នកធម្មតាក៏អាចពិនិត្យបានដែរ មានជំងឺមួយចំនួនយើងអាចដឹងមុខបានពេលយើងមកពិនិត្យនិងព្យាបាលទាន់ពេល។ ដូច្នេះបងប្អូនប្រជាពលរដ្ឋ ដែលមានបំណងចង់មកពិនិត្យសុខភាព សូមអញ្ជើញមកទទួលសេវានៅមនី្ទរពេទ្យមិត្តភាពខ្មែរ-សូវៀត»។

លោកសាស្ត្រាចារ្យ ងី ម៉េង បានថ្លែងបន្តថា មន្ទីរពេទ្យមិត្តភាពខ្មែរ-សូវៀត បាននិងកំពុងសហប្រតិបត្តិការជាដៃគូជាតិ និងអន្តរជាតិ មានដូចជា៖ ក្រុមគ្រូពេទ្យ EP ពីសហរដ្ឋអាមេរិក, ក្រុមគ្រូពេទ្យ EP និង Interventional ពីកូរ៉េ, ក្រុមគ្រូពេទ្យ EP និង Imagery ពីសាធារណៈរដ្ឋឥណ្ឌូនេស៊ីជាដើម។

តាមរបាយការណ៍សង្ខេបបានឲ្យដឹងអំពីវឌ្ឍនភាពនៃការផ្តល់សេវានៅមជ្ឈមណ្ឌលព្យាបាលជំងឺបេះដូង និងមនុស្សចាស់ ដែលសម្រេចបាននាពេលកន្លងមកនេះ ដូចជា៖ អគារព្រះសីហនុរាជ នៃមន្ទីរពេទ្យមិត្តភាពខ្មែរ-សូវៀត ផ្នែកព្យាបាលមនុស្សចាស់ បានដំណើរការកាលពីថ្ងៃទី៦ ខែសីហា ឆ្នាំ២០១៥ និងផ្នែកព្យាបាលជំងឺបេះដូង បានដំណើរការកាលពីថ្ងៃទី១៨ ខែតុលា ឆ្នាំ២០១៨ មកទល់នឹងពេលនេះយើងមានបន្ទប់សរុបចំនួន២៥ បន្ទប់ និង៧០គ្រែ។

ក្នុងរយៈពេល២ឆ្នាំចុងក្រោយនេះ មជ្ឈមណ្ឌលព្យាបាលជំងឺបេះដូង និងមនុស្សចាស់ ទទួលបានអ្នកជំងឺចូលសម្រាកព្យាបាលសរុបក្នុងឆ្នាំ២០២៤ មានចំនួន ៤,៧៧៧ ករណី ខណៈ ក្នុងឆ្នាំ២០២៥ មាន៤,៨៨៩ករណី ដែលកើន ៣% បើធៀបទៅឆ្នាំ២០២៤៕