(រតនគិរី)៖ លោក ញ៉ែម សំអឿន អភិបាលខេត្តរតនគិរី បានលើកឡើងថា កម្មវិធីផ្សព្វផ្សាយអំពីអាហារូបករណ៍ជាឱកាសដ៏មានតម្លៃសម្រាប់សិស្សានុសិស្សទៅសិក្សានៅតៃវ៉ាន់ ដែលបាននិងកំពុងក្លាយជាទិសដៅសិក្សាទំនើប និងមានតម្លៃខ្លាំងក្នុងតំបន់អាស៊ី។

ការលើកឡើងរបស់លោកអភិបាលខេត្តរតនគិរី យ៉ាងដូច្នេះធ្វើឡើងនៅក្នុងកម្មវិធីផ្សព្វផ្សាយអំពីអាហារូបករណ៍ស្តីពី «ព័ត៌មានអាហារូបករណ៍ និងឱកាសការងារនៅតៃវ៉ាន់» ដែលរៀបចំដោយក្រុមការងារ Step Up Training Center នៅសាលមហោស្រពរតនៈ នៅព្រឹកថ្ងៃទី០៥ ខែមីនា ឆ្នាំ២០២៦។ ពិធីនេះមានការចូលរួមថ្នាក់ដឹកនាំមន្រ្តីរាជការ និងសិស្សានុសិស្យប្រមាណ៤០០នាក់។

អភិបាលខេត្តបានបន្តថា ផ្អែកតាមក្រុមការងារដែលបានរៀបចំកម្មវិធីនេះ បានបញ្ជាក់ថា មានសាកលវិទ្យាល័យដៃគូនៅតៃវ៉ាន់ ចំនួន៥ បានផ្តល់ជាអាហាររូបករណ៍មាន១៤មុខវិជ្ជា សម្រាប់ប្អូនៗជ្រើសរើស។ កន្លងមកមានយុវជនកម្ពុជាមួយចំនួនបានទទួលផលប្រយោជន៍ពីអាហារូបករណ៍ស្រដៀងគ្នានេះរួច មកហើយ និងបានត្រឡប់មកបម្រើជាតិក្នុងវិស័យសិក្សា វិទ្យាសាស្ត្រ និងអាជីវកម្ម។ ចំណុចនេះសបញ្ជាក់ថា ការទទួលបានអាហារូបករណ៍ទៅតៃវ៉ាន់ ជាជំហានដ៏សំខាន់ម្រាប់ការកសាងអនាគតរបស់ពួកគេ។

លោក ញ៉ែម សំអឿន បានលើកទឹកចិត្តដល់ប្អូនៗទាំងអស់ព្យាយាមសិក្សារៀនសូត្រ ដើម្បីតម្រង់ទិសធ្វើ យ៉ាងណាប្រឡងយកសញ្ញាបត្រមធ្យមសិក្សាទុតិយភូមិជាមុនសិន ដែលជាឈ្នាន់ដ៏សំខាន់បាញ់ឆ្ពោះទៅរក មហាវិទ្យាល័យ ឬមកដាក់ពាក្យដើម្បីទទួលបានអាហាររូបករណ៍ទៅសិក្សានៅតៃវ៉ាន់តាមរយៈមជ្ឈមណ្ឌល Step Up Training Center ដែលធ្វើការជ្រើសរើស និងបញ្ជូនទៅជារៀងរាល់ឆ្នាំ។

អភិបាលខេត្តបានគូសបញ្ជាក់ថា អត្ថប្រយោជន៍នៃការសិក្សានៅតៃវ៉ាន់ គឺប្អូនៗនឹងទទួលបានការបណ្តុះបណ្តាលមួយប្រកបដោយ គុណភាពខ្ពស់ បរិយាកាសសុវត្ថិភាព មានធានារ៉ាប់រង អាចធ្វើ (Part-time) ដែលជាប្រភពចំណូលផ្គត់ផ្គង់ខ្លួនឯង កំឡុងពេលសិក្សា និងអាចសន្សំសម្រាប់ធ្វើដើមទុនប្រកបអាជីវកម្មនៅពេលបញ្ចប់ការសិក្សា ហើយត្រឡប់ មកមាតុភូមិវិញដែលអាចបម្លែងអនាគតរបស់ប្អូនៗឱ្យកាន់តែប្រសើរឡើង៕